Iha loron Kinta-feira (7/7) ne’e, Komisariu Comissão Anti-Corrupção (CAC) Sergio Hornai akompanha husi Komisaru Adjunto ba Asuntu Prevensaun no Sensibilizasaun Luis de Oliveira Sampaio no ekipa Espesialista Anti-Korrupsaun (EAK) halao viajen ba iha sub-rejiaun Nitibe no halao sorumutu ho estrutura autoridade sub-rejiaun Nitibe Regiao Administrativa Especial Oe-Cusse Ambeno (RAEOA) nian.

Sub-rejiaun Nitibe lidera husi jestor foun Teodoro Sila ne’ebe partisipa iha sorumutu nakonu ho amizade no fraternidade ne’e; reprezentante edukasaun (professor), Komandante Skuadra Polisia Nasional Timor-Leste (PNTL), SAS no Saude nian. Prezensa mos reprezentante husi Autoridade sentral RAEOA.

Viajen Senior Management CAC nian iha sub-rejiaun Nitibe loron ohin, revela mai CAC katak iha dis-igualidade dezenvolvimentu fiziku no infra-estrutura iha RAEOA hafoin ZEESM operasiona durante tinan ualo (iha rai Atoni ho alokasaun orsamentu boot kada tinan kompara ho munisipus seluk iha rai doben Timor-Leste.

Delegasaun CAC hare’e ho matan hahu husi Ponte Noefefan sub-rejiaun Pante Makassar nian too iha sub-rejiaun Nitibe Estrada sei kontinua la iha mudansa durante tinan 22 Timor-Leste ukun rasik-an.

Populasaun sub-rejiaun Nitibe hanesan mos ho sub-rejiaun seluk Oesilo no Pasabe seidauk goja orsamentu boot ne’ebé governu sentral Dili hahu tinan 2014 aloka iha RAEOA too tinan 2022.

“Nitibe seidauk goja nabilan hanesan sub-rejiaun Pante Makassar. Espera ba oin sub-rejiaun Nitibe mos bele goja nabilan,” Katak CAC Komisariu Sergio Hornai durante sorumutu.

Objetivu principal prezensa CAC nian iha RAEOA atu habelar informasaun kona-ba Lei Nu. 7/2020 – Medidas Prevensaun no Kombate Korrupsaun (MPCC) ba iha autoridade no jerente RAEOA nian fokus iha Deklarasaun Rendimentu Bens no Intereses (DRBI) nian hodi nune’e servidor povu sira iha RAEOA bele deklara rikusoi ho loloos.

Alem de haklaken informasaun kona-ba Lei MPCC, Komisariu Sergio no Komisariu Adjunto Luis Sampaio ho komitiva atu haree ho matan rasik no hetan dadus primer iha baze hodi konhese diak liu tan RAEOA laos iha Pante Makassar deit maibe to’o ba iha sub-rejiaun Nitibe ne’ebé iha fronteira terrestre no tasi ho Provinsia Nusa Tengara Timur (NTT) Republika Indonesia.

Sekretariu Jeral RAEOA ba Asuntu Administrasaun Martinho Abani Ellu iha sorumutu entre delegasaun CAC ho autoridade sub-rejiaun Passabe semana ne’e afirma prosesu tenderizasaun ba konstrusaun estrada husi Merkadu tradisional Tono to’o sub-rejiaun Oesilo no husi Ponte Noefefan Pante Makassar too suku Suni Ufe Nitibe iha ona prosesu tenderizasaun atu hahu konstroe iha tinan 2022 ne’e. (*)