Lahane- Diretor Prevensaun no Sensibilizasaun Comissão Anti-Corrupção (CAC) nian Rosario Araujo hamutuk ho Espesialista Anti Korrupsaun (EAK) Sexta-Feira (14/01) sai formadór iha eventu formasaun futuru lideransa ba Parlamentu Foinsa’e tinan 2021 nian hamutuk na’in 100 liu iha resintu Kampus ICR Lahane Dili.
Materia formasaun mak “Papel Foinsa’e sira ba prevene no kombate korrupsaun iha Timor-Leste”.
Diretor Rosario hateten papel foinsa’e sira mak atu sai ajénte ba transformasaun idea emansipasaun sosiál no kontrolu sosiál ba dezenvolvimentu nasionál inserteza sira hodi lori moris di’ak ba sosiedade.
Transformasaun sosiál katak ema ida idak tenke hahú transforma nia mentalidade no hasa’e nia konsiensia ba lia loos ne’ebé absolutu. Transforma-an tenke iha obrigasaun morál atu bele transforma mós konsiénsia familia, nune’e bele iha integridade ida aas ho responsabilidade boot perante iha sosiedade.
“Papel foinsa’e mak agent of change ka ajente ba transformasaun dezenvolvimentu sosiál. Transformasaun ne’e ita tenke hahú ho buat ki’ikoan mak ba boot. Importante mak tenke transforma familia nia konsiensia ida aas hodi kuda kultura onestidade iha sosiedade nia laran,” Katak Diretor Rosario.
Transforma sosiedade ba moris foun ida prosperu katak Rosario tenke kuda kultura lee no hakerek iha ida idak nia-an, familia no sosiedade. Kuda kultura lee no hakerek de’it mak bele lori sosiedade sai sivilizadu, hatene rai sasan sira hotu iha nia fatin.
Foinsa’e sira tenke hadook no hasees-an husi kultura konformista ne’ebé husik sosiedade sai atan beibeik ba ordem sosiál ne’ebé iha. Katak labele hanoin de’it mak eksplora inan-aman nia osan ba facebook, whatsaap, kan no satisfasaun ba sasan no hahan ne’ebé la hotu. Maibé, tenke fó-an barak ba lee livru, peskiza, hakerek ba problema sosiál ne’ebé invade sosiedade.
Foinsa’e sira tenke organiza malu lee no hakerek, no tenke iha pensamentu ida kritiku no analitiku hodi diskute asuntu sosiál sira ne’ebé iha.
“Imi tenke diskute tansá bee moos la iha, uma la iha, estrada aat, ahi la lakan, eskola kondisaun la di’ak, kondisaun saude no nutrisaun sosiedade nian la di’ak. Osan estadu nian ne’ebé kada tinan aloka ne’e ba ne’ebé? imi tenke hatene buat sira ne’e,” Rosario subliña.
Rosario afirma katak papél foinsa’e sira ba prevene korrupsaun mak tenke prevene-an uluk husi uma laran. Sé inan aman haruka ba sosa sasan ruma iha loja ka kios ruma tenke sosa ho loloos no relata mós ho loloos.
“Inan-aman haruka ba sosa sasan karik jujur ba. Labele ba sosa supermi $ 0.25 sentavus nian sai fali $ 0.50 sentavus. Sé imi toman ho valór sira honestidade nian, aban bainrua sai lider imi hatene ona prevene aktus korrupsaun nian, no imi iha integridade ida aas”, afirma Diretór Rosario.
Formasaun ne’e sei kontinua to’o loron tersa-feira (18/01) semana oin ho paper ne’ebé la hanesan. (*)
