Comissão Anti-Corrupção (CAC) Servisu hamutuk ho Polisia Nasionál Timor-Lorosa’e (PNTL) iha segunda-feira (10/10) ohin realiza teste fíziku ba kandidatu klasifikadu Vaga Espesialista Anti Korrupsaun (EAK) na’in 24 iha Sentru formasaun akademia PNTL, Comoro Dili.
Eventu teste fíziku ba EAK foun na’in 24 ohin marka prezensa husi Komisariu Sergio Hornai no Komandante Polisia Akademia PNTL, akompaña husi Komisariu Adjuntu ba Servisu Apóiu no Kooperasaun Alexandre Freitas, ekipa juri sira no mós ekipa instruktór sira husi PNTL ninian.
Eventu teste fíziku ne’e nu’udar kontinuasaun husi teste sira seluk no teste ikus liu ba kandidatu EAK foun sira, ne’ebé ekipa juri sira halo no ultrapasa ona durante iha periodu tinan ida nia laran.
Eventu teste fíziku ne’e ho objetivu prinsipál atu teste EAK foun sira nia abilidade no forsa iha ambiente servisu polisiál nian. Objetivu seluk mós atu forma di’ak liu-tan EAK foun na’in 24 ne’e nia koñesimentu, karakter, mentalidade, no konvivensia kona-ba servisu polisia kriminál ninian.
Komisariu Sergio iha eventu ne’e ko’alia ba EAK foun sira atu mai servisu iha CAC tenke hatudu komportamentu di’ak, dedika-an no serví estadu ho karakter professionál no responsabilidade, no labele tau aas interese pesoal no buka oportunidade barak liu iha hanoin.
Komisariu Sergio ko’alia ba EAK foun sira bainhira haknaar-an iha Komisaun tenke tane aas prinsipiu profesionalizmu, idenpendente, no integridade aas. EAK foun sira tenke evita atu tane aas fali interese grupu no polítiku iha servisu fatin.
“Ita tenke rigór, ita tenke prudente, ita tenke kautela hodi halo projesaun ba oin (servisu tuir de’it lei). Ema politika husik sira halo sira nia politika, ita professionál halo ita nia servísu ho professionál”, Komisariu Sergio fó hanoin.
Iha eventu teste fíziku ohin, EAK foun na’in 24 ne’e kompleta ona prosedimentu sira rekrutamentu nian, no durante tinan ida sei tama ba faze provatóriu, inklui hetan formasaun, estajiu no avaliasaun antes destaka ba servisu profesionál.
