Komisariu Comissão Anti-Corrupção (CAC) Sergio Hornai no Komisariu Adjuntu Investigasaun, Augusto Castro akompaña husi Xefe Unidade Kooperasaun João Correia iha Kuarta Feira (29/9) loraik ne’e simu vizita kortezia no reuniaun ho Embaxadora Portugal iha TL Manuela Freitas Bairos iha Edifisiu CAC Farol Dili.
Objetivu prinsipál vizita no sorumutu kortezia ida ne’e foka impresoens kona-ba kooperasaun multilaterál entre CAC, Embaxada Portugal (EP) no Uniaun Europeia (UE) ba realizasaun apóiu sira iha programa formasaun nian liu husi Instituto Camões no projetu PFMO inklui esplora kooperasaun bilaterál entre Komisaun ho Embaxada.
Asuntu importante ne’ebé ko’alia iha vizita no sorumutu kortezia ida ne’e maka sei kontinua halao formasaun ba Espesialista Anti Korrupsaun (EAK) sira iha investigasaun kriminal nian, formasaun jurídika, téknika no lingua Portuguesa ne’ebé molok ne’e halao ona iha ámbitu pandemia Covid-19.
Sorumutu kortezia ida ne’e mós ko’alia kona-ba oinsá Emabaixada Portugal iha TL bele fornese asisténsia téknika no apóiu sira iha material didátiku, livru no disionáriu sira hodi mellora di’ak liu-tan formasaun no servisu investigasaun kriminal nian.
