Komisariu CAC Sergio Halo Audiensia Kortezia ba Arche-Bispo Metroplitano Dili Don Virgilio

Lecidere – Arche-Bispo Metroplitano Dili Don Virgilio da Silva do Carmo, SDB hateten Comissão Anti-Corrupção (CAC) nudar instituisaun ida importante tebes ba nasaun joven Timor-Leste atu halo kontrolu no hamoris valores integridade, responsabilidade. akuntabilidade, transparensia ukun nain Timoroan sira nian iha governasaun.

Lia hirak ne’e Arche-Bispo Metroplitano Dili Don Virgilio da Silva do Carmo, SDB haraik ba Komisariu Comissão Anti-Corrupção (CAC) Dr. Sergio Hornai wainhira halao audiensia kortezia ida ba iha eskritoriu Arche-Bispo Metro Politano Dili nian iha loron Sesta-feira (4/12) liu ba iha Lecidere Dili.

“CAC ajuda ita (ukun nain Timoroan sira) atu halo kontrolu hodi nune’e nafatin iha integridade governasaun iha kada departamentu no ministeriu. CAC lolos laos atu hatauk ema maibe sai sasukat ida atu prevene ema hotu ne’ebé kaer governu iha integridade, iha transparantesia. Laos haree CAC sai ameasa ida,” Katak Arche-Bispo Metroplitano Dili Don Virgilio da Silva do Carmo, SDB.

Don Virgilio agradese konfiansa ne’ebé Komisaun harik ba Uma Kreda liu-liu papel Uma Kreda ninian liga ba iha valores Kristaun ninian atu solisita nafatin sarani sira ne’ebé simu knar no assume responsabilidade hodi sai ukun nain no jerente Estadu iha instituisaun publiku. Ho audiensia kortejia ne’e, bele hametin lasu amizade no valores Kristaun ninian , liu-liu sarani sira ne’ebé hola parte iha instituisaun oin-oin.

Iha momentu special ne’e, Amo Bispo Virgio garante ba Komisariu Sergio katak Uma Kreda Timor koko atu kontinua ajuda Komisaun hodi hatoo mensajen ba sarani Timoroan sira hodi nune’e bele hamoris fila fali valores sira iha momentu adventu no ambiente Natal nian iha tinan ne’e.

Buat ida ne’e mak presija ita sosializa makaas iha aspeitu edukasaun civika. Se ita (Timoroan) sira lao iha ida ne’e buat hotu lao kapaas. No Uma Kreda liu-liu iha Dili hatoo apresiasaun boot ba servisu ida ne’e no koko atu apoiu tuir ami ninian posibilidade,” Don Virgilio hatutan tenik.

Don Virgio sublinha katak knar Komisaun nian difisil no servisu nakonu ho riskus. Tamba, CAC ninian servisu hamrik iha lia los nian leten atu koalia buat ne’ebé loos no defende prinsipius nasaun ba boa-governasaun ninian.

Knar ida ne’e katak Amo Virgio laos fasil no nian inimigu iha fatin barak. Buat ne’e hotu dala barak halo imi nian fatin klot. Imi nian  papel importante e perigu teb-tebes tamba tenki hamrik iha buat ne’ebé lia loos nian oin atu defende justisa.

“Dala barak ita presija duni korajen! se Lae? ita mos fasil atu bele monu iha situasaun sira (korrupsaun) hanesan ne’e. Parabens ba CAC tamba maske situasaun sira hanesan ne’e mais nunka rende hodi kontinua nafatin hasoru aktu krimi korrupsaun iha ita nian rai laran,” Don Virgio afirma.

Akompanha Komisariu Sergio ba halao audiensia kortezia ne’e mak Chefe Unidade Kooperasaun Dr. João Correia do Rosario, Chefe Unidade Rekursu HUmanu Dr. Luis Ersio Ximenes no Sekretaris Komisariu Dra. Lidia Baptis Belo. (*)

Permanent link to this article: https://cac.tl/2020/12/komisariu-cac-sergio-halo-audiensia-kortezia-ba-arche-bispo-metroplitano-dili-don-virgilio/

DR. Augosto Lourdes Finaliza Formulasaun PECAC Periodu 2021-2025 no Aprezenta ba Senior Management CAC

Dili – DR. Augosto Lourdes da Silva nudar Asesor Dezenvolvimentu Planu Estratejiku Comissão Anti-Corrupção (PECAC) period 2021-2025 nian konklui ona ninian servisu iha loron Sesta-feira (4/12) ohin no aprezenta ninian draftu rezultadu servisu ba Terseira Mandatu Komisariu ho estrutura Espesialista Anti-Korrupsaun (EAK) tomak iha Salaun Enkountru CAC Farol Dili.

DR. Augosto Lourdes da Silva halao ninian servisu formulasaun ba Dezenvolvimentu PECAC periodu 2021-2025 durante fulan ida tomak no ohin halo aprezentasaun ikus ba ninian rezultadu servisu hamutuk 32 pajinas ne’e ho estruturadu no sistematiku ba Senior Management CAC molok termina ninian misaun.

Iha PECAC ne’ebé formula husi DR. Augosto ne’e, artikula Diresaun Tolu (3) Komisaun nian mak; Diresaun Investigasaun Kriminal, Diresaun Prevensaun no Sensibilizasaun no Diresaun Servisu Apoiu no Kooperasaun. PRCAC ne’e kobre mos kapasitasaun rekursu humanu ba EAK sira kada tinan durante period 2021-2025 no konstrusaun infra-estrutura ka edifisiu foun CAC nian.

Ho finalizasaun ba formulasaun period PECAC 2021-2025 ne’e, KOmisariu lori individu no KOmisaun nian naran hatoo apresiasaun a’as no agradesimentu wain ba servisu furak Asesor DR. Augosto Lourdes nian. PECAC period 2021-2025 ida ne’e nudar  produtu husi matenek nain Timoroan rasik atu giaun Komisaun nian serisu ba tinan lima (5) oin mai.

“Parabens e obrigado ba DR. Augosto tamba ita bele reuni ita nian capital social Timoroan. Ita reuni ita ninian matenek, ita nian badaen, ita nian intelijensia, sabedoria hamutuk para atu bele inventariza ba identifika problemas dezenvolvimentu institusional nian ba iha aktus konkretas ida mak ita bolu vizaun iha dezenvolvimentu institusional ninian,” Katak Komisariu Sergio.

Iha loron 27 too  30 fulan Outobro 2020, KOmisaun halibur matenek nain nasional hodi akumula sira ninian kontribuisaun ba formulasaun  PECAC 2021-2025 ne’eb halao iha Salaun João Paulo II Konventu Filhas de Maria Auxiliadora (FMA) Comoro Dili..

PECAC ida ne’e atu gia, orienta no haraik responsabilidade boot ba iha EAK sira atu halo akonselamentu ba iha instituisaun Estadu no povu Timorense tomak iha luta sagradu prevene no kombate korrupsaun.

DR. Augosto Lourdes servisu hamutuk ho Komisariu Adjunto CAC ba Asuntu Servisu Apoiu Kooperasaun nian Dr. Alexandre Florindo Freitas formula PECAC 2021-2025 durante fulan ida.

Relatoriu final PECAC period 2021-2025 ne’e posivelemente sei publika iha loron sia (9) fulan Dezembru ne’e wainhira Timor-Leste komemora Loron Mundial Anti-Korrupsaun ne’ebé sei Sentraliza iha Salaun Lalini Lariguto CNE Colmera Dili. (*)

Permanent link to this article: https://cac.tl/2020/12/dr-augosto-lourdes-finaliza-formulasaun-pecac-periodu-2021-2025-no-aprezenta-ba-senior-management-cac/

“CAC Disemina Lei MPCC Importante atu Hadia Sistema Demokratiku Seitor Publiku no Privadu” Vice-PM Eng. José Reis

Dili – Vice Primeiru Ministro no Ministro Planu no Ordenamentu Teritoriu Eng. José Reis hateten Programa diseminasaun Lei MPCC ho topiku “Hasa’e Konhesimentu Ajente Publiku Kona-ba Medidas Prevensaun no Kombate Korrupaun” ne’ebé oras ne’e Comissão Anti-Corrupção halao hela iha linha ministeriais importante tebes atu hadia diak liu tan sistema demokratiku seitor publiku no privadu sira iha nasaun joven Timor-Leste.

Vice-Primeiru Ministro hatoo liahirak ne’e wainhira hatoo ninian diskusrsu hodi ofisialmente loke workshop loron ida ba servidor povu sira ne’ebé haknar an iha Gabinete Vice Primeiru Ministro no Ministeriu Planeamentu no Ordenamentu Teritoriu ho estrutura tomak inklui staff Ajensia Dezenvolvimentu Nasional (ADN) iha Salaun Sorumutu Ministeriu Transporte no Komunikasaun Caicoli Dili Kuarta-feira (2/12) horseik.

“Ho lei (MPCC) ida ne’e ita bele dudu atu hadia diak liu tan ita ninian sistema demokratiku sira husi seitor publiku too ba iha seitor privadu,” Katak Vice Primeiru Ministru Eng. José Reis iha ninian diskursu badak.

Atu kombate korrupsaun iha Timor-Leste katak Vice Primeiru Ministro Jose Reis Timoroan sira liu-liu servidor Estadu presija hahu halo mudansa boot ba iha instituisaun Estadu sira hodi fornese servisu publiku ne’ebé efisiente no efikas hodi atende nesesidade sidadaun Timorense sira nian ho lalais.

Vice Primeiru Ministri José hatutan teni Timoroan sira hotu ne’ebé servisu iha instituisaun publiku hahu husi hirarki superior too ba iha funsionariu ordinariu sira hotu mak iha linha primeiru iha luta kontra korrupsaun hodi fo izemplu ba sosiedade Timorense tomak.

Parlamentu Nasional iha lejislatura Dalimak ne’ebé halo aprovasaun ba Lei MPCC hodi Nai Prezidenti Republika Dr. Françisco GUterres Lu-Olo promulga iha loron 26 Agosto 2020 nudar pasu importante iha historia nasaun joven Timor-Leste nian atu bele lori Timoroan sira ba iha objetivu ida ne’ebé Timoroan sira hotu hakarak atu halakon kiak iha Timor-Leste sem pratika korrupsaun.

“Fator ida ne’ebé mak lori povu ida ne’e kiak! Ida mak korrupsaun ne’e. Nudar Vice Primeiru Ministru no Ministro Ordenamentu hau hanoin too ona tempu ita (Timoroan) hotu-hotu iha konsiensia atu lao tuir dalan loos,” Vice-Primeiro Ministro Eng. José Reis afirma.

VicePrimeiru Ministro Jose Reis mos hatoo ninian apresiasaun aas ba programa diseminasaun informasaun kona-ba lei MPCC ne’ebé halao husi Terseira Mandatu Komisariu CAC ne’ebé lidera husi Komisariu Dr. Sergio Hornai.

Importante teb-tebes katak Vice Primeiru Ministro José Reis ho inisiativa workshop ida ne’e husi CAC atu hadiah dadaun sistema demokratiku sira iha Timor-Leste. Ho workshop ba staff sira iha MPO no ADN bele halao dezenvolvimentu sustentavel ho Timor-Leste nian Lei Nu. 7/2020 26 de Augosto  Medidas Prevensaun no Kombate Korrupsaun (MPCC).

“Korrupsaun mai harahun ita nian konsiensia, harahun demokrasia, estraga dezenvolvimentu ekonomiku, reforsa dis-igualidade, kiak no mukit no hafahe koezaun social. Korrupsaun nudar abut no dezafiu boot,” Vice Primeiru Ministro José Reis sublinha.

VIII Governu Konstitusional actual hafoin halo remodelasaun katak VicePrimeiru Ministro Eng. José Reis iha komprimisu boot atu kombate korrupsaun iha nivel hotu-hotu husi kiik too boot no husi leten too kraik. Ho nune’e, governu dudu halo aprovasaun ba lei MPCC ida ne’e hodi Timoroan sira tula kamada ba malu iha luta kontra korrupsaun ne’ebé iha realidade ezisti iha nasaun doben Timor-Leste.

Timoroan sira sira ne’ebé hakarak nasaun doben Timor-Leste sai diak tenki manan konsiensia ho diseminasaun informasaun kona-ba lei MPCC atu lori Timoroan sira kompriende saida mak korrupsaun?

“Atu muda ita nian komportamentu ida ne’e presija muda ita ninian konsiensia para atu hatene loloos fakto no sa impaktu mak korrupsaun bele fo ba povu, sosiedade no nasaun?,” Afirma Vice-Primeiru Ministru Eng. José Reis. (*)

Permanent link to this article: https://cac.tl/2020/12/cac-disemina-lei-mpcc-importante-atu-hadia-sistema-demokratiku-seitor-publiku-no-privadu-vice-pm-jose-reis/

Lei MPCC Todan Mais Sei Eduka Ita

Dili –  Komisariu Comisaão AntiCorrupção (CAC) Dr. Sergio Hornai hateten Lei foun Nu. 7/2020 kona-ba Medidas de Prevenção e Combate a Corrupção (MPCC) sei todan tebes ba servidor Estado sira haknar an iha instituisaun publiku wainhira hahu implementa iha loron 26 fulan Fevereiro 2021. Maibe, lei ida ne’e sei eduka Timoroan sira atu moris dignu ho kosar ben rasik hodi fo folin ba Asswain Lutador sira ne’ebé sakrifika sira ninian ruin no ran durante luta libertasaun nasional ba Timor-Leste ninian Ukun Rasik-An.

Lia hirak ne’e Komisariu Sergio hato’o iha ninian intervensaun ba diseminasaun lei MPCC ho topiku jeral “Hasa’e Konhesimentu Ajente Publiku Kona-ba Medidas Prevensaun no Kombate Korrupaun” ba Gabinete Vice Primeiru Ministro no Ministeriu Planeamentu no Ordenamentu Teritoriu iha loron Kuarta-feira (2/12) ohin iha Salaun Sorumutu Ministeriu Transporte no Komunikasaun Caicoli Dili.

“Lei MPCC ida ne’e todan mais sei eduka ita bele iha konseitu ida hodi bele fo hakat ba iha misaun no vizaun dok ba iha boa-governasaun liu-liu ba iha transparansia, akuntabilidade, responsabilidade ne’ebé mak hatuur ona iha Lei Nu. 7/2020,” Katak Komisariu Sergio iha ninian intervensaun.

Komisariu Sergio hatutan teni Comisaão Anti-Corrupção (CAC) mai ho ninian vizaun no misaun, ho ninian natureza, ho ninian kompetensia propriu fahe ba rua (2); IDA – oinsa mak atu promove aksaun sira ba iha prevensaun no sensibilizasaun ba iha sidadaun Timorense sira.

Lei MPCC sei aplika ba seitor publiku no seitor privadu para atu Timoroan sira iha boas pratikas sira, justu, loloos tuir prinsipius legalidade atu hasees seridor povu sira husi irregularidades sira. Ita tenki hasae ita ninian konhesimentu atu kompriende konaba direitus no deveres sira.  

RUA – Komisaun ho ninian atribuisaun ida nudar orgaun polisia espesializadas para atu bele halo medidas represivus. Iha medidas represivus atu halo saida? Idak-idak ba hatan (iha tribunal) tuir ema ida ninian han oituan ka barak.

Timoroan sira ne’ebé servi rai ida ne’e nudar ajente operadores sira mai iha workshop loron ida atu manifesta vontade diak atu fahe ba malu atu hasae konhesimentu no horizonete servidor povu Timorense kona-ba lei foun MPCC ne’ebé sei implementa iha Fevereiru tinan oin.  

“(Hau hamutuk ho Espesialista Anti-Korrupsaun sira) laos (atu mai) mestre (hanourin). Maibe ita atu fahe ba malu esensia ka objetivu lolos lei ida ne’e ninian para atu fasilita ita iha ita ninian servisu lor-loron ita halo hanesan bukae ida ka giaun ida para atu ita servisu hanesan servidor ho kuidadu teb-tebes para atu labele tama ba iha irregularidades sira,” Komisariu Sergio esplika.

Diseminasaun Lei Nu. 7/2020 ida ne’e esplika Komisariu Sergio atu servidor povu sira iha persepsaun ida ba iha medidas prevensaun no kombate kriminalidade korrupsaun too ba iha ninian persekusaun sira la monu ba iha tentasaun krimi korrupsaun.

“Maibe, nia rasik lakohi kontrola ita ninian emosaun, ita ninian egoism! Entau ita rasik mak sei sujeta ba iha responsabilidade sira. Responsabilidade tuir lei ida ne’e mak responsabilidade disiplinar, responsabilidade administrativus no responsabilidade criminal,” Komisariu sublinha.

“Hau nian obrigasaun hanesan joven ida ne’ebé assume resonsabilidade husi povu (atraves Parlamentu Nasional) atu hamrik hodi partilha ba maluk servidor Estadu sira ho konhesimentu oituan ne’ebé mak iha ba ita boot sira atu halo artikulasaun,” Komisariu Sergio afirma.

Partisipa iha Programa diseminasaun Lei MPCC ho topiku “Hasa’e Konhesimentu Ajente Publiku Kona-ba Medidas Prevensaun no Kombate Korrupaun” durante loron ida ne’e mak servidor povu ne’ebé haknar an iha Gabinete Vice Primeiru Ministro no Ministeriu Planeamentu no Ordenamentu Teritoriu ho estrutura tomak inklui staff Ajensia Dezenvolvimentu Nasional (ADN).

Workshop loron ida ne’e ofisialmente loke husi Vice Primeiru Ministro Eng. José Reis.  (*)

Permanent link to this article: https://cac.tl/2020/12/lei-mpcc-todan-mais-sei-eduka-ita/

Home
Account
Cart
Search