CAC Hahú Sorumutu Akonsellamentu ho Entidade Implementador Programa Subsidiu Fim do Anu Husi Ekipa MSSI

CAC Hahú Sorumutu Akonsellamentu ho Entidade Implementador Programa Subsidiu Fim do Anu Husi Ekipa MSSI

Komisariu Adjuntu Comissão Anti-Corrupção (CAC) ba Asuntu Servisu Prevensaun no Sensibilizasaun (DPS) Luis Sampaio lidera Ekipa Espesialista Anti-Korrupsaun (EAK) iha Kuarta-Feira (7/9) ohin hala’o sorumutu akonsellamentu ho Ekipa Responsavel programa Pagamentu Subsidiu Fim do Ano ba Uma Kain husi MSSI nian iha salaun enkontru MSSI, Caicoli Dili.

Ekipa MSSI konvida Komisaun iha sorumutu ida ne’e ho objetivu prinsipál husu Komisaun nia pontu de vista no akonsellamentu iha ámbitu prevensaun krime korrupsaun nian hahú iha inisiu preparasaun tékniku nian ba programa ida ne’e, no akonsella mós entidade responsavel oinsá kumpre no implementa programa refere tuir dekretu lei nú. 37/2022, 25 Maiu.

Iha reuniaun ne’e, ekipa forsa traballu MSSI nian aktualiza progresu preparasaun tékniku pagamentu subsidiu fim do anu uma kain nian ne’ebé VIII Guvernu planeia sei halo pagamentu ba uma-kain elegivel sira iha fulan Novembru ne’e.

Pontu importante ne’ebé ekipa ne’e aktualiza mai CAC mak; a) Preparasaun dadus elegivel benefisiariu ne’ebé MSSI kordena hamutuk MAE; b) Mekanizmu pagamentu subsidiu familiar nian; c) Mobilizasaun transporte sira ne’ebé sei apóiu ekipa tékniku sira halo pagamentu subsidiu iha Suku; d) Montante orsamentu ne’ebé aloka ba programa refere ne’ebé sei kobre pur volta 70 Milloes, no e) atualiza mós kordenasaun servisu ho entidade sira seluk.

Iha reuniaun ne’e, MSSI aktualiza mós preokupasaun no kestaun balun liga ho desizaun Konsellu Ministru nian ho dekretu lei nú. 37/2022, liu-liu benefisiariu sira ne’ebé sei asesu ba subsidiu ida ne’e.

Komisariu Adjuntu Sampaio akonsella entidade implementadór atu kumpre de’it dekretu lei ne’ebé aprova, promulga ona no tama iha vigór. Konforme ba interpretasaun no intendimentu Komisaun nian kona-ba Espiritu dekretu lei nú. 37/2022 ne’e fó énfaze no aplika de’it ba pesoa no familia vulneravel sira mak iha direitu simu subsidiu ne’e.

“Ami kaer mak dokumentu (dekretu lei) ne’ebé iha ne’e. Kecuali iha Konsellu Ministru ne’e iha alterasaun ba dekretu lei ne’e”, Adjuntu Sampaio fó hanoin ekipa responsavel MSSI.

Komisariu Adjuntu Sampaio mós rekomenda ba ekipa responsavel programa ne’e atu buka solusaun ba preokupasaun hirak ne’ebé akontese no halo preparasaun sira ho di’ak tuir espiritu dekretu lei ne’ebé iha antes implementa programa refere iha tereñu, nune’e labele ariska-an ba iha krime korrupsaun.

Ba pontus rekomendasaun Komisaun nian, Ekipa MSSI nian simu, anota ona no konsidera sei buka meius no esforsu hotu-hotu atu solusiona problema sira ne’ebé akontese.

Ekipa MSSI kompromitidu sei husu nafatin Komisaun nia pareser legál ba preokupasaun no kestaun ne’ebé Guvernu enfrenta, nune’e bele fó solusaun di’ak liu ba implementasaun programa ida ne’e. (*)