Komisariu Comissão Anti Corrupção (CAC) ba Servisu Asuntu Prevensaun no Sensibilizasaun, Luis de Oliveira Sampaio akompaña husi Xefe Unidade Estudu Avaliasaun Rísku Kuarta-Feira (27/04) ohin hala’o sorumutu dikusaun preliminariu ba preparasaun monitorizasaun iha implementasaun programa Sesta-Bázika faze daruak nian ho Adjuntu Provedoria Direitus Umanu no Justisa Jose Cristovão ho nia ekipa iha Edifisiu PDHJ, Caicoli, Dili.
Objetivu husi sorumutu ne’e, ekipa rua hahú diskute no rai idea hamutuk ona hodi prepara no hatuur mekanizmu no estratejia monitorizasaun ida rigór liu antes ekipa tékniku sira husi CAC no PDHJ hamutuk desloka ba tereñu, bainhira programa sesta-bázika hahú lansa no implementa iha tempu besik ne’e.
Ekipa rua diskute mós katak, sei involve parseiru sira sosiedade sivíl, akademiku no estudante sira, inklui média sira hodi unifika forsa hamutuk iha kontrolu sosiál ida forte ba programa ne’e hodi kontrola operadores implementasaun programa SB ne’e bele ezekuta didi’ak osan povu nian ho loloos no responsavel.
Diskusaun ohin loke dalan ona ba ekipa rua sei diskute kle’an liu tan no sei involve dikusaun tuir mai hamutuk ho sosiedade sivíl.
Antes ne’e, Comissão Anti-Corrupção (CAC) lideradu Komisariu Sergio Hornai hamutuk ho Komisariu Adjuntu Luis Sampaio no ekipa tékniku sira EAK nian bolu ona ekipa operador sira no instituisaun nakait sira mai CAC hodi diskute no buka asertasaun.
Iha diskusaun konjunta ne’ebé hala’o iha semana kotuk, CAC aprezenta ona rezultadu monitorizasaun implementasaun programa Sesta-Bázika faze dahuluk nian ne’ebé deskobre iregularidade oioin no hato’o ona rekomendasaun ba instituisaun responsavel sira hodi hadi’a poténsia sira ba rísku korrupsaun nian.
Iha diskusaun ne’ebé hala’o hamutuk ne’e CAC akonsella ona autoridade kompetente sira atu servisu ho loloos, Evita konflitu interese, hatur prosedimentu sira implementasaun nian ho rigór nune’e mós assume sira nia responsavel nu’udar supervisor ba programa ne’e ho responsavel.
Implementasaun programa Sesta-Bázika faze dahuluk nian antes ne’e iha situasaun Covid-19 nia laran, iha ne’ebé kondisaun ne’e la másimu hodi suporta atividade monitorizasaun CAC nian.
Nune’e, ba implementasaun SB faze daruak nian ne’ebé sei mai, CAC hamutuk ho intituisaun kontrolu nakait sira sei halo esforsu másimu hodi halo kontrolu ida rigór iha tereñu.
Bainhira CAC identifika no deskobre aktus sira balun ne’ebé kontribui ba estadu hetan prezuizu, CAC sei la tolera no sei halo intervensaun no atuasaun imediatu iha tereñu. (*)
