Ekipa Comissão Anti-Corrupção (CAC) lideradu Komisariu Adjuntu Prevensaun no Sensibilizasaun Luis de Oliveira Sampaio akompaña husi Xefe Unidade Kooperasaun (UK) no Xefe Unidade Estudu no Avaliasaun Rísku (UEAR) Kuarta-Feira (01/06) ohin hala’o sorumutu kortezia ho Prezidente Instituto Nasional Ciência no Tecnologia (INCT) Timor-Leste ho nia Ekipa, iha edifisiu INCT, Infordepe Dili.
Objetivu husi sorumutu kortezia ne’e hodi ko’alia kona-ba lasu kooperasaun entre instituisaun rua. Partikularmente, sei servisu hamutuk iha área estudu no peskiza sira kona-ba rísku korrupsaun ninian. CAC noINCT iha soruutu ne’e partilla informasaun institusionál ba malu, esplora ideano buka asertasaun sira kona-ba área kooperasaun hodi realiza programa estudu no peskiza sira ne’ebé CAC planeia sei implementa iha tempu besik.
Komisariu Adjuntu Luis de Oliveira Sampaio introdus ba Prezidente INCT ho nia Ekipa Tékniku sira kona-ba servisu sira CAC nian iha área prevensaun korrupsaun. CAC iha Unidade Estudu Avaliasaun Rísku Korrupsaun ne’ebé partikularmente foku ba hala’o estudu, peskiza no halo analiza sira relasionamentu ho rísku sira korrupsaun iha setór públiku.
CAC ho inisiativa buka koopera besik ho INCT atu estabelese MoU hodi tulun halo estudu no peskiza ba asuntu sira hanesan; a) Hala’o peskiza ba persepsaun públiku kona-ba korrupsaun no nia efeitu sira; b) Hala’o peskiza ba instituisaun públiku sira kona-ba integridade ajénte públiku sira hodi promove boa governasaun; no c) Halo estudu no peskiza siéntifiku liu tan ba rísku sira korrupsaun iha desizaun politika públika iha setór públiku en
relasaun ho estabelesimentu lei no dekretu lei husi poder politika sira.
Alende ne’e, CAC mós husu Prezidente INCT ho nia Ekipa atu apoiu asisténsia téknika balun kona-ba fó formasaun tékniku no melloramentu iha área estudu no peskiza ninian ba Espesialista Anti-Korrupsaun (EAK) sira iha CAC.
Rezultadu diskusaun ohin, Ekipa INCT hatudu sira nia prontidaun no prontu servisu hamutuk ho CAC hodi estabelese Memorandu of Understanding (MoU) ida hodi servisu hamutuk ba dezenvolve área estudu no peskiza sira ba rísku korrupsaun iha setór públiku hodi prevene no kombate krime korrupsaun iha Timor-Leste.
Ba sorumutu kontinuasaun, CAC no INCT sei kontinua komunika ba malu hodi fó kontinuasaun ba diskusaun kle’an hodi esplora tan área kooperasaun sira no realiza pontus konsiderasaun ne’ebé aserta ona.
