CAC Hala’o Kampaña Matéria Anti-Korrupsaun no Sosializasaun Lei MPCC Iha PA Luro

CAC Hala’o Kampaña Matéria Anti-Korrupsaun no Sosializasaun Lei MPCC Iha PA Luro

Comissão Anti-Corrupção (CAC) liu husi Diresaun Prevensaun no Sensibilizasaun (DPS) lidera husi Komisariu Adjuntu Luis Sampaio hamutuk ho Xefe Unidade Promosaun, Valór no Integridade (UPVI) Leonilda Lobato no ekipa Espesialista-Anti-Korrupsaun (EAK) iha Tersa-feira (06/09) ne’e realiza kampaña maréria anti-korrupsaun nian no sosializasaun lei nú 7/2020-MPCC ba Funsionáriu Públiku no Autoridade Lokál sira iha Postu-Administrativu Luro, Munisipiu Lautem.

Komisaun foti oportunidade hodi ba hala’o atividade sensibilizasaun iha Postu Administrativu Luro ne’e nu’udar atividade anuál Komisaun nian oinsá lori besik misaun prevensaun korrupsaun ba iha servidór públiku iha PA no Munisipiu hodi hamutuk ho CAC luta hasoru hahalok korrupsaun iha TL.

Komisaun hala’o servisu ofisiál iha bairo rai-ulun ne’e partikularmente fanu Autoridade Lokál sira nia konsiénsia iha PA Luro oinsá mak revitaliza fila-fali kustume rejeisaun korrupsaun nu’udar kultura Timoroan sira nian iha pasadu, no vizita fila-fali virtude, métodu no prinsipiu luta sira uluk nian hodi hamutuk luta hasoru inimigu komum krime korrupsaun iha ‘sosiedade atinjimentu’ ne’e.

Komisariu Adjuntu Sampaio ko’alia ba Autoridade Lokál sira ne’ebé barak nia status sosiál nu’udar veteranus iha rezisténsia atu hamutuk ho CAC kontribui iha luta hasoru krime korrupsaun hodi lori moris di’ak ba povu nu’udar kompromisiu luta na’in eroiku sira uluk kona-ba oinsá atinje mehi libertasaun povu nian.

Adjuntu Sampaio hatete, Estadu sei presiza no ezize ema hotu-hotu nia kontribuisaun, liu-liu veteranu/a sira nia involvimentu iha misaun libertasaun povu ohin loron hodi hatan ba dezenvolvimentu nasionál ida ne’ebé iguál, sem riku ba ema oituan no ki’ak barak iha sosiedade.

“Señor veteranu sira nia kontribuisaun iha luta Ukn-Rásik-An la to’o de’it ida ne’e. Nasaun nia destinu ne’e la hotu, kuandu ita sei moris luta ne’e sei kontinua, tanba ne’e konvida ita boot sira, ezize ita boot sira atu hamutuk ho CAC luta hasoru korrupsaun”, Katak Adjuntu Sampaio.

Adjuntu Sampaio ko’alia mós ba funsionáriu públiku no autoridade lokál sira katak, Timoroan sira nia esforsu ba luta ukun-rásik-an ne’e sosa ho isin, ruin no rán, tanba ne’e tenke hatudu ba rai seluk katak Ukun-An di’ak liu no vontade Timoroan sira nian mak hakarak lori duni moris di’ak ba povu ida ne’e la hó hahalok korrupsaun.

“Ita tenke hatudu ba nasaun seluk katak, ukun-an di’ak liu, no ita tenke hatudu mós ba sira katak, ita bele esforsu ba prevene no kombate inimigu korrupsaun”, Adjuntu Sampaio afirma.

Enkuantu iha programa sensibilizasaun durante semana ida iha PA Luro, Komisaun hala’o mós sensibilizasaun matéria sira anti-korrupsaun nian ba estudante no professor/a sira iha ensinu sekundáriu no grupu joventude sira.