Programa Sensibilizasaun Tipu Krime Korrupsaun: Kadi Ajente Públiku Sira nia Hanoin no Konsiénsia Hodi La Monu ba Krime Korrupsaun

Komisariu Adjuntu Comissão Anti-Corrupção (CAC) ba Asuntu Prevensaun no Sensibilizasaun, Luis de Oliveira Sampaio Kinta-Feira (02/06) semana ne’e hala’o sensibilizasaun materia krime Korrupsaun ba Funsionáriu públiku sira iha iha atividade workshop loron ida ne’ebé organiza husi ekipa Quadrilaterál CAC, PDHJ, CFP no IGE iha Salaun Administrasaun Munisipiu Manatuto.

Workshop loron ida ne’e ho tema “Prevene no Kombate Korrupsaun Hodi Promove Governasaun Di’ak no Proteje Direitus Humanus iha Servisu Administrasaun Públika”.

Komisariu Adjuntu Sampaio iha nia intervensaun katak, programa sensibilizasaun ba funsionariu públiku sira nu’udar atividade interaksaun regular ida entre CAC no ajénte públiku sira iha Munisipiu atu kadi nafatin funsionáriu Administrasaun Munisipál sira nia hanoin no fanu sira nia konsiénsia kona-ba tentasaun aat prátika tipu krime korrupsaun nian ne’ebé hatuur iha lei Kodigu Penál no Lei MPCC.

Komisariu Adjuntu Sampaio esplika katak, CAC nia misaun mak prevensaun, sensibilizasaun no investigasaun. Servisu Prevensaun no Sensibilizasaun nian, CAC sempre hakbesik ho Funsionariu Públiku sira atu fó hanoin, hatudu dalan loos hodi la halo korrupsaun.

“CAC ne’e la’os ita boot sira nia inimigu. CAC ne’e instituisaun Estadu, parseiru ita boot sira nian atu ajuda ita boot sira hodi fó hanoin, motiva, no rekomenda ita boot sira atu la monu ba tentasaun aat sira kona-ba krime korrupsaun ninian. CAC hakbesik ho ita boot sira atu fó hanoin oinsá promove governasaun ida di’ak, hahoris no haboot ita boot sira nia integridade, no fó hanoin ita boot sira atu halo tuir kompeténsia sira tuir de’it lei”, Katak Adjuntu Sampaio.

Programa sensibilizasaun Comissão Anti-Corrupção ba funsionáriu públiku sira iha Munisipiu nu’udar dever Comissão Anti Corrupção ninian hodi loke servidór públiku sira nia orizonte atu jere administrasaun públiku ida moos, eficaz no efisiente. Nune’e mós haluan funsionáriu públiku sira nia neon no konviksaun ida forte ba prevene-an monu ba krime sira korrupsaun ninian.

Workshop loron ida ohin, Komisariu Adjuntu Sampaio fokus esplika ba partisipantes sira kona-ba konseitu bázika korrupsaun no tipu sira korrupsaun ninian, liu-liu krime tuan sira ne’ebé altera ona husi lei kódigu penal no krime foun sira iha lei Medida Prevenção no Combate Corrupção (MPCC) hanesan; Abuzu Poder, Partisipasaun Ekonomia iha Negósiu, Pekulatu Uzu, Subornu, Konflitu Interese, Brankeamentu Kapitál, Fraude Konstrusaun, pekulatu iha setór privadu, Pose Rikeza Injustifikada, no tipu krime korrupsaun Fraude Fiskál.

Permanent link to this article: https://cac.tl/2022/06/programa-sensibilizasaun-tipu-krime-korrupsaun-kadi-ajente-publiku-sira-nia-hanoin-no-konsiensia-hodi-la-monu-ba-krime-korrupsaun/