Dili – 04/06/2013—Iha loron-29 fulan-Maiu 2013 liu ba, iha sorumutu Implementation Review Group (IRG) ba Konvensaun Nasoens Unidas kontra Korrupsaun (UNCAC) ba dala-hat (4) iha Vienna, Komisáriu CAC Adérito de Jesus Soares halo aprezentasaun kona-ba progresu servisu anti-korrupsaun no fahe esperiensia kona-ba prosesu halo Auto-Avaliasaun/Self-Assesment ba implementasaun UNCAC iha Timor-Leste.
Iha palestra ne’e, Komisáriu Adérito halo aprezentasaun hamutuk ho komisáriu anti-korrupsaun husi nasaun Sierra Leonia no reprezentantes husi nasaun Rusia no USAID. Aprezentasaun Komisáriu nian ne’e hetan apresiasaun bo’ot husi reprezentantes husi Estadu Parte sira nomos husi Sekretáriadu UNCAC nian iha Vienna.
Hahu husi tinan 2011, tinan-tinan, Komisaun Anti-Korrupsaun reprezenta Estadu Parte Timor-Leste ba partisipa sorumutu kona-ba implementasaun UNCAC nian. Sorumutu annual ne’e nia objetivu mak atu avalia prosesu no progresu kona-ba Estadu Parte sira nia esperiensia implementasaun UNCAC iha nasaun ida-idak.
Iha sorumutu IRG tinan ida ne’e, Komisáriu CAC hetan akompanhamentu husi Embaixador Timor-Leste ba Bruxelas, Nelson do Santos no membrus delegasaun husi CAC.
Komisáriu Adérito ho nia ekipa husi CAC fila hikas mai Timor-Leste iha loron-Sigunda horiseik.