Diretor Geral Rosario Husu Estudantes ES 20 Setembro Metinaro Valoriza URA ho Ispiritu Kontra Korrupsaun

Metinaru- Diretór Jerál (DG) Diresaun Prevensaun no Sensibilizasaun (DPS) iha Comissão Anti-Corrupção (CAC) Rosario de Araujo Salsinha husu ba Ensinu Sekundáriu 20 Setembru Metinaro Dili iha loron Kinta-feira (3/2) atu labele kria hahalok diskriminativu iha eskola nu’udar fatin aprendizazen.

Tamba, mentalidade no hahalok sosiedade Timorense hanesan familiarizmu, grupuizmu, sukuizmu, regionalizmu no to’o ba rasizmu sira ne’e sei la valoriza espiritu ukun rasik-an no espiritu luta kombate korrupsaun.

Diretór Jerál Rosario husu ba alin estudante sira ho idade sei nurak atu valoriza Ukun Rasik-An ho ispiritu luta kontra korrupsaun no fó importánsia ba hanoin no hahalok di’ak sira hodi sai toman diak iha moris lor-loron nian. Toman di’ak ho moris onestu, akuntavel no kredibilidade diak sei lori ba iha nivel edukasaun ensinu superior no mós bainhira gradua no fila fali ba sosiedade.

“Estudante sira tenke hatene komporta tempu eskola no simu responsabilidade nu’udar estudante ne’ebé iha kreatividade, inovativu no produktivu. Fó-an halo traballu ne’ebé manorin sira fó atu nune’e iha future sai funsionariu ka lider politiku ida hatene ona halo servisu hodi serví povu ba bem estar ema hotu nian sem halo diskriminasaun,” Katak DG Rosario ba alin estudantes sira iha Metinaro.

Estudantes sira katak DG Rosario bainhira hatoman-an ona ho hanoin patriotizmu mak patriotas jerasaun foun Timorense ne’ebé oras ne’e sei hala’o hela estudu iha nível edukasaun ensinu sekundariu no ensinu superior sira bainhira fila ba ninian sosiedade sei serví povu la haree ba kór, rasa, status sosiál no afiliasaun polítika.

Diretór Jerál Rosario hatutan liu tan katak, estudante Timorense sira tenke iha ona vizaun di’ak ba ninian an no ba ninian povu doben Timor-Leste. Tamba, estudante nu’udar futuru nasaun tenke iha ona hanoin ba futuru ida konkretu. Hanoin konkretu ida katak DG Rosario mak luta kontra korrupsaun.

“Alin estudantes sira estuda hela iha banku eskola tenke iha ona mehi ba ninian-an rásik, ba povu no ba nasaun doben Timor-Leste! Hanoin ida ne’ebé loloos ba povu no nasaun iha futuru la’os atu hariku-an ho familia. Maibé, mehi ba povu hotu-hotu nia moris di’ak, igualidade iha ekonomia, sosiál no infraestrutura sira bem komum, atu sai lider ida di’ak hodi lori povu ba moris di’ak mak kumpre ba estuda no laran moos,” DG Rosario salienta.

Diretór Geral Rosario afirma, alin estudante sira nian obrigasaun agora mak tenke fera-ulun no kadi kakutak beibeik tamba estudante mak future nasaun ida ne’e nian. Papel estudante nian iha otas foun sira agora ne’e mak sakrifika-an ho pasensia, laran moos, hatene respeitu no fuan ho kakutak tenke dook husi hahalok ida na’ok nian. Bainhira sai lider iha futuru! Lider ida ne’ebé iha duni kredibilidade no iha integridade boot hodi povu tau fiar no hadomi iha rai ida ne’e hodi lidera sira”.

Diretór Rosario fó hanoin estudante sira katak, estudante ne’ebé hakarak matenek no Aban bainrua sai Lider ne’ebé di’ak tenke lee no hakerek barak. Estudante sé de’it mak lakohi lee no hakerek barak, eskola to’o hotu de’it mós nem hatene buat ki’ikoan ida, no aban bainrua sai lider ida hatene de’it lohi povu, no na’ok povu nia osan ba hariku-an, familia no grupu. (*)

“Estudantes EB Sergio Vieira Nu’udar Futuru TL Tenki Kuda Virtude Onestu no Hakribit Korrupsaun” EAK Mateus Quintão

Becora – Estudantes Ensinu Bázika (EB) Sergio Vieira de Mello Becora Dili nu’udar futuru Timor-Leste (TL) tenki kuda ona virtude onestu no hakribit korrupsaun iha uma laran no iha sosiedade Timorense sedu tamba korrupsaun nudar hahalok dodok no dois ne’ebé afeta negativamente ba kontinuasaun moris nasaun joven TL.

Eespesialista Anti-Korrupsaun (EAK) husi Unidade Promosaun Valór no Integridade (UPVI) iha Comissão Anti-Corrupção (CAC) Sexta-Feira (28/1) semana ne’e koalia ba estudante foun anu lektivu 2022 iha Ensinu Báziku (EB) Sérgio Vieira de Melo Becora Dili wainhira sensibiliza prevene korrupsaun sedu.

Sensibilizasaun prevensaun korrupsaun sedu ne’e nu’udar programa anuál Komisaun nian iha Diresaun Prevensaun no Sensibilizasaun (DPS) ho objetivu prinsipál atu sensibiliza jerasaun foun Timorense nian kona-ba perigu prátika korrupsaun iha sosiedade Timorense hodi afeta at ba destinu nasaun doben Timor-Leste nian futuru.

Programa sensibilizasaun ida ne’e mós atu eduka estudante sira nu’udar futuru lideransa Timor-Leste nian hodi limita prátika hahalok korrupsaun husi ki’ik iha familia laran, eskola no sosiedade hodi nune’e bele kuda kultura rejeisaun korrupsaun forte bainhira simu taru estafeta lideransa nasional iha futuru.

Ba estudante sira, ekipa promosaun valór no integridade ne’ebé lidera husi Mateus Quintão ne’e esplika ba estudante sira oinsá prátika korrupsaun nu’udar aktus negativu ida ne’ebé konsidera hanesan hahalok imorál no la iha étika.

Tan ne’e, estudante sira nu’udar povu rai ida ne’e nian oan no futuru lideransa Timor-Leste tenke edukadu ho valór sira kona-ba étika no morál nian hodi la monu ba tentasaun kamat povu nian osan iha knar fatin,” Katak EAK Mateus Quintão.

Mateus Quintão ilustra korrupsaun nu’udar aktu ida aat, rahun, dodok, no dois iha Timoroan sira nian moris lor-loron. Tamba ne’e, katak Tilman estudantes nu’udar futuru nasaun nian presiza hakribit hahalok aat ne’ebé sei afeta ba ema inan ho aman barak sira nia moris.

Korrupsaun katak EAK Mateus Quintão halo Timoroan sira lakon ninian valór umanidade no valór kulturál sira ne’ebé ita ninian bei-ala sira husik hela mai ita. Timoroan sira liu-liu na’okten sira lakon sira ninian valór ba umanidade tanba ohin loron na’okten sira hahú lakon respeitu, honestu to’o ba responsabilidade.

“Timoroan balun (laos ema hotu) hahú lakon sira ninian respeitu entre ema ba ema, no ema ba sasan. Hahú bosok husi buat ki’ik to’o ba buat boot. Ezemplu simples ida mak sai ukun na’in ida privatiza sasan Estadu nian ba interese privadu, no na’ok osan Estadu nian sei ba defende-an iha tribunál ho meius oioin,” Katak EAK Mateus Quintão ba alin estudante sira.

EAK Mateus Quintão hatutan liu tan rikusoi folin wa’in iha alin estudante no Timoroan sira iha em jerál mak tenke kuda virtude lia loos nian ho fiar, respeitu, honestu, responsavel, akuntavel no hatene distingi sasan sira iha ninian fatin. Nune’e de’it mak sei bele fó esperansa ba malu ho futuru ne’ebé di’ak iha rai doben Timor-Leste.

Labarik estudante sira tenke iha ona sabedoria di’ak husi uma laran no tane-aas étika kona-ba normas sosiál nian. Tanba, aktu korrupsaun akontese ba hahalok sira la obedese ba norma sira hanesan tama eskola la tuir oras no sei sai toman at bainhira sai boot lori nafatin toman at sira to’o ba iha servisu fatin iha futuru.

Labarik estudante sira tenke hatene ona kumpre regulamentu ki’ik sira ne’ebé kuda husi familia no iha eskola. Nune’e iha futuru hatene ona oinsá kumpre no obedese totalmente ba kodigu étika profesionais sira iha servisu fatin, inklui ho lei oan no lei inan sira.

Bainhira labarik sira la edukadu ho normas sira nune’e, nia konsekuénsia aban bainrua sai funsionariu públiku ida, nia hahalok sei hanesan bibi malae ne’ebé hasai husi luhan laran sei halai malandru hodi tama ema nia to’os, natar to’o estraga hahan sira iha kintál laran,” EAK Mateus Tilman Quintão.

Mateus Quintão salienta liu tan katak atu prevene hahalok korrupsaun nian mak labarik estudante sira to’o ema boot sira tenke hatene ona nia dever no edukadu ho normas sosiál no instituisaun sira nian hodi la monu ba hahalok aat sira ne’ebé kontra étika no morál nian iha futuru.

Inklui atu limita hahalok aat sira korrupsaun nian iha futuru, labarik estudante tenke abitua limita ho kan no utilidade ba sasan sira, tanba kan ho utilidade ne’ebé sem fim husi sosiedade ohin loron sai fatór kontribuiente hodi permite beibeik ema kontinua halo korrupsaun.

“No ne’e mós presiza muda métodu hanoin no kria ambiente ida foun ba hamoos hahalok sira la iha étika no morál nian ba labarik estudante sira ohin, nune’e de’it mak bele prevene hahalok korrupsaun nian objetivamente,” EAK Mateus Quintão alerta. (*)

Komisariu Sergio Hornai Partisipa Sorumutu ho PG Adjunta Dra. Remizia no Lider Orgaun Polisiál

Colmera – Komisariu Comissão Anti-Corrupção (CAC) Sérgio Hornai akompaña husi Komisariu Adjuntu Augusto Castro no Diretor Investigasaun José Verdial Kinta-feira (27/1) ohin partisipa iha sorumutu ida ho Prokuradora Geral (PG) Adjunta Dra. Remizia da Silva no lider másimu instituisaun Estadu nakait sira orgaun polisiál; Policia Cientifica Investigação Criminal (PCIC), Polisia Nasional Investigasaun Criminal (PNSIK) no instituisaun governu nian; Inspetor Gerl do Estado (IGE), Imigrasaun, Alfandega no Inspeksaun Jeral Jogus (MTCI) iha gabineti Prokuradora Adjunta Colmera Dili.

Pontus prinispál ne’ebé lider instituisaun nakait sira deskute durante sorumutu oras balun nian laran ohin; efektividades delegasaun kompeténsia husi Ministeriu Públiku ba investigador sira iha orgaun polisiál, oinsá rekolla, kuidadu no asegura kualidade objetu apreensaun no provas sira molok ba to’o iha tribunal no konteudu publikasaun média orgaun polisiál nian durante operasaun buska no apreensaun hodi la viola segredu justisa. (*)

CAC no TIC Kontinua Diskute Plataforma Formulariu Online ba Deklarasaun Rikusoin

Farol – Senior Management Comissão Anti-Corrupção (CAC) lideradu Komisariu Sérgio Hornai hamutuk ho Komisariu Adjuntu na’in tolu; Augusto Castro, Luis De Oliveira Sampaio, Alexandre Freitas ho estrutura Espesialista Anti Korrupsaun (EAK) Sexta-Feira (21/01) ohin realiza workshop kontinuasaun ida kona-ba plataforma formulariu online ba Deklarasaun Rendimentu Bens no Interese (DRBI) ho Ekipa Tékniku Teknolojia Informasaun no Komunikasaun (TIC) iha Salaun enkontru CAC, Farol Dili.

Workshop diskusaun ne’e nu’udar sorumutu ba dahaat ne’ebe ekipa tékniku CAC ho Teknolojia Informasaun no Komunikasaun (TIC) nian lidera husi Diretór Ezekutivu Roberto de Sousa aprezenta mai Senior Management CAC ho Espesialista Anti-Korrupsaun (EAK) kona-ba progressu elaborasaun plataforma sistema deklarasaun online nian.

Objetivu husi diskusaun ne’e mak atu fó sekuénsia no kontinuidade ba aseitasaun sira ne’ebé TIC no CAC iha no servisu balun ne’ebé hala’o ona husi ekipa tékniku intituisaun rua nian atu hetan abordajen ida ba dezenvolvimentu plataforma dizitalizasaun DRBI nian iha ámbitu espiritu lei nú 7/2020 Medidas Prevensaun no Kombate Korrupsaun (MPCC).

Komisariu Sergio iha nia interevensaun lori CAC nian naran fó apresiasaun ba Lideransa másimu TIC ho nia estrutura tomak ba esforsu hotu oinsá bele intende malu hodi tau hamutuk esforsu no hanoin sira kona-ba formula formulariu online nian bazeia ba konteudu lei ninian ba sistema teknolojia.

“Parseria ida ne’e importante tebtebes, mezmu iha instituisaun CAC iha nia servisu informatika rásik, maibé ita presiza instituisaun estadu hanesan TIC para bele apóiu, atu nune’e ita nia baze dadus bele metin, seguransa juridika ida konsolidadu, evita esesu sira balun ne’ebé bele tama halo estragus”, Katak Komisario Sergio.

Diskusaun loron ohin nian, senior management CAC hamutuk ho estrutura EAK la iha objesaun ba konteudu plataforma deklarasaun nian, no sujere de’it ba parte tékniku sira atu halo ajustamentu ba observasaun balun ne’ebé nesesariu.

Parte rua ko’alia mós atu iha tempu badak sei termina aprezentasaun finalidade ba plataforma formulariu online refere husi TIC mai CAC hodi prepara ba lansamentu deklarasaun rikusoin iha tinan ne’e.

Alein ne’e, parte rua mós diskute hamutuk sustentabilidade kona-ba hametin lasu kooperasaun entre TIC ho CAC iha futuru, katak sei formaliza akordu nota de intendimentu (MoU) ida, hodi haforsa liu tan servisu instituisaun rua nian iha aspektu infraestrutura teknolojia no informasaun ninian.(*)