Dili, 29 Abril 2022
Comissão Anti-Corrupção (CAC) nia Diresaun Prevensaun no Sensibilizasaun liu husi Ekipa responsavel ba rejistu Deklarasaun Rendimentu Bens, no Interese (DRBI) hahú implementa Lei nú. 7/2020- Medida Prevenção ão Combate a Corrupção (MPCC) dezde lei ne’e tama iha vigór iha loron 22 Fevereiru tinan 2021.
Ekipa ne’ebé responsavel ba servisu ida ne’e kompostu husi Espesialista Anti-Korrupsaun (EAK) na’in neen (6) ne’ebé lidera husi Xefe Unidade Inspeksaun no Monitorizasaun, Antonino Alves bazeia ba despaisu Komisariu CAC Nú. 01/GC/CAC/II/2021.
Dezde Lei nú. 7/2020-MPCC tama iha vigór, ekipa refere halo ona esforsu lubuk ida hamutuk ho Komisariu, Komisariu Adjuntu sira, no EAK tomak iha CAC hodi sensibiliza lei ne’e ba públiku, produs formulariu arolamentu no plataforma online deklarasaun rikusoin nian, no halo arolamentu ba ajénte públiku sira Estadu nian.
Esforsu sira durante tinan ida, finalmente CAC konsege halo ona lansamentu ba Sistema Plataforma Online Deklarasaun Rikusoin nian iha loron 22 Fevereiu 2022, no Ekipa ne’ebé tutela ba responsavel DRBI kontinua kedan notifika ka envia ona formulariu deklarasaun rikusoin nian ba instituisaun sira ne’ebé CAC rejista ona no sujeita ba rejime Deklarasaun Rendimentu, Bens no Interese (DRBI) ne’ebé haktuir iha lei MPCC, artigu 27-58.
Tuir mai, CAC sei atualiza dadús no informasaun jerál sira ba públiku kona-ba detallu Deklarasaun Rendimentu Bens no Interese (DRBI) nian ne’ebé Ekipa Responsavel DRBI dadaun ne’e rejista hela:
- Dadus Jerál
- Instituisaun sira ne’ebé CAC envia ona formulariu deklarasaun hamutuk 46;
- Deklarante sira ne’ebé notifikadu hodi aprezenta deklarasaun hamutuk 1331;
- Deklarante ne’ebé submete ona deklarasaun hamutuk 1027;
- Deklarante husi Kargu Diresaun no Xefia sira hamutuk 352.
- Informasaun Adisionál
CAC hakarak informa ba públiku katak, Ekipa responsavel DRBI dadaun ne’e kontinua atende deklarante sira nia deklarasaun liu husi esplikasaun Sistema Plataforma online nian ba instituisaun sira ne’ebé sujeita ba deklarasaun nian;
Ekipa responsavel DRBI kontinua atende no fó asisténsia tékniku ba deklarante sira iha edifisiu CAC-C iha Vila-Verde, kona-ba difikuldade ne’ebé deklarante sira hasoru iha sistema online refere hodi deklara sira nia rikusoin;
Ekipa responsavel DRBI nafatin atende deklarante sira nia defikuldade prensimentu deklarasaun via telefonika, Mensajen, Whatsaap, Email no enkontru prezensiál iha tempu servisu nian;
Ekipa CAC ne’ebé responsavel ba servisu rejista no verifika deklarasaun rendimentu bens no interese ne’e sei kontinua disponivel no prontu kualker tempu iha oras servisu nian atu fasilita deklarante sira priense sira nia riku-soin tuir lei haruka.
