Comissão Anti-Corrupção

Dili – Iha loron Segunda-feira (30/11) nee, Komisariu Comissao Anti Corrupcao (CAC) Dr. Sergio Hornai akompanha husi Komisariu Adjunto ba Asuntu Prevensaun no Sensibilizasaun Dr. Luis de Oliveira Sampaio, Diretor Prevensaun Dr. Rosario de Araujo Salsinha ho estrutura Espesialista Anti-Korrupsaun (EAK) iha Diresaun Prevensaun Korrupsaun halao diseminasaun Lei Nu. 7/2020 kona-ba Medidas de Prevenção e Combate a Corrupção (MPCC) ba funsionariu publiku sira iha instituisaun publiku rua (2) Servisu Rejistrasaun no Verifikasaun Emprezarial (SERVE) no Autoridade Atividde Ekonomika Sanitaria no Alimentar (AIFAESA) iha Salaun CNE Colmera Dili.

Diseminasaun Lei MPCC ne’e atu esplika ba Timoroan sira ne’ebé haknar an iha instituisaun Imprensa Publika (IP) importante rua ne’e bele informadu kona-ba Lei foun MPCC ne’e molok implementa iha loron 26 Fevereiru 2021.

Programa diseminasaun informasaun kona-ba lei MPCC ho topiku “Hasae Konhesimentu Ajente Publiku Kona-ba Lei MPCC” ba Servidor Estadu sira iha instituisaun SERVE no AIFAESA ne’e bele aumenta sira nian konhesimentu atu servi povu no nasaun doben Timor-Leste diak liu. Programa ida ne’e mos espera sei haklean funsionariu tekniku sira nian konsiensia hodi servi povu no nasun doben Timor-Leste ho dignu, tane honestidade, akuntabilidade, transparante no responsabilidade diak iha servisu fatin.

Lei MPCC ne’ebé na’i prezidenti Republika Dr. Francisco Guterres Lu-Olo promulga iha fulan Agosto liu ba fo biban ba Timoroan sira atu respeita ninian dignidade nudar ema ho abilidade diak iha servisu fatin servi povu no nasaun Timor-Leste hodi evita an monu ba iha tentasaun krimi korrupsaun.

Iha oportunidade ne’e, Komisariu CAC Sergio Hornai focus esplika ba iha partispantes hamutuk liu 150 husi Instituisaun Estatal Autonoma rua ne’e;  Kapitulu II DEKLARASAUN BENS e INTERESES hatuut iha artigu 27 too artigu 58 Lei MPCC.

 Komisariu Sergio esplika ba partisipantes sira katak artigu 27 too artigu 58 Lei MPCC ne’e obriga ajente publiku atu deklara obrigatoriamente sira ninian salariu mensal, rikusoi eransa no interese “kreditu-utang piutang” iha banku, impresta entre individu ho individu no individu ho kooperativas ruma ho ninian funan sira.

“Deklarante ne’e mak se? Deklarante mak Koordenador Jeral, Diretor Ezekutivu ho estrutura kargu chefia sira no ema sira ne’ebé mak seisu iha area zona “omidas” lahan basah hanesan iha aprovizionamentu, finansas maske sira la assume kargu ruma. Sira iha responsabilidade ((obrigatoriu) atu deklara sira ninian rendimentu, sira ninian bens, sira ninian intereses ba iha autoridade kompetente,” Komisariu esklarese ba partispantes sira.

Iha oportunidade ne’e, Chefe Unidade Estudu Avaliasiaun e Riskus Dr. Cirilio Abi esplika b partisipantes sira ho antusismu boot kona-ba format deklarasaun rikusoi, bens no intereses.

Hafoin disemina lei MPCC ba funsionariu publiku SERVE no AIFAESA, Komiaun sei ba halo esplikasun materia hanesan ba Ministeriu Planeamentu no Ordenamentu Teritoriu iha Gabinete Vice-Primeiru Ministru Eng. José Reis nian iha loron 2 Dezembro. (*)

Loron 28 Novembro 2020 ohin, Timoroan sira selebra Proklamasaun Independensia 28 Novembro 1975 ba dala 45 ho Isar Bandeira Nasional iha Lauhata Munisipiu Liquiça.

Senior Management Comissão Anti Corrupção (CAC) kompostu husi Komisariu Dr. Sergio Hornai, Komisariu Adjuntuos Dr. Augosto Castro, Dr. Luis Sampaio, Dr. Alexandre Freitas ho estrutura ezekutivu CAC nian tomak hakarak hatoo parabens ba selebrasaun Loron Independensia 28 Novembro 1975 ba Dala 45 hamutuk ho povu doben Timor-Leste.

Senior Management CAC ho EAK sira hakarak fahe ksolok loron importante ohin ho maluk Timoroan feto no mane sira iha teritoriu Timor laran tomak hakarak presta homenajen ba memoria Asswai’n Fundador Estadu Timor-Leste (TL) no Kontinuador sira nian iha loron historiku ida ne’e.

Komisaun ho ninian estrutura tomak hamutuk ho povu doben Timor-Leste hakruk ba memoria orgulhuju Asswain lider fundador nasaun RDTL Proklamador Françisco Xavier do Amaral, Primeiru Ministru Nicolau Lobato ho Primeiru Governu Konstitusional 1975 nian ne’ebé deklara unilateralmente independensia Republika Demokratika Timor-Leste (RDTL).

Senior Management CAC ho Espesialista Anti-Korrupsaun (EAK) sira mos ksolok wain selebra loron ida ne’e nudar parte importante iha jerasaun kontinuador sira hamutuk ho Asswain FALINTIL iha Frente Armada, Juventude Lorico Asswain iha Frente Clandestine no Frente Diplomasia iha luta libertasaun nasional durante okupasaun illegal militar estranjeiru.

Ho ispiritu komemorasaun ba dala 45 ita ninian independensia, Senior Management CAC hakarak kontinua husu ba maluk Timoroan sira atu hametin nasionalismu no patriotismu hodi evita an monu ba tentasaun krimi korrupsaun iha servisu fatin nudar simbolu respeitu ba ita ninian Asswain Lutador sira ninian sakrifisiu ba rai ida ne’e nian independensia.

Rai ida ne’e, ohin hamrik hanesan nasaun soberanu no tinan-tinan ita selebra loron historiku sira ne’e tamba ita ninian martires sira nian sakrifisiu ho ruin no ran. Ho ida ne’e, atu selu Asswai’n Martires sira ninian sakrifisiu, kontribuisaun no sofrementu ba independensia total sira ne’e mak prense Ukun Rasik-An ho HADOK AN HUSI PRATIKA KRIMI KORRUPSAUN.VIVA PROKLAMASAUN INDEPENDENSIA 28 Novembro

1975Viva Asswai’n Lutador sira

Viva RDTL

Hera – Magnifiku Reitor Universidade Nasional Timor Lorosa’e (UNTL) Prof. DR. Francisco Martins hatoo agradesimentu wain ba Komisariu Comissão Anti-Corrupção (CAC) Dr. Sergio Hornai ho ninian komitiva ne’ebé halao programa diseminasaun Lei Nu. 7/2020 kona-ba Medidas Prevensaun no Kombate Korrupsaun (MPCC) ba korpus dosentes no dirijente senior sira. Maibe, loron ida seidauk sufisiente hodi loke horizonte dirijente senior UNTL nian atu monu ba iha tentasaun krimi korrupsaun.

“Lori Instituisaun UNTL nian naran hakarak hatoo agradese wain teb-tebes ba ita nian Komisariu (CAC Dr. Sergio Hornai) ho ninian komitiva tomak ne’ebé mai disemina konaba lei ida ne’ebé importante teb-tebes iha ita nian rai para atu (prevene no) kombate korrupsaun. Maibe, loron ida deit seidauk too,” Katak Magnifiku Reitor UNTL Prof. DR. Françisco Martins iha ninian intervensaun enseramentu workshop loron ida kona-ba lei MPCC Sesta-feira (27//11) loraik ne’e iha kampus Fakuldade Enjinaria UNTL Hera Dili.

Magnifiku Reitor Martins mos promete ba Komisaun no povu doben Timor-Leste atu prontu hamutuk ho servidor publiku sira iha UNTL hodi implementa lei MPCC ne’e iha servisu fatin ba future jerasun foun Timorense nian sei mai.

Magnifiku Reitor Martins afirma iha ninian lia enseramentu katak diseminasaun durante loron ida la sufisiente ba ninian subordinadu sira. Nune’e, nia promote atu konvida fila fali “manu-ain” Komisaun nian atu halo esplikasaun klean liu tan asuntu deklarasaun riku nian iha oportunidade seluk iha future.

Pratika krimi korrupsaun katak Magnifiku Reitor Martins, ladiak no estraga jerasaun foun nian future. Ho nune’e, nudar professor, formador, aman no inan ne’ebe haknar an servi povu no nasaun doben Timor-Leste iha instituisaun superior Estatal UNTL tenki tane aas honestidade, transparensia, responsabilidade no akuntabilidade iha servisu fatin.

Oportunidade loron ohin Magnifiku Reitor UNTL Francisco Martins re-affirma seidauk sufisiente atu loke neon no horizonte servidor povu sira nian iha UNTL atu evita an monu ba tentasaun krimi korrupsaun.

Magnifiku Reitor Martins lori UNTL ninian naran husu disponibilidade Komisariu Sergio Hornai ho Espesialista Anti-Korrupsaun (EAK) sira atu iha future bele partilha klean liu tan kona-ba lei MPCC ne’e ba dosentes permanenti besik 500, 400 resin tekniku administrative permanente, 600 professor vizitantes no 40.000 universitarius. 

“Informasaun ne’ebe ohin hatoo seidauk too. Ami sei husu nafatin ita boot (Komisariu ho EAK) sira atu mai esplika tan atu nune’e ami bele intende didiak. Laos mai ami sira ne’ebé ohin presente iha ne’e deit maibe ba ami nian tekniku administrativas no korpu dosente sira para aban-bainrua sira (troka ami) assume responsabilidade ida ne’e karik! Sira hatene ona lei ida ne’e para evita (sira monu ba iha tentasaun pratika krimi korrupsaun),” Magnifiku Reitor UNTL Prof. DR. Francisco Martins hatutan teni.

“Agradese ba Senhor Komisariu Dr. Sergio ho ninian komitiva mai halo oma diseminasaun mai ami. Nudar aman, inan, treinador tenki sai izemplu ba dezenvolvimentu nasional (nian diak),” Magnifiku Reitor UNTL afirma.

Semana oin, Espesialista Anti-Korrupsaun (EAK) sira sei desloka ba iha munisipius sira hodi organiza programa diseminasaun informasaun konaba Lei MPCC ne’e. Munisipius sira ne’ebé sei hetan oportunidade primeiru ba programa ne mak; Munisipius Aileu, Manatuto, Ermera no Liquica. (*)

Hera – Komisariu Comissão Anti-Corrupção (CAC) Dr. Sergio Hornai lidera ekipa Komisaun kontinua halao programa diseminasaun Lei Nu. 7/2020 kona-ba Medidas Prevensaun no Kombate Korrupsaun (MPCC) ba dirijente senior Universidade Nasional Timor-Lorosa’e (UNTL) nian ne’ebé realiza iha loron Sesta-feira (27/11) iha  kampus Fakuldade Enjinaria UNTL Hera Dili.

Komisariu Sergio husu ba dirijentes senior UNTL nian sira atu sai jerente publiku ezemplar ba implementasaun Lei MPCC iha Timor-Leste. Tamba, UNTL nudar ensinu superior Estatal ne’ebé tinan-tinan simu no forma jerasaun foun future luderansa nasional Timorense nian atu simu taru estafeta lider nasional nian iha future ba luta kolektiva kontra korrupsaun.

“UNTL tenki kolabora ho Komisaun hodi sai instituisaun ida espelhu ba instituisaun publiku sira iha Timor-Leste hodi promove boa-governasaun, transparansia, akuntabilidade, responsabilidade no honestidade iha servisu fatin,” Katak Komisariu Sergio iha ninian intervensaun.

Komisariu Sergio Hornai hateten programa sensibilizasaun ida ne’e atu Komisaun ho servidor povu sira ne’ebé haknar an iha Instituisaun UNTL bele partilha informasaun ba malu hodi kontribui ba boa-governasaun ida diak nune’e bele hametin transparensia, akuntabilidade no responsabilidade iha funsionalismu funsaun publiku.

“Ho esforsu Terseira Mandatu Komisariu nian ne’e, espera UNTL bele sai parseira ida diak hamutuk ho ensinu superior sira seluk atu ninian ajentes operadores (senior) sira labele sujeita ba iha aktu irregularidades no possiblemente lori (sira) ba iha aktu krimi korrupsaun ninian. Ikus mai, tenki simu responsabilidade civil no kriminalidade ninian,” Tenik Komisariu Sergio.  

Molok hahu programa sensibilizasaun ne’e, Magnifiku Reitor UNTL Prof. DR. Francisco Martins akompanha husi Diretor Geral UNTL nian Dr. Lourenço Rodrigues lori estrutura akademiku UNTL nian simu Komisariu Sergio tuir tradisaun Timorense nian ho tara tais molok hahu programa diseminasaun.

Komisariu Sergio lori instituisaun nian naran agradese ba Magnifiku Reitor UNTL Prof. DR. Francisco Martins ho ninian estrutura tomak ne’ebé ho laran kmanek simu konvite hodi realiza programa ne’e ho diak ba dirijente principal UNTL nian tomak.

Dirijente principal UNTL ne’ebé atende programa sensibilizasaun lei MPCC ne’e kompstu husi Reitor, Vice-Reitor, Pro-Reitor, Dekanus, Vice-Dekanu, Administrador Geral ka Director Nasional, Chefe Departamentu, Vice Diretur Departamentu, Director Jeral no Chefe Seksaun sira hamutuk besik 100.

Programa Komisaun nian ho topiku “Hasae Konhesimentu Ajente Publiku Kona-ba Lei MPCC” ba Servidor Estadu sira iha UNTL hamutuk besik 100 ne’e modera husi Diretor Prevensaun no Sensibilizasaun Dr. Rosario de Araujo Salsinha. Partisipantes ho antusiasmu boot tuir esplikasaun Komisariu Sergio nian too remata. (*)