CAC Suspende Rekrutamentu Guarda Floresta no Hahu Prosesu Investigasaun Kriminal

Komisariu Adjuntu Comissão Anti-Corrupção (CAC) ba Asuntu Prevensaun no Sensibilizasaun Luis de Oliveira Sampaio lidera ekipa Quadrilateral; CAC, Comissão Função Pública (CFP), Provedor Direitur HUmanus no Justisa (PDHJ) no Inspector Geral do Estado (IGE) Sesta-feira (10/6) ne’e halao sorumutu ho Diretor Geral Floresta no Prezidenti Ekipa Juri rekrutamentu nian Simão Raimundo Mau no decide suspende prosesu rekrutamentu Guarda Florestal hamutuk nain 184 iha Ministerio Agrukultura ne’ebé sai preukupasaun publiku semana ne’e.

Desijaun suspende prosesu ne’e foti hafoin iha lamentasaun husi publiku ne’ebé iha indikasaun forte kandidatus nain 20 husi kandidatus 184 ne’ebé liu iha prosesu rekrutamentu ne’e iha indikasaun irregularidades forte.

Indikasuan irregularidade forte  ne’e tuir dokumentus ne’ebé CAC no ekipa Quadrilateral simu ona kandidatus balun ne’ebé la liu iha teste seleksaun dokumentus no eskrita maibe naran sai iha rezultadu final aprovadu klasifikadu no kontratu asina tiha ona.

Ba interese transparansia prosesu rekrutamentu iha instituisaun publiku no integridade diak membrus ekipa juri nian tuir Lei Nu. 7/2020 26 Agosto – Medidas Prevensaun no Kombate Korrupsaun (MPCC), Komisariu Adjunto CAC Luis Sampaio lori ekipa Quadrilateral nian naran husu ba DG Raimundo Mau atu suspende prosesu rekrutamentu.

Alem de suspende rekrutamentu, husu ba Komisaun rekrutamentu atu fornese informasaun mais detalus no dokumentus hotu relasiona ho prosesu rekrutamentu husi inisiu simu dokumentus to’o publikasaun final naran kandidatus sira nian mai iha CAC tarde liu Sesta-feira loraik tuku 5;30 OTL oras servisu nian.

CAC la impede prosesu rekrutamentu ida ne’e maibe atu defende transparansia prosesu rekrutamentu iha instituisaun publiku no integridade no naran diak membrus juri sira nian. CAC mos labele taka mata ba lamentasaun sira husi publiku ne’ebé sai viral iha media social,” Katak Komisariu Adjunto Luis Sampaio ba prezidenti juri Raimundo Mau durante sorumutu.

Prezidenti juri no DG Guarda Floresta Raimundo Mau promote sei kumpri ejijensia CAC nian hodi lori dokumentus hotu relasiona ho prosesu rekrutamentu Guarda Floresta nian ne’ebé sai viral iha media social no sai atensaun publiku mai iha edifisiu CAC Farol Sesta-feira loraik ne’e molok tuku 5;30 OTL.

Chefe Unidade Informasaun no Seguransa Euclides Madeira nudar unidade servisu sekreta nian iha CAC simu tiha ona informasaun no dokumentus komprovativus balun ne’ebé indika iha duni indikasaun irregularidades durante prosesu rekrutamentu Guarda Floresta ne’ebé ekipa juri komete no sei tuir investigasaun criminal wainhira dokumentus ne’ebé CAC sei simu iha loraik ne’e komprova.

Sorumutu ekipa Quadrilateral ne’e halao iha Salaun sorumutu Diresaun Jeral Floresta nian iha Gabineti Vice-Ministro Agrikultura Caicoli Dili. (*)

Permanent link to this article: https://cac.tl/2022/06/cac-suspende-rekrutamentu-guarda-gloresta-no-hahu-prosesu-investigasaun-kriminal/