Komisariu Sergio no Estrutura EAK Partilla Sistema Deklarasaun Rikusoin Iha Defensoria Públika

Komisariu Comissão Anti-Corrupção (CAC) Sergio Hornai lidera ekipa rejistu deklarasaun rikusoin iha Tersa-Feira (27/09) ohin realiza sorumutu sesaun partilla koñesimentu tékniku sistema Deklarasaun Rendimentu, Bens no Interese (DRBI) ho plataforma online ba Defensoria Públika Jerál ho nia Adjunta, Superior Sekretariadu, Inspector Munisipál no ofisiál sira iha salaun edifisiu Defensoria Públika, Balide Dili.

Komisariu Sergio akompaña direta sesaun ida ne’e no aproveita oportunidade ne’e hodi introdus komprehensivu kona-ba Espiritu lei nú 7/2020-Medida Prevensaun no Kombate Korrupsaun, liu-liu iha rejime jurídiku Deklarasaun Rendimentu, Bens no Interese ninian.

Iha okaziaun ne’e, Komisariu Sergio esplika mós kona-ba Timor-Leste nu’udar Estadu parte husi konvensaun UNCAC nian ne’ebé adopta ona boas prátika sira husi rai seluk nian iha medida sira ba prevensaun korrupsaun, hanesan medida rejime deklarasaun rikusoin ne’ebé dadaun ne’e Estadu  Timor-Leste opta no Komisaun implementa hela.

Komisariu Sergio Hornai ba estrutura Defensoria Públika katak, lei MPCC mosu tanba korrupsaun nu’udar krime ekstra-ordinariu no mai ho natureza kompleksidade oioin. Krime ida ne’e presiza iha tratamentu ekstra-ordináriu ida, tanba ne’e lei MPCC iha rejime DRBI ne’e mai nu’udar instrumentu espesiál, ekstra-ordináriu no estruturalmente bele uza ba prevene no kombate krime korrupsaun.

Komisariu Sergio hatete tan katak, rejime juridiku DRBI ne’e ninia Espiritu prevensaun boot tebes, tanba instrumentu juridiku ida ne’e mai atu prevene ajénte públiku sira husi konflitu interese, proteze personalidade ajénte públiku sira husi alegasaun falsa sira, no hanorin ajénte públiku sira atu servisu ho transparante, responsavel no honestu.

“lei ida ne’e mai atu deteta rikusoin sira ne’ebé ema na’ok no subar no lei ne’e mai atu hasa’e ita nia integridade”, Komisariu Sergio hatete.

Komisariu Serio iha oportunidade ne’e mós husu ba estrutura tomak Defensoria Publika nian atu komprimenta de’it ba Lei MPCC hodi deklara sira nia rikusoin, tanba lei MPCC ho nia karakter obrigatóriu, no la iha razaun ba ema ida atu la deklara nia rikusoin.

Permanent link to this article: https://cac.tl/2022/09/komisariu-sergio-no-estrutura-eak-partilla-sistema-deklarasaun-rikusoin-iha-defensoria-publika/