Comissão Anti-Corrupção (CAC) liu husi Komisariu Adjuntu ba Asuntu Servisu Apóiu no Kooperasaun (SAK) Alexandre Freitas, Komisariu Adjuntu Prevensaun no Sensibilizasaun (PS) Luis Sampaio hamutuk hoi estrutura Espesialista Anti-Korrupsaun (EAK) Sesta-feira (15/7) ohin hala’o sorumutu kortezia ho Country Representative The Asia Foundation Héctor Salazar Salame ho nia ekipa tékniku sira iha edifisiu Asia Foundation Bebonuk Dili.
Objetivu husi sorumutu kortezia ne’e, CAC ho inisiativa hakbesik ba The Asia Foundation iha Timor-Leste (TL) hodi rona aprezentasaun rezultadu peskiza husi ekipa Tatoli! ne’ebé hamahon-an iha The Asia Foundation kona-ba Levantamentu Persepsaun Públiku tinan 2022 nian iha ne’ebé konteudu balun ko’alia mós kona-ba persepsaun públiku iha asuntu korrupsaun iha TL.
Sorumutu kortezia ida ne’e mós atu hakbesik ativu liu-tan ho ajénsia The Asia Foundation hodi ko’alia detallu ba malu kona-ba kooperasaun servisu ne’ebé antes ne’e ekipa rua komunika ba malu ona hodi tulun CAC halo estudu no peskiza kle’an liu-tan asuntu korrupsaun nian.
Rezultadu sorumutu ohin parte rua konkorda malu ona ho pontus prioridade ba asuntu peskiza nian ne’ebé sei hala’o uluk peskiza kona-ba persepsaun públika korrupsaun iha TL iha tinan 2022 nian no sei kontinua peskiza sira seluk iha futuru.
Peskiza persepsaun públika ne’e nu’udar programa Komisaun nian iha DPS Unidade Estudu Avaliasaun Rísku (URAR) nian ne’ebé hala’o kada tinan lima dala ida hodi sukat koñesimentu públiku nian iha asuntu korrupsaun.
Estudu ida ne’e hahú realiza tiha ona iha tinan 2015 no kontinua realiza fila-fali iha tinan 2020, maibé ho situasaun pandemia COVID-19 nian sai dezafiu ba Komisaun labele realiza nia programa ne’e iha tinan 2020. Nune’e tinan ida ne’e Komisaun halo esforsu hodi kordena hamutuk ho The Asia Foundation hodi realiza fila-fali. (*)
