Iha loron kinta-feira (25/8) ohin Comisario Comissão Anti Corrupção (CAC) Sergio Hornai akompaña husi Xefe Unidade Informasaun no Seguransa, Euclides Madeira simu vizita kortezia Ambaxador Indonesia Okto Dorinus Manik iha Edifisiu CAC Farol Dili.

Objetivu husi vizita koortezia ne’e hodi parte rua ko’alia ba malu kona-ba hametin lasu amizade di’ak no forte liu-tan entre CAC no KPK kona-ba MoU ne’ebé asina hamutuk ona iha tinan 2014 iha Jakarta Indonesia.

Sorumutu ohin ho Ambassador Manik ne’e sei reforsa liu-tan servisu hamutuk entre ajénsia anti korrupsaun rai rua nian iha área prevensaun no investigasaun kriminál ba krime korrupsaun.

Sorumutu kortezia ida ne’e, Komisariu Sergio subliña katak, Embaxada Indonesia nia prezensa iha Timor-Leste importante tebes no bele fasilita liu-tan kooperasaun servisu entre CAC no KPK iha futuru hodi hamutuk luta prevene no kombate korrupsaun. Partikularmente iha lei nú. 7/2020- MPCC iha rejime deklarasaun rendimentu, bens no interese ninian.

Komisariu Sergio ko’alia mós ho Ambaxador Indonesia iha Timor, sei aproveita oportunidade balun hodi hasoru malu ho Xefe KPK hodi halo diskusaun ba asuntu deklarasaun rendimentu, bens no interese ninian.

“Espera katak, KPK bele sai referénsia ba CAC iha futuru” katak Komisariu Sergio.

Ambaxador Manik iha oportunidade mensiona katak, KPK ultrapasa ona esperiénsia lubuk ida iha nia instrumentu jurídiku nian ne’ebé sempre muda nia kompeténsia sira. Nune’e prontu atu partilla mós esperiensia sira ne’e hamutuk ho CAC Timor-Leste iha futuru.

Amabaxador Manik kompromitidu mós katak, sei kontinua halo kooperasaun di’ak ho CAC hodi fasilita halo komunikasaun ho KPK iha ámbitu luta prevene no kombate korrupsaun ninian.