CAC Diskorda Proposta Alterasaun Lei Nu. 8/2009 iha Audiensia Públika Komisaun A PN

CAC Diskorda Proposta Alterasaun Lei Nu. 8/2009 iha Audiensia Públika Komisaun A PN

Lider Masimu Comissão Anti-Corrupção (CAC) Komisariu Sergio Hornai hamutuk ho Komisariu Adjuntu Alexandre Freitas, Augosto Castro, Luis Sampaio no asesor sira Kuarta-feira (29/2) semana neʾe, kumprimenta konvite Prezidenti Komisaun A PN hodi partisipa iha audiensia públiku kona-ba Projeitu Lei Nu. 53/V (5) 2 Alterasaun Lei Nu. 8/2009 15 Jullu kona-ba Kriasaun CAC iha Sala Konferensia Dili.

Prezensa CAC nian iha PN atu hato’o Komisaun nian pareser ba alterasaun Daruak Lei Nu. 8/2009 artigu rua (2); artigu 7 kona-ba hili Komisariu/a no artigu 11 kona-ba Komisariu ninian mandatu.

Iha Komisaun A PN, Komisariu Sergio Hornai diskorda proposta deputadu proponente ba alterasaun Lei Nu. 8/2009 no husu la halo alterasaun ba artigu rua deʾit maibé se halo alterasaun tenki halo alterasaun transversal hodi nune’e Lei Nu. 8/2009 bele reflete halo komplementar ba iha Lei Nu. 7/2020 MPCC ne’ebé haraik poder mai CAC eleitu hodi halaʾo servisu ho prudente hasees an husi interese pesoal no partidaria.

Komisariu Sergio hamutuk ho eis-Komisariu CAC Adérito Pinto Tilman afirma, tamba sa tenki halo alterasaun ba Lei Nu. 8/2009 iha tempu ikus atu deputadu lejislatura tuan sira atu termina ona mandatu. Alterasaun ne’e la garante seguransa juridiku ba Komisariu foun no alterasaun tenke haree ba interese estadu.

Tamba ne’e, Komisariu Sergio hamutuk ho eis-Komisariu CAC Adérito Tilman husu ba politiku naʾin iha Uma Magna PN atu tetu didiʾak, prudente, humildade, paisaun no iha responsabilidade hodi la halo alterasaun iha imomentu ida ne’e.

Lei Nu. 8/2009 rekere Komisariu ida atu tenki iha rekezitus; tenke rekoñesidu iha independência aas, iha integridade no imparsialidade, la iha interese partidaria no iha kualifikasaun aas hodi tane aas interese komun. Lei Nu. 7/2020 MPCC – Medidas Prevensaun no Kombate Korrupsaun (MPCC) mai halo check and ballance ba implementasaun kompleta lei ida ne’e.

Komisariu Sergio fó hanoin ba deputadu sira iha Uma Magna PN presiza halo ezame konsiensia no reflesaun kleʾan molok halo alterasaun, tamba konensaun UNCAC nian rekere mós Timor-Leste nu’udar Estadu Parte atu regularmente halo avaliasaun espozisaun no ordenamentu juridiku sira.

“Se hakarak halo alterasaun! Tenki halo alterasaun transversal la’os ba artigu rua (2) deʾit. Ba halo alterasaun artigu 11 haʾu la iha objesaun maibé ba artigu 7! Hau Sergio la fo ulun. Nai politikus sira bele halo ba! Hau koʾalia ho lian aas oituan tamba haʾu nian domin ba nai deputadu sira ne’ebé halo, halo ho prudente no labele ho ansiozu.”

“Haʾu nia mandatu ikus hakarak koʾalia ba deputadu sira atu tau interese komun iha interese partidaria. Favor ida halo asertasaun no konsensu politika entre deputadu sira iha PN no lalika book artigu 7,” Katak Komisariu Sergio Hornai.

Deputado proponente ba alterasaun Lei Nu. 8/2009 hamutuk naʾin 3 husi bankada governu 3 iha PN; Deputada Olinda Guterres KHUNTO, Deputadu Antoninho Bianco FRETILIN no Deputada Angelina Sarmento husi PLP.

Audiensia Publiku ne’ebé lidera husi Prezidenti Komisaun A PN Joaquim Boraluli konvida mos eis Komisariu CAC Adérito Pinto Tilman, Vice Ministro Justisa José Edmundo Caetano. (*)