Comissão Anti-Corrupção (CAC) liu husi ekipa responsavel Deklarasaun Rendimentu, Bens no Interese (DRBI) lideradu Xefe Unidade Inspeksaun no Monitorizasaun Antonino Alves no Espesialista Anti-Korrupsaun (EAK) na’in hitu durante semana ida hala’o servisu ofisiál iha munisipiu bairo rai ulun (Lospalos no Viqueque) hodi rejista ajénte públiku sira haknaar-an iha munisipiu ba sira nia deklarasaun rikusoin.
Ekipa sira nia viajen ofisiál iha bairo rai ulun ne’e fahe ba munisipiu rua diferente. Ekipa na’in haat rejista Ajente Públiku (deklarante) sira nia deklarasaun iha munisipiu Lautem no na’in haat seluk iha munisipiu Viqueque.
Durante iha munisipiu, Ajénte Públiku (deklarante) sira ne’ebé ekipa rejista hela sira nia rikusoin mak kompostu husi autoridade munisipál, autoridade postu administrativu sira, kargu xefia sira iha administrasaun direta munisipiu nian, funsionariu afetu sira, inklui kargu diretór sira iha eskola sekundária no ensinu báziku.
Ekipa DRBI iha servisu ofisiál iha munisipiu rua ne’e hala’o mós esplikasaun tékniku ba deklarante sira kona-ba prosesu prensimentu online ba sistema deklarasaun rikusoin nian no fó asisténsia téknika ba deklarante sira hodi priense sira nia rikusoin.
Tuir ajenda Komisaun nian, ekipa sei kontinua rejista ajénte públiku sira nia rikusoin semana oin iha munisipiu Baucau no Manufahi, no sei termina prosesu rejistrasaun ajénte públiku sira nia deklarasaun iha fulan Novembru iha munsipiu Covalima, Ainaro no Bobonaro.
Enkuantu iha antes ne’e, ekipa termina ona rejistu ajénte públiku sira ne’ebé haknaar-an iha Rejiaun Administrativa Oecuse Ambeno (RAEOA), inklui munisipiu Aileu, Ermera, Liquiça no Manatuto.
