Komisariu Comissão Anti-Corrupção (CAC) Sergio Hornai akompanha husi Komisariu Adjuntu ba Prevensaun no Sensibilizasaun (DPS) Luis Sampaio hamutuk no ekipa Espesialista Anti-Korrupsaun (EAK) iha loron Sesta-feira (2/12) semana ne’e realiza seminariu loron sorin ba kuadrus politikus importante Partidu Demokratiku nian iha Sede PD Colmera Dili.

Seminariu loron sorin ne’e realiza hafoin atividade semana anti-korrupsaun iha ambitu komemorasaun Loron Mundiál Anti-Korupsaun tinan 2022 hanesan CAC halao tiha ona iha rezidensia KOnseleiru Maksimu Partidu KHUNTO nian Naimori Bucar iha Manleuana Sabado Semana kotuk.

Programa semináriu loron sorin ho tema, “Promove Partisipasaun Partidu Polítiku Iha Politika Estadu hodi Prevene no Kombate Korrupsaun liu husi Lei MPCC” ne’e hahu ho kanta Hino Nasional Patria Patria husi Prezidenti PD ho estrutura no kuadru partidu polítiku PD nian hamutuk ho KOmisariu no KOmisariu Adjunto CAC.

Objetivu husi sensibilizasaun ba partidu polítiku sira atu promove partisipasaun públiku ida poderozu liu-tan hodi unifika forsa hamutuk nu’udar movimentu nasionál ida iha asaun ne’ebé rigór ba luta prevene no kombate korrupsaun iha TL.

Komisaun organizadora ba eventu komemorasaun Loron Mundiál Anti-Korrupsaun sei realiza iha dia 9 Dezembru fulan ne’e hodi konsentra hala’o konsensializasaun ba kuadrus partidu politikus sira ne’ebe hetan asentu iha PN.

Programa sensibilizasaun lei MPCC loron sorin ne’e, Komisariu Adjuntu Prevensaun no Sensibilizasaun, Luis Sampaio fokus esplika medida sira prevensaun krime korrupsaun nian ba estrutura no kuadrus sira partidu PD nian nudar polítika Estadu ba Estratéjia Nasionál Anti-Korrupsaun (ENAK), rekrutamentu servidor povu iha setór públiku, kódigu kónduta ba ajénte públiku, publisidade no transpar’ansia kona-ba aprovizionamentu iha setór públiku, simplifikasaun ba prosedimentu administrative sira, inklui rejime deklarasaun rendimentu, bens no interese nian. (*)