Iha loron kinta-feira (30/3) ne’e, Komisariu Adjunto Comissão Anti-Corrupção (CAC) ba Asuntu Prevensaun no Sensibilizasaun Luis de Oliveira Sampaio lidera ekipa Espesialista Anti Korrupsaun (EAK) halaʾo diseminasaun Lei Nu. 7/2020 MPCC – Medidas Prevensaun no Kombate Korrupsaun (MPCC) ba Autoridade Lokál, estudantes no juventude Atabae Munisipiu Bobonaro.
Objetivu husi programa diseminasaun informasaun Lei MPCC atu hakbiit lider komunitariu, estudante no juventude sira ninian koñesimentu oinsa prevene no kombate korrupsaun no promove partisipasaun átivu iha suku no mos hato’o denunsia bainhira deteta indisu prátika krime korrupsaun.
Tema seminariu loron tomak ba lider komunitariu Atabae mak “Papel Lideres Komuniatria ba Prevene no Kombate Korrupsaun iha Timor-Leste” aprezenta Komisariu Adjunto Sampaio no Xefe Unidade Promosaun Integridade Leonilda Lobato.
Komisariu Adjunto Sampaio iha ninia intervensaun ba partisipante sira, importánsia husi diseminasaun Lei MPCC ba lider komunitariu no juventude iha Posto Administrativu Atabae atu familiariza ho lei MPCC atu sai lideransa ne’ebe iha integridade aas hodi evita an monu ba iha krime korrupsaun hodi la fo prejuizu ba Estadu.
Komisariu Adjunto Sampaio salienta, evolusaun luta kontra korrupsaun ohin loron, involve partisipasaun átivu ema hotu nian. Tamba ne’e, CAC lori lei MPCC mai toʾo iha komunidade nian leet atu konvense no konsiensializa komunidade liu-liu lider komunitariu, estudante no juventude sira nian partisipasaun hodi internaliza lei MPCC ba luta kolektivu kontra korrupsaun iha rai doben TL.
Diseminasaun ida ne’e mos dezafia koletivizasaun Timoroan sira nian atu junta forsa ba malu hodi rejeita hahalok korrupsaun no lori povu ba moris diʾak. Programa sensibilizasaun Lei MPCC ida ne’e konsiensializa Timoroan sira nia konsiensia kritiku atu iha movimentu nasionál ida atu kontra moras aat korrupsaun ba libertasaun povu ida ne’ebe sustentável, sem dezigualidade sosiál iha sosiedade.
“Lider komunitariu, estudante no juventude Atabae nian prezensa iha seminariu loron ohin hanesan forsa morál mai CAC atu konsolida malu iha luta kolektiva ba prevene no kombate korrupsaun,” Komisariu Adjunto Sampaio akresenta.
Iha fatin hanesan, Xefe Unidade Promosaun Valores no Integridade Leonilda Lobato afirma ba partisipantes sira katak, diseminasaun Lei MPCC mai to’o iha Atabae atu ajuda Estadu liu husi lider komunitariu no juventude sira nudar futuru lideransa nasional atu partisipa iha luta sagradu ida ne’e ba distinu nasaun nian di’ak iha futuru.
Partispante seminariu loron tomak kona-ba diseminasaun Lei Nu. 7/2020 MPCC nian iha Posto Adminsitrativu hamutuk liu na’in 100. (*)