CAC no UNODC Realiza Workshop Internasionál Avaliasaun Rísku Korrupsaun Iha Aprovizionamentu Setór Saude iha Timor-Leste

Gabinete Regionál Nasaun Unida nian Kona-ba Droga no Krime no Gabinete Regionál ba Sudeste Aziátiku no Pasífiku nian (UNODC/ROSEAP-Sigla Inglesh) koopera besik ho Comissão Anti-Corrupção (CAC) Timor-Leste realiza Workshop internasionál avaliasaun rísku korrupsaun iha setór saude iha kontekstu pandemia COVID-19 iha Timor-Leste durante loron tolu (6-8 Juñu 2022) iha Salaun edifisiu Otél Timor, Dili.

Objetivu husi workshop avaliasaun rísku korrupsaun nian iha setór saude iha Timor-Leste ne’e nu’udar prosesu identifikasaun ba vulnerabilidade no rísku korrupsaun atu nune’e bele define liu-tan asaun no medida sira atu evita ka hamenus konsekuénsia sira. Avaliasaun ne’e mós atu halibur parte interesada relevante atu identifika rísku, avalia probabilidade no impaktu potensiál husi kada eskema korrupsaun no sujere asaun mitigasaun, kontrolu no prosesu sira.

Korrupsaun iha setór saúde sai hanesan fenomenu ida ne’ebé malisioza tebes ne’ebé estraga fundamentu Estadu direitu hodi distorse distribuisaun ne’ebé justu ba ríku-soin Estadu no hamenus kualidade atendimentu médiku ne’ebé disponivel. Partikularmente, setór saude vulnerável tanba kompleksidade servisu médiku no sasan lubuk ida ne’ebé presiza involve ema barak husi setór públiku no privada.

Alende ne’e, buat ne’ebé atrativu ba autór korruptu sira mak kuantidade boot ba sasán sira ne’ebé envolve, bainhira lakon, kauza aumentu makaas iha kustu atendimentu saúde nian no hamenus atividade, kualidade no volume prestasaun servisu saúde. Ho pandemia COVID-19, setór saúde vulneravel liu-ba korrupsaun, liuliu ba iha aprovizionamentu emerjénsia ba distribuisaun vasina, ekipamentu protesaun pesoál no servisu no sasán sira seluk.

Komisariu CAC Sergio Hornai iha nia intervensaun dahuluk hatete, workshop avaliasaun rísku korrupsaun iha aprovizionamentu saude nian nu’udar oprtunu no espasu ida mós hodi enrikesa hakle’an no eleva koñesimentu ajénte sira ne’ebé hala’o knaar no servisu iha área aprovizionamentu hodi la monu ba krime korrupsaun abuzu poder, konflitu interese no administrasaun da noza iha situasaun sira emerjénsia nian, liu-liu iha situasaun moras pandemia COVID-19 ninian.

“Workshop ida ne’e nu’udar espasu ba ita atu bele priense ita nia frakeza sira iha aprovizionamentu, kontratasaun públika, ezekusaun orsamentu no mós halo kontrolu no monitorizasaun sira, nune’e bele lori no diresiona ita ba iha situasaun ida loos, no hasees ita husi konflitu interese no abuzu poder”, katak Komisariu Sergio.

“Iha korrelasaun ho situasaun COVID-19 ninian, konserteza rekursu lubuk ida ita injeta makaas husi nasionál no internasionál, oinsá ita nia jestaun no kontrolu sira ba rekursu sira ne’e hodi asegura nia sustentabilidade. Oinsá ita bele hasees husi rísku sira korrupsaun nian hodi labele to’o ba assume responsabilidade (kriminál)”, tenik Komisariu Sergio.

Workshop ba loron dahuluk ohin hahú ho diskursu husi komisariu CAC Dr. Sergio Hornai, UN Country Resident Dr. Roy Trivedy, Charge de Affair, US Embassy Dr. Thomas Daley no Ministra Saude Dra. Maria Odete Freitas Belo.

Konituasaun husi sesaun diskursu nian hato’o mós konferénsia imprensa ba públiku liu husi média nasionál sira  ba eventu refere.

Enkuantu  Oradór no aprezentasaun matéria workshop loron dahuluk ohin iha sesaun dader nian mai husi peritu nasionál sira husi Diretór CNA Hermegildo Albano ne’ebé aprezenta kona-ba enkuadramentu legál aprovizionamentu públiku, Diretór Ezukitivu SAMES-IP, Santana Martins aprezenta kona-ba rejime jurídiku espesiál aprovizionamentu ba ekipamentu médiku no farmaseutiku, Diretór Jerál Servisu Korporativa MS, Marcelo Amaral aprezenta ezekusaun fundus COVID-19 Minist’eriu Saude, no Inpetór Jerál Estadu, Fransisco de Carvalho aprezenta relatóriu inspeksaun ne’ebé halo iha SAMES-IP.

Iha sesaun loraik nian, worksop kontinua ho aprezentasaun husi sosiedade sivíl, Koordenadór la’o hamutuk Celestino Gusmão ne’ebé aprezenta kona-ba analiza fundu covid-19 nia ezekusaun, no UNDOC Fransesco Checchi kona-ba Observasaun Jerál Korrupsaun Relasiona ho Setór Saude no Matadalan ba Prosesu Avaliasaun Rísku. Ikus liu termina ho diskusaun nakloke partisipante sira  kona-ba analiza ambiente sira ne’ebé permite operasaun ka prosesu sira no analiza síklu sira fornesimentu nian relasiona ho fornesimentu ekipamentu saude.

Partisipa iha eventu refere mai husi entidade nasionál oioin mak hanesan kargu xefia sira husi Ministériu Saude, Ministériu Financas, CNA, SAMES-IP, Ministériu Públiku, PDHJ, IJE, CAC, FONGTIL, CEPAD, JSMP, La’o Hamutuk, Media, KOnsellu Imprensa, Akademica UNTL-departamentu Medicina. Partisipa mós husi entidade internasionál mak hanesan Embaixada Estadus Unidus Amerika-INL, KOICA, WHO, UNDP, UNICEF, ADB, DFAT, USAID, Uniaun Europeia, PFMO, Instituto Camões no PALOP.

Permanent link to this article: https://cac.tl/2022/06/cac-no-undoc-realiza-workshop-internasional-avaliasaun-risku-korrupsaun-iha-aprovizionamentu-setor-saude-iha-timor-leste/