Dili – Ohin Segunda-feira(28/4), Commição Anti-Corrupção (CAC) realiza seminariu loron sorin iha Becora ne’ebé lider komunitariu no estudante kuaze nain 60 resin ho antisiasmu partisipa iha seminariu ne’e ho orador principal Direitur Edukasaun no Peskiza (EP), Rosário Araújo.
Semináriu ne’e hanesan meius sosializasaun papel CAC ba lider komunitariu no estudantes iha teritoriu tomak ba lider komunitariu ho topiku “Onestidade Nu’udar Xavi Importante Ida Atu Hado’ok-An Husi Korrupsaun” ne’ebé knar ne’e ekzekuta husi diresaun Edukasaun e Peskiza.
Objetivu principal CAC halao seminariu iha Suku Becora atu esplika ba lider komunitariu no estudante sira misaun no vizaun CAC nian. Lider komunitariu hanesan besik povu no estudantes nudar lideransa nasional iha future presija konhese orgaun Estadu independente CAC ne’ebé halao misaun mak; Prevensaun Krimi Korrupsaun, Edukasaun e Peskiza no Investigasaun Krimi Korrupsaun.
“CAC nian servisu mak hamutuk ho povu sai lutu ba nasaun iha area prevene no kombate korrupsaun iha Timor-Leste. CAC hamrik hamutuk ho povu, instituisaun relevantes, ONG, media no estudante sei kontra inimigu públiku ida naran korrupsaun,” katak Direitur Rosário.
Seminariu ne’e taka ho sesaun perguntas no resposta iha ne’ebé lider komunitariu ho estudantes sira hato’o perguntas mesak kritiku no konstrutivu ba instituisaun CAC nian diak iha future.
Tinan ne’e tomak, CAC sei kontinua halao seminar ho future lideransa TL nian atu esplika ba sira kona-ba konhesimentu no oin sa atu kombate korrupsaun iha Timor-Leste. (*)