Dili – Ohin Sesta-feira(4/4), Commição Anti-Corrupção (CAC) realiza seminariu loron sorin iha Universidade Násional Timor-Leste (UNTL) Fakuldade Ekonomia ne’ebé universitariu kuaze nain 200 resin ho antisiasmu partisipa iha seminariu ne’e ho orador principal Komisáriu Adjuntu Manuel Bucar Corte Real.
Semináriu ne’e hanesan meius sosializasaun papel CAC ba estudantes iha teritoriu tomak husi eskola baziku to’o universidade ho topiku “Onestidade Nu’udar Xavi Ba Estudante Sira Atu Hado’ok-An Husi Korrupsaun” ne’ebé knar ne’e ekzekuta husi diresaun Edukasaun e Peskiza.
Objetivu principal CAC halao seminariu iha universidade atu esplika ba universitariu sira misaun no vizaun CAC nian. Universitariu nudar lideransa nasional iha future presija konhese orgaun Estadu independente CAC ne’ebe halao misaun mak; Prevensaun Krimi Korrupsaun, Edukasaun e Peskiza no Investigasaun Krimi Korrupsaun.
Iha seminariu ne’e Komisáriu Adjuntu Bucar esplika kona-ba direitu no dever jerasaun foun ka universitariu sira nudar lideransa nasional iha future atu estuda didiak hodi mantein atetudade diak nudar estudante ho responsabilidade boot ba povu no nasaun. Adjuntu Bucar mos esplika kona-ba Timor-Leste nian rekursu naturais hanesan mina rai no gas iha Tasi Timor laran hanesan riku soi Estadu atu jestor Estadu bele utiliza didiak ba prosperiedade povu no nasaun.
“Dever ho obrigasaun universitariu sira nian mak estuda no domina siensia atu servi povu no nasaun dobben Timor-Leste laho korrupsaun. Ho siensia mak universitariu sira prontu dezenvolve siensia jestaun atu promove luta kontra korrupsaun no hamrik atu infrenta solusiona konkretas problema,” Katak Komisariu Adjuntu Bucar.
Seminariu ne’e taka ho sesaun perguntas no resposta iha ne’ebé universitariu sira hato’o perguntas mesak kritiku no konstrutivu ba instituisaun CAC nian diak iha future. Partisipa iha seminariu ne’e mak Vise Dekanu Filipe Mendes Pereira, Longuinhos dos Santos no dosentes Fakuldade Ekonomia UNTL.
Tinan ne’e tomak, CAC sei kontinua halao seminar ho future lideransa TL nian atu esplika ba sira kona-ba konhesimentu no oin sa atu kombate korrupsaun iha Timor-Leste. (*)
