Dili, 5/12/2012— Molok tama ba loron Internasional Kontra-Korrupsaun nebé monu iha loron 9 fulan Dezembru 2012, Komisaun Anti-Korrupsaun organiza eventus komemorativu simultaniamente iha distritu tolu, Lospalos, Oecusi no Aileu. Festa komemorasaun loron kontra-korrupsaun ne’e hatudu ho hala’o seminar loron sorin kona-ba sosiedade nia involvimentu iha luta hasoru korrupsaun , aprezentasaun filme dokumentariu kona-ba utilizasaun transporte públiku no aprezentasaun arte no kultura.
Tema nebe CAC hili hodi komemora loron internasional kontra korrupsaun tinan ida ne’e mak: “Valoriza Povu Nia Luta, Hodi Liberta Timor-Leste Husi Korrupsaun”.
Wainhira koalia ba partisipantes atus tolu resin nebé partisipa iha seremonia komemorasaun loron anti-korrupsaun ne’e, Komisáriu CAC Adérito de Jesus Soares hatete katak korrupsaun iha Timor-Leste la’os hahalok abstráku ida maibe hahalok konkreta, ne’e afeta povu nia moris loron-loron no estraga planu dezenvolvimentu nasional. Povu tomak tenki servisu hamutuk luta hasoru korrupsaun, povu tenki dehan LAE ba korrupsaun liu husi sira nia hahalok no atitude diak.
Selebrasaun iha distritu Lospalos hetan akompanyamentu husi Komisáriu Adjuntu ba Asuntu Prevensaun Manuel Bucar Cotinho Corte-Real no iha distritu Oecussi husi Komisáriu Adjuntu ba Asuntu Edukasaun Kampanya no Peskiza José de Jesus das Neves. Ofisias governu nian seluk husi nivel nasional nebé CAC konvida ba selebrasaun iha distritu mak Komisáriu Funsaun Públika Liborio Pereira ba Aileu no Inspeitor Jeral Estadu Francisco de Carvalho ba Lospalos.
Eventus simultánia iha distritu tolu ne’e hetan atendementu no apresiasaun diak tebes husi populsaun, ofisiais distrital inklui reprezentantes husi Igreija, eskola no lideres komunitária sira. Tuir informasaun katak ema kuaze rihun ida resin mak partisipa iha komemorasaun simultania Loron Internasional Kontra-Korrupsaun ne’e.
Iha kapital Dili, selebrasaun ba loron internasional ne’e ne’e tuir planu sei halo iha loron 9 fulan Dezembru 2012 iha Largo Licidere, Dili hahu husu tuku 2:30PM.
Iha Dili, antes ne’e, Komisaun Organizadora sira organiza eventus lubuk ida hodi komemora loron internasional ne’e. Eventus komemorativu sira ne’e inklui debates interaktivu nebé involve reprezentantes husi governu no sosiedade sivil, apelu husi Prezidente Repúblika, Primeiru Ministru, Bispo Dioseze Baucau, nune’e mos nudar Prezidente Konferensia Episkopal Timor-Leste nian no Komisáriu CAC, kompetisaun sertame ka kadi-kakutak husi estudantes sekundária sira, diskursu públika entre studantes universitária no jornal parede kona-ba asuntus korrupsaun no anti-korrupsaun entre estudantes pre-sekundária sira. Ba sira neb’e mak manan, sei simu prezente iha festa selebrasaun iha loron Domingu ne’e. Hein katak selebrasaun iha Dili sei hetan partisipasaun bo’ot husi públiku sira.
