𝗖𝗔𝗖 𝗦𝗼𝗿𝘂𝗺𝘂𝘁𝘂 𝗵𝗼 𝗞𝗔𝗙𝗜 𝗻𝗼 𝗦𝗘𝗝𝗗 𝗞𝗼𝗻𝗳𝗶𝗿𝗺𝗮 𝗣𝗿𝗼𝗴𝗿𝗲𝘀𝘂 𝗞𝗼𝗻𝘀𝘁𝗿𝘂𝘀𝗮𝘂𝗻 𝗘𝘀𝘁𝗮𝗱𝗶𝘂𝗻 𝗠𝘂𝗻𝗶𝘀𝗶𝗽𝗮́𝗹 𝗠𝗮𝗻𝗮𝘁𝘂𝘁𝗼

Comissão Anti Corrupção (CAC) liu husi Diresaun Prevensaun no Sensibilizasaun lideradu Diretor Rosario Araujo ho Enjineiru CAC nian na’in ida iha Kuarta-Feira (28/06) ohin hahú rekolla ona dokumentus projetu konstrusaun Estadiun Munisipál Manatuto.

Alein rekolla dokumentus projetu konstrusaun ida ne’e nian, ekipa mós ohin hasoru ona Diretora Konsellu Administrasaun Fundu Infraestrutura (KAFI) iha edifisiu Palasiu Guvernu nian no mós responsavel donu projetu sira iha SEJD hodi hala’o sorumutu konfirmasaun informasaun balun liga ho projetu ida ne’e.

CAC hahú hala’o sorumutu no rekolla dokumentus ba projetu konstrusaun Estadiu Munisipál Manatutu ne’e bazeia ba keixa balun husi komunidade, tanba projetu konstrusaun ba obra ida ne’e hahú konstroi kedas husi tinan 2014 até resente, maibé projetu la termina no dada naruk hela de’it.

Ekipa nia sorumutu ho instituisaun naka’it sira ne’e ho objetivu prinsipál buka tuir problema nia fukun loloos ne’ebé kauza projetu ida ne’e la la’o, desizaun KAFI no SEJD kona-ba kontinuasaun projetu ida ne’e, no rekolla dokumentus sira atu haree lákunas sira ne’ebé bele dezvia rekursu estadu nian ba finalidade seluk hodi lori estadu ba prezuizu.

Tuir informasaun ne’ebé ekipa prevensaun kriminál nian hetan ohin revela katak, projetu ida ne’e iha indikasaun ka poténsia ba krime tanba projetu halo tinan sia (9) ona hahú husi tinan 2014 to’o ohin loron la hotu hela de’it.

Ekipa sei halo analiza kle’an liu-tan dokumentu sira kontratu nian atu haree karik iha indisius krime sira korrupsaun nian no tempu balun sei tun ba terenu hodi haree mós projetu ne’e nia konstrusaun fiziku reál.