Senior Management CAC Halao Sorumutu Serial ho Autoridade Judisial, Defensor Publika no Komandante PNTL RAEOA

Iha loron Kuarta-feira (6/7), Komisariu Comissão Anti-Corrupção (CAC) Sergio Hornai akompanha husi Komisaru Adjunto ba Asuntu Prevensaun no Sensibilizasaun Luis de Oliveira Sampaio halao sorumutu serial ho autoridade judisiariu Regiao Administrativa Especial Oe-Cusse Ambeno (RAEOA); Meritisimu Juiz Administrador Tribunal, Prokurador Republika, Defensor Publiku no Komandante PNTL RAEOA Mateus Assuncào Mendes.

Dahuluk Senior Management CAC halao sorumutu ho Administrador Tribunal Meritisimu Doutor Juiz Hugo da Cruz Pui no Doutor Juiz Yudi Pamungkas no Prokurador Republika Doutor Mateus Nessi no doutor Pedro Baptista Aleixo dos Santos.

Hafoin sorumutu ho instituisaun judisiariu rua ne’e, iha tempu diferente Komisariu CAC Sergio ho komitiva halao sorumutu mos ho Defensor Publiku no Komandante Polisia Nasional Timor-Leste (PNTL) Mateus Assunção Mendes.

Objetivu prinsipal husi sorumutu kortezia serial ho Meritisimu Juiz, Prokurador Republika, Defensoria Publika no Komandante PNTL RAEOA nian ne’e atu hametin linha kooordenasaun servisu iha area justisa formal nian ba luta kolektiva kontra korrupsaun.

Komisariu Sergio Hornai esplika ba lider instituisaun hirak ne’e kona-ba objetivu prinsipal vizita official delegasaun CAC nian iha RAEOA durante semana ida iha ne’ebé atu haklaken informasaun Lei Nu. 7/2020 – Medidas Prevensaun no Kombate Korrupsaun (MPCC) ba iha autoridade no jerente RAEOA nian focus iha Deklarasaun Rendimentu Bens no Intereses (DRBI) hodi nune’e bele deklara rikusoi ho loloos.

Vizita kortezia Senior Management CAC nian ne’e mos atu espresa CAC ninian solidaridade ba servisu todan ne’ebé orgaun judisial, polisia no Defensor Publiku RAEOA nian assume nudar responsabilidade todan iha area justisa formal nian hodi oferese ba povu doben Oecusse.

“Sorumutu serial ida ne’e atu enkoraja instituisaun judisial, defensoria publika no PNTL atu hametin liu tan kooperasaun hirak ne’ebé ezisti tiha ona tuir MoU ne’ebé asina ona entre instituisaun rua; CAC no PNTL. Ami ninian prezensa atu kontinua reafirma no fo hanoin ba malu hodi hakloot pratika krimi korrupsaun akontese iha RAEOA,” Katak Komisariu Sergio Hornai.

Komandante PNTL RAEOA Assunção Mendes informa ba Komisariu CAC no Adjunto afirma lori pessoal no instituisaun PNTL RAEOA nian prontidaun atu kolabora ho CAC iha luta kolektiva kontra praktika kriminalidade korrupsaun. (*)

Permanent link to this article: https://cac.tl/2022/07/senior-management-cac-halao-sorumutu-serial-ho-autoridade-judisial-defensor-publika-no-komandante-pntl-raeoa/