INCT Prontu Koopera Ho CAC dezenvolve Área Estudu no Peskiza Kona-ba Rísku Korrupsaun iha Timor-Leste

Ekipa Comissão Anti-Corrupção (CAC) lideradu Komisariu Adjuntu Prevensaun no Sensibilizasaun Luis de Oliveira Sampaio akompaña husi Xefe Unidade Kooperasaun (UK) no Xefe Unidade Estudu no Avaliasaun Rísku (UEAR) Kuarta-Feira (01/06) ohin hala’o sorumutu kortezia ho Prezidente Instituto Nasional Ciência no Tecnologia (INCT) Timor-Leste ho nia Ekipa, iha edifisiu INCT, Infordepe Dili.

Objetivu husi sorumutu kortezia ne’e hodi ko’alia kona-ba lasu kooperasaun entre instituisaun rua ba servisu hamutuk iha área estudu no peskiza sira kona-ba rísku korrupsaun ninian. CAC no INCT mós partilla informasaun ba malu hodi buka asertasaun idea sira kona-ba apóiu sira husi INCT ba CAC hodi realiza programa estudu no peskiza sira ne’ebé CAC planeia sei implementa iha tempu besik.

Iha biban ne’e, Komisariu Adjuntu Luis de Oliveira Sampaio introdus ba Prezidente INCT ho nia Ekipa Tékniku sira kona-ba servisu sira CAC nian iha área prevensaun korrupsaun, partikularmente iha servisu Unidade Estudu Avaliasaun Rísku Korrupsaun ne’ebé foku ba hala’o estudu, peskiza no halo analiza sira relasionamentu ho rísku sira korrupsaun iha setór públiku.  

Sorumutu kortezia ne’e CAC ho inisiativa buka koopera besik ho INCT nu’udar sentru ba peskiza nasionál Estadu nian atu apóiu CAC hodi halo estudu no peskiza ba asuntu sira hanesan; a) Hala’o peskiza ba persepsaun públiku kona-ba korrupsaun no nia efeitu sira; b) Hala’o peskiza ba instituisaun públiku sira kona-ba integridade ajénte públiku sira hodi promove boa governasaun; no c) Halo estudu no peskiza siéntifiku liu tan ba rísku sira korrupsaun iha desizaun politika públika iha setór públiku en relasaun ho estabelesimentu lei no dekretu lei husi poder politika sira.

Alende ne’e, CAC mós husu Prezidente INCT ho nia Ekipa atu tulun CAC hodi fó asisténsia téknika balun kona-ba posibilidade ba fó formasaun tékniku iha ámbitu melloramentu no aperfeisionamentu área estudu no peskiza ninian ba Espesialista Anti-Korrupsaun (EAK) sira.

Rezultadu diskusaun ohin, Ekipa INCT hatudu sira nia prontidaun no prontu servisu hamutuk ho CAC hodi estabelese Memorandu of Understanding (MoU) ida hodi servisu hamutuk ba dezenvolve área estudu no peskiza sira ba rísku korrupsaun iha setór públiku hodi prevene no kombate krime korrupsaun iha Timor-Leste.

Ba sorumutu kontinuasaun, CAC no INCT sei kontinua komunika ba malu hodi fó kontinuasaun ba diskusaun kle’an hodi esplora tan área kooperasaun sira no realiza pontus konsiderasaun ne’ebé aserta ona.   

Permanent link to this article: https://cac.tl/2022/06/inct-prontu-koopera-ho-cac-dezenvolve-area-estudu-no-peskiza-kona-ba-risku-korrupsaun-iha-timor-leste/