Comissão Anti-Corrupção (CAC) nia Espesialista Anti-Korrupsaun na’in tolu durante loron rua (22-23) partisipa iha programa treinamentu online kona-ba siénsia forénsik iha asaun prevensaun, detensaun no investigasaun krime korrupsaun no krime koneksu sira ne’ebé organiza husi International Association of Anti-Corruption Authorities (IAACA).
International Association of Anti-Corruption Authorities (IAACA) organiza programa treinamentu online ne’e ho esforsu konjunta husi orgaun independente sira anti-korrupsaun nian husi Hong Kong, China, India, no Singapura no involve ajénsia anti-korrupsaun sira iha mundu hodi partilla esperiénsia ka koñesimentu profunda iha dimensaun oioin kona-ba análize digitál forensik no koñesimentu sira kona-ba profesionál sira anti-korrupsaun nian.
Programa treinamentu ida ne’e, palestrante sira partilla esperiénsia lubuk ida ne’ebé útil tebtebes, no oinsá tulun orgaun polisiál sira nia koñesimentu tékniku prevensaun no investigasaun nian, liu-liu estratejia no mekanizmu tékniku sira ba prevene no kombate krime korrupsaun ne’ebé mai ho tipu krime kompleksidade sira oioin.
Treinamentu ida ne’e haree liu-ba avansu teknolojia ohin loron, iha ne’ebé krime sira ho elementu dijitál sofistifikadu tebes no sai dezafiu boot ba orgaun polisiál sira, liu-liu ajénsia anti-korrupsaun sira iha mundu nia atuasaun sira ba asaun prevensaun no investigasaun ninian.
Hirak ne’e refleta ba dokumentu no evidénsia sira barak ne’ebé arkiva eletronikamente ohin loron. Nune’e presiza tebes orgaun polisiál sira nia koñesimentu, abilidade no konsiénsia nesesáriu sira atu rekupera, análiza no prezerva dadus sira iha dispostu eletróniku nian iha maneira sira oportunu no kompetente hodi iha dalan ba rezolve kazu sira ne’ebé orgaun polisiál sira investiga.
Durante treinamentu, asuntu espesifiku ne’ebé palestrante sira partilla iha programa treinamentu online ida ne’e maka; a) Aplikasaun siénsia forensik iha prevensaun, deteksaun no investigasaun kona-ba fraude no krime sofistifikadu sira, b) Analiza forensik, c) Crypto currency, d) Detensaun korrupsaun liu husi tékniku análiza finansiál, no e) akuntabilidade forénsika iha investigasaun ba kazu kompleksu sira korrupsaun nian.
Comissão Anti-Corrupção (CAC) hetan konvite husi Asosiasaun Internasionál Autoridade Anti-Korrupsaun (IAACA) ba oportunidade ida ne’e, liu husi despaixu Komisariu ba Diresaun Prevensaun-Sensibilizasaun no Investigasaun nian hodi nomeia kada Espesialista Anti-Korrupsaun na’in rua partisipa iha treinamentu ida ne’e. Espesialista Anti-Korrupsaun na’in rua; Mateus da Cruz no Leonia de Araujo maka partisipa másimu durante treinamentu espesiál ida ne’e nian.