Komisariu Comissão Anti-Corrupção (CAC) Sergio Hornai akompaña husi Xefe Unidade Kooperasaun João Correia iha Kuarta Feira (29/09) dadersan ne’e simu audiénsia kortezia ho ekipa Timor-Leste Press Union (TLPU) iha Edifisiu CAC Farol Dili.

Objetivu husi sorumutu koortezia ida ne’e hodi ko’alia kona-ba fortalesimentu kooperasaun servisu instituisaun rua nian ba implementasaun provizaun balun iha Lei nú 7/2020-MPCC nian iha artigu 26 kona-ba Formasaun ba Jornalista no jornalizmu investigasaun nian.

Sorumutu lasu amizade ida ne’e, TLPU ho inisitiva husu Komisaun atu bele tulun sira oinsá reforsa kapasitasaun ba nia membru jornalista sira iha dominiu rejime juridika ba asesu informasaun korrupsaun ninian.

Pontu importante ne’ebé ko’alia mak oinsá fornese treinamentu no formasaun juridika no téknika investigasaun nian ba jornalista sira atu hasa’e sira nia koñesimentu iha ámbitu investigasaun inisiál ba indisius krime korrupsaun sira, nune’e iha futuru bele apóiu liu tan CAC iha luta prevene no kombate korrupsaun ih TL.

Komisariu Sergio Hornai ba ekipa TLPU hatete, média nia papél importante tebes iha estadu direitu demokrátiku. Média sai nu’udar lian ba lian laek sira no assume mós papel nu’udar kontrolu sosiál ida forte hodi kombate krime korrupsaun iha rai doben Timor-Leste.

Komisariu Sergio ko’alia ba Ekipa TLPU ho nia membru sira atu sai protector no vanguarda ba dezenvolvimentu nasionál no promove pás no demokrásia. Servisu na’in professionál média sira bainhira hala’o sira nia profisaun nafatin hakruuk ba kódigu étika jornalistika nian, nune’e kombate hahalok sensura no ko’asaun sira, liu-liu interevnsaun politika sira iha politika redasaun média nian.

“Ita boot sira mak sai protector, liu-liu sai vanguarda, servisu sira tenke professionál, independente no kombate sensura”, Katak Komisariu Sergio.

Enkuantu rezultadu sorumutu kortezia ida ne’e, parte rua konkorda no prontu atu kordena ba malu hodi realiza pontu konsiderasaun sira ne’ebé aserta hamutuk ona, nune’e bele apóiu média no jornalista sira mellora sira nia koñesimentu di’ak iha luta koletiva hasoru inimigu korrupsaun.