Workshop Avaliasaun Rísku Korrupsaun iha Aprovizionamentu Setór Saude Sei Sai Ezemplu Ba Luta Kontra Korrupsaun Iha TL

Sua Exelensia Ministra Saude (MS) Dra. Odete Maria Freitas Belo hatete, semináriu avaliasaun rísku korrupsaun iha aprovizionamentu setór saude iha Timor-Leste sei sai ezemplu di’ak iha instituisaun Estadu iha luta kontra korrupsaun iha rai doben Timor-Leste.

Sua Exelencia Ministra Saude, Dra. Odete Maria Freitas Belo hato’o lia hirak ne’e, bainhira hala’o abertura ba Workshop internasionál ho tema “Avaliasaun Rísku Korrupsaun iha aprovizionamentu Setór Saude iha Timor-leste” ne’ebe organiza husi CAC no UNODC Segunda-Feira (06/06) ohin iha salaun Otél Timor, Dili.

Ministra Saude Odete M. F. Belo husu ba kargu xefia no funsionáriu sira iha Ministériu Saude nian ne’ebé partisipa iha eventu ne’e, liu-liu sira ne’ebé servisu iha área aprovizionamentu atu aproveita opportunidade ne’e hodi hasa’e indikadór xave sira ne’ebé presiza utiliza hodi sukat risku korrupsaun iha instituisaun ne’ebé ajente sira ne’e hakaar-an ba.

Aproveita didi’ak oportunidade ne’e hodi bele kontribui di’ak liu-tan ho peritu sira husi CAC no organizasaun internasionál sira. Hasa’e indikadór xave ne’ebé ita presiza utiliza hodi sukat rísku iha ita nia instituisaun. Semináriu ida ne’e, saude bele sai ezemplu di’ak iha luta hasoru korrupsaun iha ita nia rai doben Timor-Leste”, katak Sua Exelencia Ministra Saude iha nia abertura.

Workshop avaliasaun rísku korrupsaun iha aprovizionamentu setór saude iha Timor-Leste nu’udar oportunidade di’ak hodi kontribui koñesimentu ba kargu xefia no funsionariu sira iha Ministériu Saude hodi partilla esperiénsia no koñesimentu ba malu kona-ba rísku no ameasa sira korrupsaun ninian ne’ebé enfrenta iha Ministériu Saude (MS), partikularmente iha servisu aprovizionamentu ninian, nune’e bele hatene halo prevensaun no mitigasaun hodi la fó biban ba krime korrupsaun akontese iha futuru.

Ministra Saude Odete Maria Freitas Belo akresenta, korrupsaun nu’udar aktus ne’ebé relasaun ho lei, norma sira, no regulamentu lejislativu sira ne’ebé estabelese iha administrasaun públika Estadu nian, iha ne’ebé funsionáriu (ajente públiku sira) iha dever síviku tenke kumpre.

korrupsaun iha ligasaun ho dokumentu sira, la’os ba ema sira ne’ebé prokil sasan, maibé ita nafatin hatene katak, bainhira ita la kumpre ona lei, regra ne’ebé iha ka lejislasaun ne’ebé iha, hakarak ka lakohi ita tenke ba hatan. Depende sé mak konvida ita ba hatan! Ba iha CAC, iha Ministériu Públiku (MP), ne’e la signifika katak sala, maibé ita tenke hatene hatan, saida mak ita tenke hatene hatan, hatan ba saida maki ta halo”, Ministra Odete hatutan liu-tan.

Enkuantu partisipante iha eventu workshop ohin partisipa másimu husi kargu xefia no funsionariu aprovizionamentu sira husi Ministériu Saude no instituisaun orgaun kontrolu sira no ajénsia internasionál sira mós. (*)

Permanent link to this article: https://cac.tl/2022/06/workshop-avaliasaun-risku-korrupsaun-iha-aprovizionamentu-setor-saude-sei-sai-ezemplu-ba-luta-kontra-korrupsaun-iha-tl/