CAC Hala’o Sorumutu Kortezia ho Delegasaun PNUD

CAC Hala’o Sorumutu Kortezia ho Delegasaun PNUD

Comissão Anti-Corrupção (CAC) Tersa-feira (4/4) ne’e hala’o sorumutu kortezia ida ho reprezentante Programa Nasoens Unidas ba Dezenvolvimentu (PNUD) iha Edifisiu Sentral CAC Farol Dili.

Sorumutu kortezia ne’e lidera husi Komisariu Sergio Hornai akompaña husi Xefe Unidade Kooperasaun João do Rosario Correia no husi parte PNUD nian lidera husi Patrick Keuleers, International Consultant no Bruno Lencastre, Chief Technical Adviser.

Objetivu husi sorumutu kortezia ne’e hodi ko’alia kona-ba kontinuasaun kooperasaun servisu instituisaun rua nian. PNUD iha komitmentu di’ak hodi kontinua depozita sira nia asisténsia téknika mai iha CAC iha servisu prevensaun krime korrupsaun ninian.

Sorumutu ida ne’e, UNDP mai hala’o konsultasaun ida profundu hodi esplora idea sira relasiona ho servisu tékniku balun ne’ebé PNUD bele apóiu mai iha CAC. CAC partilla ona informasaun balun relasiona ho atividade sira ne’ebé halo no dezafiu ne’ebé hasoru iha ámbitu prevensaun krime korrupsaun nian.

Iha tinan kotuk, parte rua ko’alia ona kona-ba oinsá PNUD bele apóiu CAC iha dezenvolvimentu Estratejia Nasionál Anti-Korrupsau (ENAK) ninian. Konsultasaun ida ne’e, posibilidade sei haree fali asuntu ida ne’e iha futuru.

Alein ne’e, PNUD mós identifika ona área kooperasaun ne’ebé sei benefisia governu Timor-Leste tuir posibilidade kooperasaun manajementu PNUD nian. Espera identifikasaun hirak ne’ebé PNUD halo, bele iha kooperasaun di’ak atu ajénsia anti-korrupsaun Timor-Leste nian bele implementa iha tinan lima (5) mai.