Komisariu Comissão Anti Corrupção (CAC) Sergio Hornai Tersa-feira (23/8) ohin loke formasaun ba investigador CAC nian atu hasae kapasidade no hakbiit konesimentu Espesialista Anti-Korrupsaun (EAK) – investigador klean liu tan kona-ba investigasaun criminal hodi servisu professional liu tan ho kapasidade nudar investigador haknar an iha instituisaun polisial espesializada krimi korrupsaun.
Formador ba formasaun-in house training ida ne’e mak asesor internasional nain rua (2) instituisaun CAC foin rekruta; Dr. Julio Martins Tavares no Dr. Antonio Osorio. Formasaun sei halao durante fulan hat (4) nian laran too fulan Dezembru no investigador hamutuk nain 23 mak sei tuir formasaun intensive ne’e iha Salaun Sorumutu CAC Farol Dili.
Formador sira ninian background nudar prokurador no halao servisu kareira professional iha tinan barak nian laran iha nasaun Brazil no Cabo Verde sei tulun investigador CAC nian hodi haklean liu tan konhesimentu EAK sira nian iha asuntu investigasaun criminal nian.
“Formasaun ida ne’e atu haklean formasaun ba investigador sira ninian kapasidade nudar EAK ne’ebé konstitui no hamrik iha CAC atu presta asistensia teknika juridika ho kualidade, ho abjetividade atu asegura legalidade ba infrasoens ne’ebé hatu’ur iha kompetensia CAC nian tuir lei Nu. 8/2009 15 de Jullu konaba Estabelesimentu CAC no Lei Nu. 7/2020 Medidas Prevensaun no Kombate Korrupsaun (MPCC)” Katak Komisariu Sergio iha ninian intervensun.
Objetivu principal husi formasaun ida ne’e katak Komisariu Sergio Hornai atu oinsa CAC halo aprefisionamentu konhesimentu naton ba provas sira ne’ebé EAK-investigador sira infrenta nudar poder polisia.
“Formasaun ida ne’e obrigatoriu atu hasae konhesimentu EAK sira nian atu halao servisu ho mais konfiavel tamba EAK sira nudar manu ain prokurador sei halo artikulasaun ho Ministeriu Publiku nudar autoridade judisiariu” Komisariu Sergio sublinha.
Investigador sira katak Komisariu CAC hakarak ka lakohi nudar autoridade polisial ne’ebé reprezenta instituisaun Estadu iha politika kombate kriminalidade nian tenki tuir formasaun durante fulan hat ne’e atu konhese diak liu tan lejislasaun foun Nu. 7/2020 Medidas Prevensaun no Kombate Korrupsaun (MPCC) ne’e iha implementasaun krimi korrupsaun no krimi koneksaun sira seluk.
Formasaun komplementar durante fulan hat (4) husi formador ne’ebé iha servisu kareira professional nudar prokurador jeral esperiensia majistradu bele tulun EAK sira iha administra justisa iha area investigasaun criminal nian.
Formasaun ida ne’e atu fo refleksaun oinsa EAK sira halo rekonsiliasaun, adjustamentu, konhesimentu sira ba melhoramentu servisu investigasaun criminal nian, nudar estudu boas pratikas no troka informasaun sira husi formador ba objetivu sakgradu luta kontra korrupsaun iha Timor-Leste.
“Formasaun ida ne’e bele iha utilidade ba formandus EAK sira durante formasaun hodi impede praktikas korrupsaun iha seitor publiku. Formasuan ne’e mos atu haklean EAK sira hodi husu responsabilidade criminal ba ajentes seitor privadu sira ne’ebé ho sira ninian atetude no komportamentu viola lei Nu. 7/2020 MPCC,” Komisariu Sergio afirma. (*)
