CAC Partisipa iha Sensibilizasaun Materia Jestaun Uzu Patrimóniu Estadu Iha MOP

Komisariu Comissão Anti-Corrupção (CAC) Dr. Sergio Hornai hetan konvite husi Ministério Obras Públika iha Tersa-Feira (28/6) ohin hodi sai oradór iha atividade sensibilizasaun materia rezolusaun Guvernu no 130/2021, kona-ba jestaun uzu patrimóniu Estadu ba kargus Diretór, Xefia no Funsionariu sira iha Ministério Obras Públika nian iha Edifisiu Otel City 8 Manleuana, Dili.

Komisariu Sergio Hornai sai oradór iha eventu sensibilizasaun ne’e hamutuk ho Prezidente Komisaun Funsaun Públika (KFP) Inspetór Jerál Estadu (IJE), Komandante Polisia Tránzitu (POLTRANZ) no Diretór Jerál Jestaun Património Estadu (DJJPAE) hodi partilla koñesimentu espesifiku kona-ba oinsá ajénte públiku sira iha Ministériu Obras Públika nian atu jere no utiliza ho loloos kona-ba karreta no motor Estadu nian ba interese públiku, nune’e sira labele monu ba krime korrupsaun hodi fó prezuizu ba Estadu.

Partisipasaun atividade sensibilizasaun ba kargu diretór no xefia ho funsionariu sira iha MOP kona-ba rezolusaun Guvernu no 130/2021 nian ne’e parte ida mós husi responsabilidade juridika Komisaun nian iha ámbitu prevensaun hodi partilla hamutuk ho ajénte públiku sira atu sira bele sensibel ho rezolusaun Guvernu nian, nune’e prevene-an uza sala patrimoniu Estadu ba interese privadu hodi ariska-an iha krime sira abuzu poder no pekulatu uzu.

Komisariu Sergio Hornai iha nia intervensaun hatete, funsionáriu públiku sira ne’ebé hetan fiar hodi sai jestór ba mákina administrasaun públiku Estadu nian tenke hamriik hanesan guardiaun hodi asegura politika jestaun dezenvolvimentu ida integradu ba serví interese ema hotu-hotu nian no hasees-an husi hanoin sira ne’ebé ‘pragmatiku’ liu hodi monu ba tentasaun aat krime korrupsaun.

Kargu xefia no funsionáriu sira iha MOP iha responsabilidade boot nu’udar servidór públiku atu sai vanguarda ba dezenvolvimentu nasionál iha misaun boot libertasaun povu Timoroan nian agora. Misaun estratéjiku ba libertasaun povu ohin loron ne’ebé funsionáriu públiku sira presiza kumpre iha Estadu Direitu Demokrátiku ne’e mak hala’o servisu públiku nian tuir de’it lei, dekretu lei, no rezolusaun ne’ebé orgaun ezekutivu no lejislativu sira produs, atu nune’e la fó beban ba sira nia-an bainhira hala’o servisu Estadu nian.

“Ha’u no ita boot sira tenke hamriik hanesan guardiaun hodi asegura para korrupsaun ne’e labele mosu”, katak Komisariu Sergio.

Komisariu Sergio fó atensaun ba ajénte públiku sira iha Ministériu Obras Públika atu utiliza karreta no motor Estadu nian iha kondisaun servisu nian de’it. Bainhira la kuidadu hodi jere rekursu Estadu ba interese públiku no monu ba krime sira korrupsaun hanesan administrasaun da noza, abuzu poder, pekulatu no pekulatu uzu sei assume responsabilidade kriminál.

“Ita hotu-hotu tenke kumpre, kumpre, kumpre de’it ba lejislasaun, se la kuidadu ho didi’ak falta auzénsia hodi lori prezuizu ba Estadu mak halo medida represivu”, Komisariu Sergio fó atensaun.

Permanent link to this article: https://cac.tl/2022/06/cac-partisipa-iha-sensibilizasaun-materia-jestaun-uzu-patrimoniu-estadu-iha-mop/