Intervensaun Kompletu Komisariu Adjunto CAC Augosto Castro nian iha Sesaun Trabalhu Integradu kona-ba “Jestaun Patrimoniu Estadu ida ne’ebe Efisiente no Rigorozu hodi Kontribui baBoa-Governasaun iha Administrasaun Publika” iha Salaun Lalini Lariguto, CNE Colmera Dili

Nudar ita hotu hatene akontesimentu hahalok korrupsaun iha setor publiku konsidera nudar dezastre neébe mak fo impaktu makaás ba kresimentu dezenvolvimentu neébe sustentavel, tanba setor publiku neébe mak nudar fatin konsentrasaun rekursus hotu-hotu estadu nian hodi uza ba estimula no jere dezenvolvimentu ekonomia no sosial pais ida nian sei mohut no naben let deit bainhira ajente servidor publiku sira neébe mak halo funsaun nudar jerente aproveita ninia funsaun hodi desvia rekursu estadu nian refere ba ninia interese individual ou grupu nian.

Timor-Leste neébe mak ninia ekonomia kuaze depende ba iha investimentu no despeza publiku nian iha risku ba insustentabilidade ninia rekursu sira se bainhira setor publiku la hadia ninia an hodi ses tiha husi hahalok korrupsaun sira.

Tanba hahalok korrupsaun neébe mak pratika husi agente servidor publiku sira bele fo prejuizu imediatu ba estadu nomos ninia konsekuensia sira sosiedade bele sofre ba tempu neébe mak naruk, ho lia-fuan seluk karik bele hatete katak, “ema ida ninia hahalok fo terus ba ema inosente barak ba tempu naruk”.

Tuir dadus husi Comissão Anti-Corrupção (CAC) neébe mak relata iha ninia relatoriu annual sira hatudu katak, durante tinan lima ikus neé krime korrupsaun neébe mak mais kometidu husi agente publiku sira mak hanesan:

No. Tipu Krime sira Tinan

2021 2020 2019 2018 2017

1. Abuzu poder 13 17 9 13 2

2. Pekutatu uzu 9 13 14 4 1

3. Pekulatu 1 3 10 16 9

4. Adm. danoza 7 6 8 7 7

5. Part. ekon Neg. 8 8 7 4 4

6. Falsifika Dok. 5 3 4 6 8

Fontes: Relatoriu Annual CAC

Husi amostra figura iha leten hatudu katak, setor publiku nudar fatin ida neébe mak bokur liu ba krime korrupsaun, neébe rezulta estadu lakon ninia osan por volta U$S5,090,711.37.- durante tinan sira refere.

Bainhira ita uza montante osan refere ho lo-los tuir ninia dalan karik, montante refere bele konstrui Uma Kbiít Laek (UKL) hamutuk unidade 254 neébe mak sei fo benefisiu boot ba populasaun sira hodi goza netik valor ukun rasik an ida neé.

Aleinde krime sira seluk, krime pekulatu uzu mos akontese ho prevalencia neébe as. Ho prevalenscia ida neé, hatudu katak, mekanismu, sistema no prosedimentu kontrolu interna ba jestaun utilizasaun patrimoniu estadu sira iha instituisaun publiku sira iha failansu sistemiku (systemic failure) hodi bele halo prevensaun ba pratika korrupsaun iha setor publiku nian.

Bazeia ba deskobrementu CAC nian, liu husi ninia servisu prevensaun no investigasaun criminal detekta katak, iha Timor-Leste, failansu sistemiku neébe mak hamosu korrupsaun iha setor publiku mosu no buras neé tanba kontruibui husi elementu ou fatores oi-oin mak hanesan, hahalok individual husi agente servidor publiku sira neébe mak konsiste husi karakteristiku internal sira hanesan kanten (greed), laiha sentidu partense ou nain ba estadu (sense of belonging), estilu moris neébe mak konsumtivu (consumptive lifestyle), hamlaha ba privilejiu (privilege syndrome) no menus kuinesimentu ba lei no regulamentu sira, fator kultura organizasaun nian neébe konstitui husi kontrolu internal neébe mak fraku, superior hierarku sira neébe la hatudu ezemplu diak ba ninia subordinadu sira, Padraun Prosedimentu Operasional (SOP) sira neébe bias ba interese pessoal, laiha sistema ou mekanismu protesaun ba keixozu sira, kultura proteje malu hodi taka informasaun ba autoridade seluk no adopta sistema administrasaun no jestaun rekursus financeira, patrimoniu no lojistika neébe desatualizadu, fator ambiente sosiedade mos fo fatin ba agente servidor publiku sira hodi badinas halo korrupsaun tanba laiha pasiensia hodi kumpri tuir prosedimentu no regulamentu sira, la dun iha interese hodi hase nomos seidauk konsiente nudar vitima ida ba hahalok korrupsaun sira neébe mak ema servidor publiku sira pratika.

Nudar moras neébe mak sei fo todan ba iha sosiedade tomak nia moris, servidor publiku sira tenke hahu ona hodi hola parte aktivu iha movimentu nasional luta kontra korrupsaun nian.

Servidor publiku sira tenke hahu halo esforsu konkretu sira hahu iha ida-idak ninia servisu fatin hodi hakloót risku no oportunidade ba korrupsaun tipu saida deit atu akontese.

Hare ba iha akontesimentu hahalok korrupsaun iha setor publiku nian, servidor publiku sira tenke hanoin ona dalan no strategia oinsa mak bele prevene korrupsaun iha setor publiku nian. Dalan no estrategia sira refere mak hanesan:

Medida Prevensaun Internal

Iha vertente ida neé, entidade publiku sira neébe mak nudar parte integrante husi setor publiku tenke halo esfrosu hodi Primeiru, dezenvolve estrutua no mekanismu kontrolu intenu neébe rigor hodi bele halo kontrolu ho maximu ba jestaun utilizasaun, distribuisaun no manutensaun ba rekursu estadu nian, Segundu, GIA tenke organiza sesaun regular ba kapasitasaun no formasaun ba servidor publiku sira hodi internaliza didiak kona ba lei, regulamentu no prosedimentu (SOP), valores anti-korrupsaun, jestaun ne’ebe diak, transparansia, responsabilidade no integridade no Terceiru halo avaliasaun no estudu risku (risk assessment) ho regular hodi hatene resistensi Sistema internal ba tentativa nomos pratika infrasaun ou korrupsaun ne’ebe mak eminente.

Medida represivu internal

GIA sira tenke iha korajem hodi hola medida sira bainhira detekta iregularidade no infrasaun sira neébe mak bele fo fatin ba korrupsaun akontese.

GIA tenke iha Liberdade no independensia hodi avalia gravidade no seriedade husi infrasaun sira hodi decide dalan no solusaun neébe mak apropriadu ba kada infrasaun ho destinu infrator sira nian hodi hatoó rezultadu dekobrementu sira ba autoridade law enforcement sira.

Medida represivu eksternal

Bainhira medida sira hanesan mensiona iha leten mak agente publiku sira sei nafatin hakarak pratika korrupsaun, entaun estadu iha iha autoridade no kompetensia tomak hodi aplika medida represivu liu husi loke prosesu krime kontra pratikante sira nudar ultimum remedium hodi hamosu shock therapy ba agente publiku sira seluk hodi labele repete erru sira neébe mak pratika ona.

Relasiona ho hahalok korupsaun neébe uza ou permiti ema seluk uza patrimoniu sira estadu neébe mak agente publiku kaer tanba nia funsaun ou nia iha asesu tanba funsaun servisu hodi uza ba beneficia ninia an ou ema terseiru ida neébe hamosu prejuizu ba ema seluk neé kriminalizadu ho tipu krime Pekulatu Uzu iha artigu 83 husi Lei No. 7/2020 kona ba Medidas de Prenvenção e Combate a Corrupção (MPCC) nian. Ao mesmo tempu ba jestor patrimoniu estadu sira neébe mak husik ou permiti ema seluk utiliza patrimoniu estadu ba interese privadu komete mos krime Administrasaun Danoza neébe mak previstu no punidu iha artigu 274 husi Kodegu Penal Timor-Leste nian.

Konkluzaun

Korrupsaun iha setor publiku nudar hahalok at ida neébe mak hamosu insustenabilidade ba rekursu estadu nian hodi impede programa dezenvolvimentu sosial no ekonomia ba ema barak nia moris. Husi korrupsaun neébe mak akontese iha setor publiku neé, durante tinan lima ikus hahu husi tinan 2017 – 2021 neé CAC registra prejuizu estadu por volta U$S5,090,711.37.- neébe ekivalente ho halakon direitu uma dignu ba familia hamutuk 254 neébe mak bele beneficia husi programa Uma Kbiit Laek nian.

Durante tinan lima refere, registra mos krime prekulatu uzu neébe akontese ho prevalencia as, neébe mak ejizi esforsu husi agente publiku sira atu ho seriedade bele hadia sistema jestaun kontrolu interna ba utilizasaun patrimoniu estadu nian tanba hare husi prevalensia refere hatudu sinal katak akontese failansu sistemiku (systemic failure) iha jestaun kontrolu ba utlizasaun patrimoniu estadu nian. Failansu ida neé kauza husi fator sira hanesan fator individu, fator kultura organizasaun nomos fator ambiente sosiedade.

Maske nuneé, agente servidor publiku sira tenke iha korajem atu hadia failansu sira nomos fator sira neébe mak kontribui hodi hamosu failansu refere liu husi dalan no medida prevensaun internal, medida represivu internal no ikus liu medida represivu external nudar ultimu rekursu (ultimum remedium) neébe mak autoridade estadu sira tenke uza hodi hamosu shock therapy nuneé bele hamenus hahalok korrupsaun iha setor publiku nian.

*** Obrigadu, hamutuk ita kombate korrupsaun ***

Dili, 2 de Junho de 2022

Permanent link to this article: https://cac.tl/2022/06/intervensaun-kompletu-komisariu-adjunto-cac-augosto-castro-nian-iha-sesaun-trabalhu-integradu-kona-ba-jestaun-patrimoniu-estadu-ida-neebe-efisiente-no-rigorozu-hodi-kontribui-baboa-governasaun-iha/