Komisariu Adjunto Comissão Anti-Corrupção (CAC) ba Asuntu Prevensaun no Sensibilizasaun, Luis de Oliveira Sampaio akompanha husi Diretor Rosario Araujo ho estrutura Prevensaun korrupsaun Sesta-feira (1/7) semana ne’e, aprezenta rezultadu deskobrimentu konaba rekrutamentu ofisial guarda florestal ne’ebé fulan kotuk sai debate nivel nasionál tanba indika eziste poténsia irregularidade durante prosesu rekrutamentu.
Aprezentasaun analiza ba rekrutamentu prelimináriu ne’e, ekipa delegasaun CAC aprezenta ba Diretor Geral Floresta nomos nu’udar Prezidenti Ekipa Juri rekrutamentu nian, Raimundo Mau ho ninian estrutura tomak iha Salaun Diresaun Jeral Florestas, Café e Plantas Industriais – MAP nian, iha Caicoli Dili.
Hafoin halo analiza no verifikasaun ba dokumentus sira ne’ebé MAP aprezenta ba CAC, revela katak la’os kandidatus nain 9 deit mak sai problema hanesan viral iha media nasional, media sosial nomos iha Parlamentu Nasional maibé iha kandidatus hamutuk nain 15 mak deteta iha irregularidade.
Indikasaun ba faktus irregularidade hirak ne’ebé CAC deskobre mak; IDA, husi kandidatu funsionariu guarda floresta sira ne’e balun nia naran la sai iha lista prezensa simu dokumentus nian husi Diresaun Geral Floresta; RUA, iha faze submisaun dokumentus kandidatu balun la hatama dokumentus; TOLU, faze selesaun dokumentus kandidatu balun la liu (eskluidu) kedas ona; HAT, kandidatu balun nia lista prezensa laiha, la hatama dokumentus, selesaun dokumentus la liu, la tuir teste eskrita maibé naran sai fali iha teste final/oral nian ho valor klasifikadu; LIMA, kandidatu balun iha teste oral valor la reflete tiha ona estandarte/padraun tuir Lei Funsaun Publika valor 60 minimum, kandidatu balun valor atinze deit 54 mai kraik.
Ho deskobrementu hirak ne’e, CAC prezume katak prosesu hirak ne’e iha indikasaun forte ba familiarismu, klientislismu, no nepotismu. Rekrutamentu ida ne’e la reflete ba baze ho meritu, koñesimentu profesional adekuada no abilidade relevante ka badaen iha area referidu. Rekrutamentu mos la bazeia ba PAA, 2022 maibe halo adjustamentu ba orsamentu ratifikativu nian. Aleinde ne’e, esplikasaun husi Prezidenti ba Ekipa Juri no membru juri sira seluk diferente no dokumentus ne’ebé submete mai CAC no revela verdade oin seluk.
Reflete ba rezultadu preliminaria ne’ebé bazeia ba analiza no deskobrimentu ne’e, ekipa Unidade Inspesaun CAC hola konkluzaun katak: IDA, iha prosesu rekrutamentu ne’e hatudu indisius forte katak iha aranju husi MAP hodi fó oportunidade ba klientislismu, familiarismu no nepotismu; RUA, prosesu rekrutamentu ne’e mos nakonu ho potensia konflitu intereses hodi fó vantajen ba grupu preferensial asosiadu sira; TOLU, iha tendensiozu makaa’as kona-ba posibilidade atu halo koreksaun dokumentus ba kandidatu sira; HAT, iha konfuzaun kona-ba modalidade rekrutamentu nian tanba tuir esplikasaun husi juri sira katak rekrutamentu ne’e ho karater kazuais, maibe iha implementasaun iha avizu ne’ebé fó sai iha konkursu dehan kontratu anual ho posibilidade ba extendsaun; LIMA, rekrutamentu ida ne’e la refleta ba prinsipiu merito, profesionál no badaen diak; NEEN, rekrutamentu la bazeia ba PAA 2022 maibé halo ajustamentu ba orsamento retifikativu.
Tanba ne’e, bazeia artigu 5 (1) letra c, CAC akonsella Diretor Geral Floresta no ekipa juri sira atu rekonsidera prosesu rekrutamentu ne’ebé hatudu indisius forte ba irregularidade.
CAC mos subliña katak independentemente husi aprosimasaun no akonsellamentu ne’ebé Diresaun Prevensaun realiza dadauk ho Diretor Geral Floresta ho estrutura jestor sira iha MAP, Diresaun Prevensaun sei entrega deskobrementu hirak ne’e ba iha Diresaun Investigasaun Kriminal CAC nian hodi halo investigasaun klean liu tan ba prosesu ne’e. Aleinde ne’e, deskobrimentu ne’e sei partilha ho Komisaun Funsaun Públika (CFP) atu hare ba kestaun administrativu ne’ebé kabe ba CFP nian kompetensia.
Kazu indikasaun irregularidades rekrutamentu guarda florestal iha MAP ne’ebé hetan atensaun aas husi públiku, obriga Komisariu Adjuntu Comissão Anti-Corrupção (CAC) ba Asuntu Prevensaun no Sensibilizasaun, Luis de Oliveira Sampaio hodi lidera ekipa Quadrilateral kompostu husi CAC, Comissão Função Pública (CFP), Provedor Direitur HUmanus no Justisa (PDHJ) no Inspector Geral do Estado (IGE) ba hasoru malu ho ekipa juri rekrutamentu nian CAC iha loron Sesta-feira (10/6). (*)
