Komisario Adérito partisipa iha Konferensia UNODC iha Marrakesh, Morroco.

Komisario Adérito partisipa iha Konferensia UNODC iha Marrakesh, Morroco.

Iha loron 24 to’o 28 fulan Outubro, 2011, Komisario Adérito J. Soares lidera delegasaun Timor-Leste partisipa iha Conference of State  Parties (CoSP-4) ba dahat iha sidade Marrakesh, Morroco ne’ebé organiza husi  United Nations Office of Drugs and Crime (UNODC). Timor-Leste sai hanesan membru ba CoSP desde ita ratifika Konvensaun Nasoens Unidas Kontra Korrupsaun (UNCAC) iha tinan 2009. Kuaze membru husi CoSP atus ida resin mak partisipa iha konferensia ne’e. Nune’e mós ONG no ajensia internasional barak mak partisipa iha konferensia ne’e.  Konferensia ne’e diskuti  asuntu barak inklui, asisténsia téknika ba implementasaun UNCAC iha nasaun balun, agenda prevensaun ba korrupsaun, esperiensia husi nasaun sira ne’ebé halo tiha self-assessment checklist (avaliasaun implementasaun UNCAC nian), no sst.

Durante konferensia ne’e, Komisariu Adérito mós halo enkontru informal ho delegasaun ADB  hodi koalia konaba Timor-Leste nia partisipasaun hanesan membru ba ADB/OECD Initiative on Anti Corruption. Nune’e mós Komisario hasoru malu ho Komisario Anti Korrupsaun husi Namibia nian hodi update konaba prosesu self-assessment checklist iha Timor-Leste. Timor-Leste halao hela prosesu self-assessment checklist ba implementasaun UNCAC nian. Namibia ho Fiji ho asistensia UNODC  mak sei sai avaliador ba implementasaun UNCAC iha Timor-Leste, tinan oin.

Komisariu Adérito hateten katak, ‘konferensia ne’e importante, tanba delegasaun Timor-Leste bele rona no aprende husi esperiensia nasaun barak ne’ebe  mak implementa uluk UNCAC nomós oinsa sira halao sira nian prosesu  self-assessment checklist hanesan ezersisiu ida hodi hare’e gap iha parte lejislasaun nomós implementasaun UNCAC nian’.  Komisario Adérito mós hateten katak liu husi konferensia ne’e, ‘Timor-Leste mós, li-liu CAC ne’ebé mak foin moris bele estabelese rede/networking ho komisaun no entidade husi nasaun seluk’.  Delegasaun Timor-Leste kompostu husi Komisario Adérito Soares, Adjunto Prokurador Dr. Vicente Brito no Sra. Atanasia Pires husi MNE.