Ekipa prevensaun kriminál CAC lideradu Diretór Prevensaun Rosario Araujo no Xefe Unidade Promosaun Valór no Integridade, Leonilda Lobato ho Espesialista Anti-Korrupsaun (EAK) sira iha tersa-feira (13/08) ohin hala’o vizita lokál mai iha munisipiu Ermera.
Iha vizita ida ne’e, ekipa mai atu hala’o atividade prinsipál rua mak inspeksaun no monitorizasaun kona-ba jestaun rekursu sira iha sentru saude sira no projetu konstrusaun edifisiu balun, no sei hala’o mós atividade sensibilizasaun valór anti-korrupsaun no lei nú 7/2020 Medida Prevensaun no Kombate Korrupsaun ba kargu xefia no funsionariu sira iha kapital Gleno.
Iha viajen lokál ohin, ekipa konsege hala’o inspeksaun uluk ona iha sentru saude Railaco nian hodi rekolla informasaun no dadus sira kona-ba jestaun aimoruk, volume profesionál saude sira, jestaun atendimentu pasiente sira no fasilidade sira ne’ebé utiliza iha sentru saude ida ne’e nian.
Hafoin finaliza rekolla dadus no informasaun iha sentru saude ne’e, ekipa kontinua dezloka mai kapitál Gleno hodi prepara ba atividade sensibilizasaun nian iha kuarta-feira (14/08) aban no realiza atividade sharing ho alin estudante sira kona-ba introdusaun bázika korrupsaun iha eskola Sekundaria Vokasionál CMM Laulana Gleno nian.