Pante Makassar – Suspeitu no familia Jerente Senior Rejiaun Administrativa Espesiál Oecusse Ambeno (RAEOA) Oecusse kolabora di’ak halo fásil ekipa investigador Comissão Anti-Corrupcão (CAC) nian konklui operasaun buska no apreensaun iha oras 12 nian laran. Mandadu ho númeru NUC 0057/21.PDOEC data loron 17/12/2021 ne’e fó orden ba CAC hala’o operasaun durante oras 12 nian laran iha fatin tolu (3) diferente; rezidénsia no garajen kareta Jerente Senior ZEESM iha Sikluli no edifisiu kompaña nian iha Pademau, Pante Makassar.
Ekipa investigador ne’ebé lidera husi Diretor Investigasaun Kriminál (UIK) Emilio Quintas akompaña ho Polisia Nasionál Servisu Investigasaun Kriminál (PNSIK) Nasionál ne’e hahú iha tuku 8;00 OTL dadersan no termina iha tuku 20;00 OTL kalan tuir lei.
Alein de operasaun ne’e hetan kolaborasaun di’ak husi suspeitu na’in rua ho ninian familia, hetan mos akompañamentu prokurador titulár no Juiz Dr. Yudi Pamungkas husi inisiu to’o hodi kalan.
Operasaun buska no apreensaun ida ne’e n’uudar operasaun dahuluk liu CAC halao iha munisipiu sai husi kapitál Dili iha istória CAC nian hafoin estabelese no hahu operasaun iha tinan 2010 liu ba bazeia ba mandatu Lei Númeru 8/2009 15 Jullu.
Iha operasaun buska domisiliaria no apreensaun horseik, investigador CAC sira halibur no prende objetu krimi hanesan dokumentus komprovativus manan projeitu cleaning service iha RAEOA Oecusse, konta bankaria, karreta rua (2), telephone, laptop, osan mean, osan cash ho montante boot, dokumentus kompaña nian, telefone no dokumentus sobre projeitus eletrifikasaun no projeitus balun iha RAEOA/ZEESM ne’ebé suspeitu ho ninian espouza nian kompaña manan nu’udar evidensia no objetivu krimi.
Hafoin investigador sira termina operasaun buska domisiliaria no apreensaun, sei kontinua halo investigasaun maratona ba suspeitu jerente senior RAEOA Oecusse ho ninian espouza no diretor kompaña cleaning service iha edifisiu Prokurador Distritál Oecusse.
Investigador CAC simu mandadu husi tribunál iha loron 5 Janeiru 2022 hodi hala’o operasaun buska no apreensaun. Mandadu Tribunál Distritál Oecusse nian ne’e fó poder mai investigador CAC hodi halo operasaun buska no apreensaun ba suspeitu diretor emprezariu na’in ida (1) hanesan mós subrino husi suspeitu seluk nu’udar Jerente Senior RAEOA/ZEESM ho ninian espouza (co-autor ne’ebé posibilidade bele sai suspeitu) tamba diskonfia envolve iha kazu krime korrupsaun.
Mandadu ba buska iha domisiliariu no prende sasan ne’e juiz haruka no fó orden atu halo buska iha domisiliariu ho posibilidade ba prende sasan ne’ebé mak iha ligasaun ho faktus hirak ne’ebé investiga ona, tuir dispozisaun iha art 37 no nú 2, husi KRTL, iha artigu 226 no 1, al. c) artigu 108 no 1 artigu 170, hotu-hotu husi KPP ba suspeitu ninian hela fatin.
Orden ba halo buska ne’e konsede iha autu inkeritu nian NUC S(ic.NUCNo), hosi ne’ebé investiga dadaun hela suspeitu kona-ba auto krime, p.p husi artigu kodegu penál nian.
Ba kumprimentu efetivu ba mandadu ida ne’e iha autorizasaun ba asesu iha dependensia hotu-hotu, inklui kofre, fatin hirak rai sasan nian, veiklu hirak ne’ebé uza husi suspeitu, bele fera odamatan, hakat sa’e husi moru no neutraliza animál sira, se presiza duni, ho observansia ba dispozisaun iha artigu 169 no 170 husi KPPTL.
Operasaun loron ohin ekipa investigador CAC nian hala’o iha Zonas Espesiais de Economia Sosiál de Mercado de Timor-Leste tamba iha indisus forte arguidu sira komete kazu krimi brakamentu kapitais (art 313 Kodigu Penal Timor-Leste KPTL), kazu krimi korrupsaun pasiva no krimi korrupsaun aktiva akontese iha área juridiksaun RAEOA Oecusse nian. (*)
