Dili-18/07/2012—Dirijente Senior Komisaun Anti-Korrupsaun (CAC) horiseik partisipa iha sesaun lubuk ida kona-ba Timor-Leste nia jestaun finanseira públiku iha Salaun Konferensia Ministériu Finansas. Sesaun nebe prezide husi Ministra Finansas Emilia Pires mos partisipa husi Prezidente Tribunal Rekursu/Tribunal das Contas Claudio Ximenes no nia ekipa.
Sesaun sira nebe hala’o durante loron sorin-baluk ne’e organiza husi Ministériu Finansas hamutuk ho Gabinete Primeriu Ministru ho nia objektivu atu CAC no Tribunal das Contas atu aprende no hatene liu tan kona-ba oinsa fundus governu nian durante ne’e jere ba dezenvolvimentu nasional. Nunemos, sesaun sira ne’e bele tulun informa instituisaun rua ne’e atu hala’o sira nia servisu vijilansia ba fundus públiku no investigasaun nian ho diak no efektivu liu tan.
Sesaun lubuk ida ne’e uluk nanain hahu husi Ministra Pires nebe nia koalia kona-ba responsabilidade jeral Ministériu Finansas nian relasiona ho jestaun finanseira fundus estadu nian no tuir fali mak husi Diretor Orsamentu Orsamentu Nasional nebe koalia konaba prosesu orsamental, Diretor Aprovizionamentu Nasional kona-ba asuntus aprovizionamentu governu nian, Diretor Ajensia Dezenvolvimentu Nasional kona-ba prosesu kontratu no tenderizasaun ba projetu konstrusaun públiku sira no Diretor ba Project Bo’ot konaba projetu konstrusaun bo’ot hanesan estrada, ponte no portu sira.
Iha semana hirak mak sei iha tan sesaun balu konaba portal transparansia governu nian nebe sei informa konaba jestaun finanseira governu nian.
Dirijente Senior CAC nebe partisipa iha seseaun ne’e mak Komisáriu CAC Adérito de Jesus Soares, Komisáriu Adjuntu ba Prevensaun Manuel Bucar, Komisáriu Adjuntu ba Peskiza, Edukasaun no Kampaña José António de Jesus das Neves. Partisipantes seluk husi CAC mak Sekretáriu Ekzekutivu Alexandre Faustino Freistas, Diretora Nasional ba Unidade Investigasaun Maria Vasconcelos, investigadores na’in tolu no staff na’in tolu husi Unidade Prevensaun no Gabinete Komisáriu.
