Komisariu Adjunto Comissão Anti-Corrupção (CAC) ba Asuntu Prevensaun no Sensibilizasaun (PS) Luis de Oliveira Sampaio hamutuk ho Adjunto Provedoria José Cristovao Telo Kuarta-feira (30/11) ohin halao vizita no inspeksaun surpreza ba sede suku sira iha capital Dili hodi koalia direta ho Chefe Suku no estrutura lider komunitariu sira kona-ba preparasaun implementasaun Subsidiu Fim do Ano $200.

Inspeksaun surpreza ida ne’e ho objetivu atu koalia direta ho lider komunitariu sira konaba dadus serteja benefisiariu sira atu aksesu ba implementasaun programa governu nian atu evita falsifikasaun fischa familia nian no inventa dadus ne’ebé bele envolve lider komunitariu sira.

Iha sorumutu ne’e, lider instituisaun Estadu rua; CAC no PDHJ reafirma katak lider komunitariu sira halo parte importante iha luta prevene no kombate korrupsaun hodi kontribui signifikativu iha programa subsidiu ida ne’e atu evita falsifika dokumentus ba individu Timorense sira ne’ebé la merese atu simu.

Lider instituisaun Estadu rua CAC no PDHJ mos esplika katak kada individu ne’ebé sei simu Subsidiu Fim do Ano $200 sei asina deklarasaun ho konsiensia katak membrus familia benefisiariu sira tantu funsionariu seitor privadu no publiku la simu salariu $500 ba leten kada fulan regularmente.

Esplika mos ba lider komunitariu sira Diploma Ministerial Nu. 377/2022 kona-ba Regulamentu Subsidiu Fim do Ano nian katak Timoroan sira ne’ebé hela iha teritotiu TL laran tomak simu salariu $500 ba leten kada la iha direitu.

Data limite ba Fischa Familia ne’ebé sei validu ba familia atu hetan subsudiu ne’e loron 28 fulan Fevereiru 2022 ho idade uma kain chefe familia tenki ho tinan 22.

Dekretu Lei Nu. 81/2022 ne’e mos esplika katak funsionariu Estadu, staff seitor privadu, staff local ajensia internasional halao misaun iha Timor-Leste, staff local kompanha internasional staff, staff local ajensia UN, staff local ONG internasional, staff local embaxada nasaun belun sira halao misaun diplomatiku iha TL ne’ebé ho salariu mensal liu $500 la iha direitu asesu ba programa subsidiu Fim do Ano nian.

“Lider komunitariu sira hanesan parseiru importante iha luta kontra korrupsaun. Tamba ne’e, ami to’o iha imi nian fatin (sede suku) koalia direta ho Chefe Suku ho estrutura tomak atu kolabora hodi salva osan Estadu nian la monu ba iha individu sira ne’ebé la merese simu,” Katak Komisariu Adjunto Luis Sampaio ba lider komunitariu sira. (*)