Komisariu Comissão Anti Corrupção, Rui Santos lidera ekipa Prevensaun Kriminál CAC iha Kuarta-Feira (14/08) ne’e hala’o abertura ba atividade sensibilizasaun lei nú 7/2020 kona-ba Medida Prevensaun no Kombate Korrupsaun (MPKK) ba ajénte públiku sira iha munisipiu Ermera inklui setór privadu sira iha Salaun Administrasaun Gleno.
Objetivu husi eventu sensibilizasaun ida ne’e hodi hasa’e koñesimentu ajénte públiku no setór privadu sira iha munisipiu Ermera hodi sensibel no koñese di’ak liu ukun fuan no kontra bandu sira iha lei nú 7/2020-MPKK ne’ebé hatuur medida sira oinsá prevene krime korrupsaun nian iha instituisaun estadu no privadu sira no mós tipu krime korrupsaun sira ho nia sansionatoriu.
Komisariu Rui iha nia intervensaun abertura eventu sensibilizasaun ne’e aborda tipu krime korrupsaun sira ne’ebé hatuur iha lei nú 7/2020-MPKK. Partikularmente, Komisariu Rui fó enfaze liu ba tipu krime korrupsaun foun sira hanesan krime pose rikeza injustifikada, krime fraude iha konstrusaun, pekulatu no pekulatu uzu sira iha setór privadu.
Enkuantu, iha eventu importante ida ne’e, Diretór Jerál Prevensaun no Sensibilizasaun CAC, Rosario Araujo kontinua subliña tipu krime korrupsaun sira iha setór públiku no privada, liu-liu partilla ukun fuan sira kona-ba medida sira prevensaun korrupsaun nian inklui rejimentu deklarasaun rikusoin nian.