Dili – Komemora aniversario Comissão Anti Corrupção (CAC) ba Daha’at iha loron 22 Fulan Fevereiro ne’e CAC halao kompetisaun journal parede ba estudantes Ensino Sekundaria Publiku no Privado iha capital Dili iha loron Kuarta-feira (19/2) ho topiku “Integridade Hanesan Xave Ba Luta Kontra Korrupsaun” iha Konventu Madre Canossiana Becora.
Objetivu husi kompetisaun jornal parede nebe organiza husi Diresaun Edukasaun e Peskiza (EP) lidera husi Diretor Rosario Araújo ne’e atu hakbi’it konhesimentu estudante ensino sekundaria iha area etika no valor hodi prevene no kombate korrupsaun no mos hakbi’it abilidade hakerek estudante sira nian.
Komisáriu Adjuntu Edukasaun e Peskiza (EP) José Antonio de Jesus das Neves iha nia lian nakloke hateten atividades CAC durante ne’e sempre involve estudante tamba estudante hanesan elementu importante iha sosiedade nebe mak iha future sei hakat ba kaer pasta Estadu nian.
“Tamba ne’e mak CAC involve estudante sira iha atividades sira hanesan ne’e hodi kuda sedu sentidu kombate korrupsaun iha sira nian fuan ho laran hanesan prosesu formasaun ba jerasaun foun hodi evita an husi pratika korrupsaun,” Katak Komisariu Adjuntu Neves.
Eskola sekundaria nebe tuir kompetisaun iha tinan ne’e mak Colegio Paulo VI, Seminario Menor Nossa Senhora de Fatima Balide, Eskola Sekundaria Coração de Jesus Becora, Eskola Sekundaria Canossa Has Laran no Eskola Sekundaria Kristal Balide. Kada eskola reprezenta estudante hamutuk nain walu no ekipa jure ba kompetisaun ne’e mak Dede Figueiredo editor Jornal Independenti, Chefe editor Jornal Timor Post, Rita Almeida no jornalista UCAN, Thomas Ora. (*)
