Senior Management CAC Aprezenta Proposta Addiosional OGE 2021 nian ba Komisaun A PN

Dili – Iha loron Sesta-feira (13/11) Senior Management Comissão Anti-Corrupção (CAC) kompostu husi Komisariu Dr. Sergio Hornai, Komisariu Adjunto ba Investigasaun Kriminal Dr. Augusto Castro, Komisariu Adjunto Prevensaun no Sensibilizasaun Dr. Luis Sampaio, Komisariu Adjunto Servisu Apoiu no Kooperasaun Dr. Alexandre Freitas akommpanha husi asesora legal Dra. Mariman Oliveira ho estrutruta Komisaun nian tomak ba aprezenta proposta orsamentu addisional Orsamentu Geral Estadu (OGE) 2021 nian ba Komisaun A Parlamentu Nasional iha Sala Konferensia PN nian iha Uma Fukun Parlamentu Nasional Dili.

Total Proposta addisional Orsamentu Geral Estadu (OGE) 2021 ba Komisaun nian ne’ebé Senior Management CAC aprezenta ba iha Komisaun A PN hamutuk $592.984,50. Total orsamentu ne’e sei kobre kategoria rua; Bens e Servisus $378.534,50 no Kapital Minor $214.450.

Diskusaun proposta orsamentu ne’e lidera husi Prezidenti Komisaun A PN Deputadu Dr. Joaquim “Boraluli” dos Santos akompanha ho Vice Prezidenti Deputadu Francisco de Vasconselo, Sekretariu Komisaun José Pacheco, Deputada Bankada Opozisaun Dra. Carmelita Moniz no Patrocino Fernandes.

Komisaun iha tinan 2021 identifika no hatu’ur ninian prioridade tolu (3); IDA elaborasaun Estratejia Nasional Anti Korrupsaun (ENAK), RUA Haforsa Dezenvolvimentu Institusional atu hametin no asegura konfiansa husi povu Timor-Leste no TOLU haforsa Investigasaun Kriminal no Prevensaun Kriminal atu bele intende pratika korrupsaun sira ne’ebé mak mosu.

Komisaun iha tinan 2021 identifika programas rua ne’ebé sai linha orientadora ba Planu Estratejiku Nasional mak; IDA, halo artikulasaun ba iha asesu justisa ba iha sidadaun hotu no RUA atu hametin boa-governasaun no jestaun institusional iha Komisaun. Komisaun mos identifika iha ninian programas, sub-programas no aktividades hamutuk 24.      

Total OGE ba Komisaun 2021 nian ne’ebé aprova tiha ona durante diskusaun OGE nian iha PN hamutuk $1.783.860. Ho proposta orsamentu addisional Komisaun nian $592.984,50 ne’e mak total Komisaun nian iha tinan 2021 hamutuk $2.376.844,50. (*)

Permanent link to this article: https://cac.tl/2020/11/senior-management-cac-aprezenta-proposta-addiosional-oge-2021-nian-ba-komisaun-a-pn/

Parabens Loron Nasional Juventude, Honra no Gloria ba Juventude Lorico Asswain sai Vitima no Subriventes Massacra 12 Novembro 1991 Santa Cruz

Dala ida tan povu Timor-Leste komemora loron Nasional Juventude Lorico Asswain Massacre 12 Novembro 1991 Santa Cruz nian ba Dala XXIX.

Komisariu Comissao Anti Corrupcao (CAC) Dr. Sergio Hornai lori estrutura Komisaun nian naran no familia boot Espesialista Anti-Korrupsaun (EAK) ne’ebé mos balun sai subreviventes Massacre Santa Cruz hatoo parabens no ksolok wain ba komemorasaun loron Nasional Juventude nian.

Loron ida ne’e tinan 29 liu ba iha rate Santa Cruz, Juventude Lorico Asswai’n Rai Nain Timor hatudu sira ninian afirmasaun no dererminasaun desizivu iha luta libertasaun nasional ba mundo internasional katak povu no rai lulik ida ne’e rejeita total militar okupador estranjeiru, Indonesia ukun rai Timor ho kruel la respeita dignidade Povu Maubere.

Juventude Lorico Asswain, feto no mane iha loron ida ne’e tinan 29 liu ba komu liman metin hamutuk iha Unidade Nasional nian mahon halo demonstrasaun pasifika no hakilar ba mundo internasional hodi kumpri Palavra de Honra “Mate Ka Moris Ukun Rasik-An”.

Ho liman mamuk, hirus matan nurak wain hakilar ho dame, ho domin Timor-Leste la soi atu military estranjeiru assasinu sira kontinua okupa no ukun rai lulik Timor ida ne’e.

Juventude Lorico Asswain ho liman halo demostrasaun pasifika, marsa reza, kanta hatoo orasaun ba kauza rai Lulik Timor nian paz no dame.

Maibe, soldadu military Indonesia assasinu sira responde ho kilat musan, responde ho aktu brutalismu, responde aksaun dame ho kruel tebes, responde ho botas military, responde ho torturasaun, responde ho baioneta iha rate Santa Cruz Dili.

Juventude Lorico Asswain feto no mane ho idade sei nurak tebes massakradu iha loron ida ne’e tinan 29 liu ba! Sira nian ran morna fase rai lulik ida ne’e ba INDEPENDENSIA TOTAL.

Juventude Lorico Asswai’n balun mate, balun kanek todan no balun lakon too ohin loron liu tinan 29 SEIDAUK FILA BA UMA hasoru malu fali ho ema sira ne’ebé sira hadomi. RATE LA IHA, RUIN PEDASUK OAN IDA MOS SEIDAUK HETAN.

Juventude Lorico Asswain massakradu iha 12 Novembro 1991 Santa Cruz prova ba komunidade internasional katak military Indonesia la hadomi povu Timor durante okupasaun illegal no revela massacre seluk military Indonesia komete; iha Foho Matebian leten no Lacudala Quelicai, Lospalos, Cararas Viqueque, Jakarta Ainaro, Marabia no fatin seluk iha teritoriu rai doben Timor-Leste laran tomak.

Familia Boot Comissão Anti-Corrupção (CAC) hakruk fo honra no gloria ba korajen, sakrifisiu, determinasaun no firmeja ba Asswain Lorico Juventude Rai Nain nian ba Luta Libertasaun Nasional iha loron historiku ida ne’e.

Komisaun hakarak hatoo ho fuan ho laran tomak ba Timoroan sira feto no mane atu prense Ukun RasikAn ida ne’e hodi selu Asswain lutador sira ninian favor hodi la komete krimi korrupsaun.

Rai ida ne’e ninian Independensia ita hetan ho folin karu teb-tebes, sosa ho ruin no ran lutador no vitima funu sira nian ruin no ran liu 250.000.

Juventude Lorico Asswain sosa ita ninian independensia total ho sira nian ruin no ran! Ita ninian obrigasaun atu kontinua sira nian obras ho LA HALO KORRUPSAUN iha SERVISU FATIN.

Viva Juventude Lorico Asswain

Viva Independensia Total

Permanent link to this article: https://cac.tl/2020/11/parabens-loron-nasional-juventude-honra-no-gloria-ba-juventude-lorico-asswain-sai-vitima-no-subriventes-massacra-12-novembro-1991-santa-cruz/

Komisariu CAC mos iha Privileiju mais La Uza Kareta Plat G ba Festa, Lia Mate no Lia Moris

Dili – Komisariu Comissao Anti Corrupcao (CAC) Dr. Sergio Hornai hateten Komisariu CAC ho ninian Komisariu Adjuntus sira mos hanesan ho membrus governu no deputadu sira uza patrimoniu Estadu hanesan kareta plat G durante 24 horas nian laran. Maibe, Komisariu ho ninian adjuntus sira la uza kareta plat G hirak ne’e ba atende festa, halo lia moris no lia mate hamutuk ho familia.

Lia hirak ne’e Komisariu Dr. Sergio Hornai hatoo ba jornalista sira hafoin hatoo ninian paper iha seminariu “Diseminação de Medidas de Prevenção de Corrupção e Promoção de Boa Governação” ne’ebé organiza husi Ministeriu Defesa (MD) iha Kuartel Jeral F-FDTL Fatuhada Dili loron Kinta-feira (5/11).

“Membru governu iha lei hateten sira iha previleiju. Hau (Komisariu CAC ho Komisariu Adjuntu sira) mos iha maibe hau labele uza kareta CAC nian ba para iha tasi ibun, (uza kareta plat G) ba halo festa, lia mate ho lia moris,” Katak Komisariu Sergio hatan ba perguntas jornalista sira nian.

Komisariu hatutan teni asuntu festa, lia mate ho lia moris nudar asuntu particular mak membrus governu, deputadu no jerente senior instituisaun publiku sira neebé hetan previleiju uza kareta plat G tenki tuir regras no prosedimentu uza patrimoniu Estadu hirak ne’e ho honestidade, responsabilidade no transparenti.

Festa, lia mate no lia moris sira katak Komisariu hanesan asuntu particular Komisariu Sergio husu ba membru governu no deputadu sira atu uza fasilidade privadu wainhira trata asuntu particular hodi hatudu izemplu diak ba servidor Estadu no povu Timorense tomak.

“Estaun, se lia mate lia moris asuntu partikularidade! Hau (Komisariu CAC, Komisariu Adjuntu, membrus governu no deputadu) teni ba buka kareta mikrolet ida ka taxi ida atu ba iha neba. Ne’e mak ita hateten iha responsabilidade, iha honestidade, iha plena hanesan buat ida paixaun, nasionalismu, patriotism ba ida ne’e. entaun, carinho ida ne’e (membrus hovernu ho deputadu sira) tenki iha,” Komisariu Sergio sujere.   

Komisaun ne’ebé halo parta importante iha Ekipa Fiskalizasaun Konjunta (EFK) husu ba membrus governu, deputadu, , juiz, prokurador no jerente senior instituisaun publiku sira atu uza oportunidade no previleiju ne’ebe sira hetan ho honestidade, responsabilidade ho transparenti.

Ekipa Fiskalizasaun Konjunta (EFK) kompostu husi Polisia Nasional Timor Leste (PNTL), Direção Nacional de Transportes Terrestres (DNTT), Ministerio Financas (Patrimonio Estado), Comisão Função Publica CFP) no Comissao Anti Corrupcao CAC molok ne’e apela ba funsaionariu publiku sira atu ba festeja loron Finadu iha idak-idak nian horik fatin hamutuk ho familia la ho kareta Estadu.

Maibe, realidade iha terenu durante feriadu Finadu sei iha funsionariu, membrus governu, prokurador no juiz balun uza patrimoniu Estadu Plat G tula membrus familia sira ba festeja loron matebian nian iha idak-idak nian horik fatin. (*)

Permanent link to this article: https://cac.tl/2020/11/komisariu-cac-mos-iha-privileiju-mais-la-uza-kareta-plat-g-ba-festa-lia-mate-no-lia-moris/

Komisariu Sergio Sai Orador Prinsipal iha Seminariu Medidas de Prevenção de Corrupção e Promoção de Boa Governação Organiza husi MD

Dili – Iha loron Kinta-feira (5/11) ne’e, Komisariu Comissao Anti Corrupcao (CAC) Dr. Sergio Hornai sai orador principal iha seminariu “Diseminação de Medidas de Prevenção de Corrupção e Promoção de Boa Governação” ne’ebé organiza husi Ministeriu Defesa (MD) iha Kuartel Jeral F-FDTL Fatuhada Dili.

Iha Komisariu ninian intervensaun hateten Lei Medidas Prevensaun no Kombate Korrupsaun (MPCC) ne’ebé Nai Prezidenti Republika Dr. Françisco Guterres Lu-Olo promulga iha fula Augusto liu ba hateten mai Timoroan sira katak Timor-Leste (TL) nudar nasaun soberanu presija iha ninian politika nasional no instrument legal ida ba iha kombate kriminalidade korrupsaun.

Lei MPCC iha medidas politika prevensaun kriminalidade korrupsaun no mos medida represivu ninian ba iha investigsaun kriminalidade korrupsau ninian sei hahu implementa hafoin liu loron 180 data promulgasaun nian iha loron 26 Fulan Fevereiru 2021.   

“Lei ida ne’e hateten saida mai ita? Estadu ida ne’e presija iha politika nasional ida ba iha kombate kriminalidade korrupsaun. Ho perseiptu rua; ida, tenki iha persepsaun hanesan iha Estadu direitu ida ne’e liu-liu ba iha kombate kriminalidade ba iha korrupsaun. Iha medidas politika (prevensaun) kriminalidade no mos iha medida represivu ninian ba iha investigasaun kriminalidade korrupsau ninian,” Katak Komisariu Sergio iha ninian intervensaun.

Iha luta kontra korrupsaun, Timoroan sira liu-liu politiku nain Timorense sira obrigatoriu atu hatene klean kona-ba krimi pekulatu no pekulatu de uzu. Ida ne’e atu tulun ukun nain sira hatene boa-governasaun no promove transparansia, akuntabilidade, responsabilidade, profesionalismu, integridade no imparsialidade.

Komisariu Sergio halo ilustrasaun hodi loke partisipantes funsionariu publiku Ministeriu Defesa sira nian horizonte no konsiensia katak krimi pekulatu no pekulatu de uzu mak KOmandante ida, Komisariu, politiku nain sira no membru governu sira la uza patrimoniu Estadu ba interese privadu.

“Se hau (Komandante, Komisariu no membru governu) hetan salariu diak, iha imunidade, hetan privileiju hau tenki lori kareta Estadu CAC nian ba halo lia? ba halo festa? ba halo lia mate lia moris? Entaun, iha ne’e loke ita nian paixaun, honestidade, responsabilidade, determinasaun no firmeja (atu distinkti uza sasan Estadu nian tuir nian dalan),” Katak Komisariu Sergio.

Objetivu lei MPCC nian katak Komisariu Sergio atu eradika krimi korrupsaun no promove boa-pratikas iha seitor publiku hodi lori moris diak ba povu Timorense tomak. lei MPCC mos ejiji no aplika boa-pratikas ba iha seitor privadu.

Seitor privadu katak Komisariu aplika mos Lei MPCC tamba nudar implementador projeitus atu evita pratika suborn hodi promove integridade, honestidade no transparante ba prosesu aprovizionamentu nian.

Komisariu Sergio iha oportunidade ida ne’e esplika mos ba estrutura Ministeriu Defesa, Komando F-FDTL no partisipantes sira oinsa atu deklara sira ninian rikusoi wainhira lei MPCC ida ne’e hahu implementa iha fulan Fevereiru 2021 tinan oin.

“Hakarak ka lakohi Ministro, asesor internasional no nasional sira inklui Komandante F-FDTL ho familia sira tenki deklara rikusoi. Se halo deklarasaun falsu mos sei iha konsekuensia,” Komisariu Sergio Hornai sublinha.

Partisipa iha seminariu ne mak Ministro Defesa Filomeno Paixao, ViceChefe Estado Maior Jeneral F-FDTL Brigadeiro Jeneral Falur Rate Laek, Komandante Inpector/Auditorio MD Brigadeiro Jeneral Maunana, CHefe Estado Maior Coronel Calistro Coliati, Komandante Centro Formasaun Militar Nicolau Lobato Metinaro Tenenti Koronel Haksolok no estrutura funsionariu Ministeriu Defesa civil no military sira. (*)

Permanent link to this article: https://cac.tl/2020/11/komisariu-sergio-sai-orador-prinsipal-iha-seminariu-medidas-de-prevencao-de-corrupcao-e-promocao-de-boa-governacao-organiza-husi-md/

Home
Account
Cart
Search