Dili – Ohin Tersa-feira (4/3), Komisáriu Comissão Anti-Corrupção (CAC) Adérito de Jesus Soares hato’o relatóriu annual 2013 nian ba Parlamentu Nasionál (PN) akompaña husi Komisáriu Adjuntu nain rua José de Jesus Neves, Manuel Bucar Corte-Real, Sekretáriu Ezekutivu Alexandre Freitas, direitores no staff balun.
Aprezentasaun relatóriu annual tinan 2013 ho nian pajinas hamutuk 33 ne’e ba Dahat ka dala ikus ba Komisáriu CAC, Adérito de Jesus Soares hafoin nian mandatu remata nudar Primeiru Komisáriu CAC TL nian iha loron 22 Fevereiro 2014.
Komisáriu Adérito Soares rejeita ba segundu mandatu no hato’o karta offisial ba Prezidenti PN Vicenti da Silva Guterres hodi PN nomeia Komisáriu CAC foun. Komisáriu Soares sei kontinua fali nian estudu doutoramentu iha Australia ne’ebe interope tiha durante tinan hat nian laran hodi servi povu no nasaun Timor-Leste hanesan Komisáriu CAC.
Primeiru Mandatu Komisáriu CAC Adérito Soares lidera instituisaun foun ba esforsu luta kontra krimi korrupsaun ne’e hahu husi zero iha loron 22 Fevereiro 2010 hamutuk ho Komisáriu Adjuntu nain rua durante tinan hat ho espetativa husi povu ne’ebe a’as tebes konsege halo investigasaun kriminal korrupsaun balun no ezekuta programa edukasionál hodi halao sorumutu no workshop ne’ebé involve rihun ba rihun estudantes, lider komunitáriu, konfisoens relijiosas no funsionáriu Estadu iha teritoriu tomak ho diak.
Iha Komisáriu Adérito nian mandate, CAC investigate no akuza ona offisiais governu nivel a’as lubun balun ba krimi korrupsaun, simu despaisu husi Ministeriu Públiku ba kazu hamutuk 73 ne’ebe CAC investiga no kompleta ona relatoriu hamutuk 69 kazus korrupsaun. Halao sorumutu ka workshops liu 100 iha teritoriu tomak hanesan parte edukasaun kampanha. Kompleta ona relatoriu tekniku lubun ida unklui monitor persepsaun korrupsaun nasaun no peskiza integridade ba seitor publiku.
Maske hasoru dezafius oin-oin Komisáriu Adérito de Jesus Soares konsege estabelese rede servisu diak ho entidades tomak iha TL; governu, PN, medía, ONG no liga instituisaun CAC ba ajensia anti-korrupsaun nasaun seluk hanesan Indonesia, Malaysia, Singapura, Hong Kong, Australia, Amerika no nasaun seluk iha rede internasionál ba luta kontra korrupsaun liu fronteira nasaun. Dirijente Senior no staff CAC nian mós partisipa ativa iha konferénsia no treinamentu iha rai laran no rai liur.
Durante mandatu tinan ha’at Komisáriu Adérito Soares hamutuk ho Komisáriu Adjuntu nain rua mós lori CAC halo servisu ativamente ho ajénsia internasionál ba programa luta kontra korrupsaun; UNODC (United Nations Organization of Drugs and Crime), UNDP (United Nation Development Programme), FOTI-USAID (Fostering Transparency and Integrity-United States Agency of Aid and Development.
Maske otas instituisaun CAC sei nurak, Primeiru mandatu Komisáriu CAC konsege hetan fiar husi komunidade internasionál hodi halibur ajensia anti korrupsaun husi nasaun seluk hamutuk 29 iha Konferénsia Internasionál; 18th Steering Group Meeting and 12th Regional Seminar, ADB-OECD Anti-Corruption Initiative For Asia and the Pacific iha Dili iha fulan-Julhu 2013 no representa ADB-OECD apresenta relatório iha Konferénsia UNCAC (United Nations Convention on Anti-Corruption) iha Panama iha fulan-Novembru 2013.
Lideransa diak Primeiru Mandatu Komisáriu CAC nian hodi lidera Instituisaun CAC husi zero ho naran morin iha TL no iha mundo internasionál sei fasil liu ba Komisáriu foun kontinua servisu diak ne’e iha futuru.
Parlamentu Nasional oras ne’e dadaun iha prosesu atu hili Komisáriu CAC foun atu atinji objetivu 2020 Comissão nian iha segundu mandate Komisáriu nian. (*)
