Comissão Anti Corrupção (CAC) hetan apóiu husi United Nation on Drugs and Crime (UNODC) Segunda-Feira (20/06) ohin hahú realiza formasaun tékniku kona-ba aperfeisoamentu koñesimentu autoridade kompetente iha Sistema rejime Deklarasaun Rendimentu, Bens no Interese (DRBI) ba Espesialista Anti-Korrupsaun (EAK) hamutuk na’in 15 iha salaun Konferénsia Otel Timor-Dili.
Formasaun tékniku ne’e fasilita husi Eis-Juizu Dr. Tilman Hoppe, LL.M, peritu internasional ne’ebé suporta reforma iha nasaun 40 resin iha área prevensaun no investigasaun korrupsaun, espesifikamente ba área Deklarasaun Rendimentu, Bens no Interese sira, iha ne’ebé sei fó formasaun ba Espesialista Anti-Korrupsaun durante semana ida nia laran (20 to’o 24 fulan juñu semana ne’e).
Formasaun ne’e realiza tanba haree ba kompleksidade oioin husi implementasaun rejime Deklarasaun Rendimentu, Bens no Interese sira ne’ebé dadaun ne’e CAC rejista hela ajénte públiku sira nia soin sira.
Kompleksidade iha rejime deklarasaun rikusoin ne’e mós inklui ona ho prosesu kona-ba hala’o verifikasaun formál no auditóriu iha tereñu ne’ebé sei mai, bainhira autoridade responsavel termina simu ajénte públiku sira nia deklarasaun rikusoin ne’ebé sujeita hela ba rejime ne’e iha lei nú. 7/2022-Medida Prevensaun no Kombate Korrupsaun.
Objetivu prinsipál husi formasaun ne’e mak atu mellora ka eleva koñesimentu kle’an Espesialista Anti-Korrupsaun sira nian, liu-liu atu halo kapasitasaun téknika ba ekipa ne’ebé konstituidu iha Deklarasaun Rendimentu, Bens no Interese iha Komisaun, oinsá atu deteta konflitu interese sira no rikusoin sira ne’ebé ajénte públiku sira la deklara.
Komisariu Sergio Hornai iha nia intervensaun hatete, formasaun ne’e esensiál tebes ba Comissão Anti Korrupsaun nia Espesialista sira hodi buka intende liu-tan preseitu sira ne’ebé iha ligasaun ho lei Medida Prevensaun no Kombate Korrupsaun.
Finalidade husi formasaun ne’e mak sei reinforsa servisu Komisaun nian hodi hametin liu-tan ajénte públiku sira ne’ebé haknaar-an iha instituisaun Estadu nia integridade hodi prevene no kombate kriminalidade korrupsaun iha Timor-Leste.
“Hirak ne’e hotu atu hametin integridade no responsabilidade instituisaun sira nian, liu-liu ba ajénte públiku sira atu nafatin iha konfiansa perante iha sosiedade nia laran”, katak Komisario Sergio.
Alende ne’e, Dr. Tilman Hoppe iha nia interevensaun sente orgullu ho vontade politika Timor-Leste nian hodi opta rejime deklarasaun rikusoin nian iha Estadu Timor-Leste, liu-liu Komisaun Anti-Korrupsaun ne’ebé servisu ho boa vontade iha misaun prevensaun no kombate korrupsaun iha implementasaun rejime juridiku ida ne’e nian.
Ba formasaun loron ida ohin, Dr. Tilman Hoppe focus esplika materia sira liga ho prosesu ka etapa sira ba deklarasaun rikusoin ninian, verifikasaun formal ba ajénte públiku sira nia deklarasaun tuir lei nú. 7/2020-MPCC no halo arkivamentu sira.
