CAC Partilla Koñesimentu Tékniku Sistema Deklarasaun Rikusoin Iha KomJer PNTL

Komisariu Adjuntu Comissão Anti-Corrupção (CAC) ba Asuntu Prevensaun no Sensibilizasaun, Luis de Oliveira Sampaio akompaña husi ekipa responsavel Deklarasaun Rendimentu, Bens no Interese Antonino Alves no Espesialista Anti-Korrupsaun (EAK) sira iha Sesta-Feira (09/09) ohin partilla koñesimentu tékniku kona-ba prensimentu deklarasaun rikusoin iha sistema plataforma online nian ba estrutura Komando Jerál PNTL no nia membru investigadór sira iha salaun PNTL Caicoli, Dili.

Atividade partilla koñesimentu ba prensimentu deklarasaun rikusoin ne’e realiza bazeia ba pedidu Komando Jerál PNTL nian ne’ebé husu Komisaun hodi esplika ho komprensivu liu-tan prosesu prensimentu deklarasaun rikusoin liu husi Plataforma online ba estrutura PNTL nian ne’ebé sujeita ba rejime DRBI nian, liu-liu hasa’e sira nia koñesimentu tékniku ba sistema ida ne’e hodi deklara sira nia rikusoin mai iha CAC.

Komisariu Adjuntu Sampaio prezensa mós iha sorumutu ida ne’e hodi hato’o mós liafuan badak kona-ba politika Estadu nian ba hamosu Lei MPCC, prtikularmente iha rejime Reklarasaun Rendimentu, Bens no interese (DRBI) ninian.

Adjuntu Sampio ba estrutura PNTL nian hatete, lei nú. 7/2020-MPCC, partikularmente iha rejimentu deklarasaun rikusoin nian hatuur vizaun estratéziku Estadu nian ne’ebé refleta ba aspirasaun no mehi boot povu nian ba moris di’ak, no refleta mós vizaun Estadu nian ba politika prevensaun krime korrupsaun iha TL.

Adjuntu Sampaio subliña katak, Estadu hamosu Lei MPCC hatudu sentidu boot Estadu nian kona-ba oinsá proteze nia sidadaun sira ne’ebé haknaar-an iha instituisaun Estadu atu la monu ba tentasaun sira krime korrupsaun nian no lei ida ne’e partikularmente iha rejime deklarasaun rikusoin nian fó énfaze ba medida prevensaun, enkuantu medida represivu nu’udar opsaun últimu .

“Lei ne’e reprezenta hanoin boot sira Estadu nian katak, rekursu sira Estadu aloka ba servisu sira represivu, ita hanoin de’it hatama ema ba kadeia, tanba de’it neglizénsia ka auzénsia koñesimentu, no ida ne’e mós Estadu lakon rekursu barak ba ema sira ne’e, tanba Estadu tenke finansia sira nia vida durante iha prizaun. Ida ne’e halo Estadu lakon dobru, no Estadu hakarak muda ita nia pensamentu, ita konsentra ba medida sira prevensaun, no medida represivu nu’udar opsaun últimu”, katak Adjuntu Sampaio.

Adjuntu Sampaio subliña liu tan katak, Estadu introdus lei MPCC nu’udar instrumentu estratéziku no poderozu tebes, ne’ebé bele prevene no kombate korrupsaun nu’udar evolusaun ne’ebé akontese iha nasaun sira seluk. Tuir relatóriu Banku mundiál nia relata katak, kuaze nasaun 160 resin ona mak opta Sistema ida ne’e no lori susesu boot ba prevene no kombate korrupsaun iha sira nia rain.

“Estudu sira iha rai seluk mós hatudu katak, rejime deklarasaun rikusoin ne’e nu’udar mós intrumentu estratéziku ida promove transaparánsia públiku no konfiansa públiku nian ba ajente públiku sira Estadu nian no mós promove integridade instituisaun Estadu”, Adjuntu Sampaio akresenta.

Permanent link to this article: https://cac.tl/2022/09/cac-partilla-konesimentu-tekniku-sistema-deklarasaun-rikusoin-iha-komjer-pntl/