Lider Másimu Comissão Anti-Corrupção (CAC) Sergio Hornai no Provedoria dos Direitos Humanos e Justisa (PDHJ) Jesuina Gomes Kuarta-Feira (04/05), lidera sorumutu diskusaun konjunta ho ekipa tékniku sira CAC no PDHJ iha salaun enkontru CAC, Farol Dili.
Sorumutu ne’e nu’udar kontinuasaun husi diskusaun anterior ho objetivu prinsipál hodi diskute kle’an liu tan mekanizmu no estratejia medida sira prevensaun no kontrolu ba atividade implementasaun programa Sesta-Bázika faze daruak ne’ebé VIII Guvernu planeia sei implementa iha tempu besik.
Diskusaun ne’e foku ba medida sira prevensaun nian, iha ne’ebé lideransa másimu CAC no PDHJ ohin delibera ona rezolusaun ida ba Ekipa Tékniku sira atu kontinua diskute ho ekipa operador implementasaun SB faze daruak iha tempu besik hodi akonsella nafatin operadór implementador programa SB atu implementa provizaun sira husi lei ne’e ho loloos, partikularmente providensia dadus ba lista benefisiariu sira ho elijivel no akurasia, estabelese prosedimentu tékniku distribuisaun ninian, no estabelese prosedimentu aprovizionamentu no kontratasaun ba kompaña sira bazeia de’it ba dekretu lei Nú. 10/2022-Medida Implementasaun Programa Sesta-Bázika.
Komisariu Sergio Hornai iha nia intervensaun hatete, CAC no PDHJ tau importánsia másimu ba kontrolu atividade implementasaun programa sesta-bázika no kontinua diskute hodi buka pur menores sira relasionamentu ba monitorizasaun ninian.
“Tau importánsia ba kontrolu no sei fó kontinuidade husi reuniaun sira ne’ebé halo para buka pur menores sira iha relasionamentu ba iha monitorizasaun ninian husi pontu rekomendasaun instituisaun kontrolu nian ba iha orgaun implementador Sesta-bázika”, katak Komisariu Sergio.
CAC sei nafatin uza nia autoridade tuir lei nú 8/2009-Kriasaun KAK iha artigu 5, materia prevensaun nian hodi akonsella parte orgaun implementadór SB faze daruak nian atu prepara kondisaun hotu tuir provizaun sira husi dekretu lei nú 10/2022 antes implementa.
Bainhira la prepara prosedimentu sira ho di’ak hodi implementa ho ansiozu ba programa ne’e mak rezulta poténsia aktus korrupsaun akontese no fó prezuizu ba estadu, CAC sei hola intervensaun imediatu hodi prosesa aktus krime sira tuir dalan legál.
“Sira (Sekretariadu Tékniku) tenke estabelese prosedimentu tékniku, lista benefisiariu no produtu sira ho kondisaun preparadu. Sira tenke kumpre lei ne’e, bainhira implementa ho ansiozu mak rezulta irregularidade no estadu hetan prezuizu mak ita prosesa sira”, Katak Adjuntu Sampaio.
Alein ne’e iha programa monitorizasaun ne’ebé mai, CAC no PDHJ mós sei servisu hamutuk mós ho nia rede no parseria sira hodi reforsa estratejia no mekanizmu kontrolu ida susesivamente, rigor no komprensivu liu tan, liu-liu sei involve parseiru sira sosiedade Sivíl hanesan FONGTIL, Tane Konsumidór no JSMP iha prosesu monitorizasaun ne’e iha tereñu.
