CAC Hetan Konvite Sosializa Lei MPCC Iha Empreza Telkomcel

Empreza Telekomunikasaun Indonesia Telekomcel ho inisiativa konvida Comissão Anti-Corrupção (CAC) liu husi Diresaun Prevensaun no Sensibilizasaun (DPS) lidera husi Komisariu Adjuntu Luis de Oliveira Sampaio, akompaña husi Xefe Unidade Inspeksaun no Monitorizasaun Antonino Alves, Kuarta-Feira (15/06) ohin ba hala’o sensibilizasaun Lei Nú. 7/2020-Medida Prevensaun no Kombate Korrupsaun (MPCC-Sigla Portuges) ba responsavel empreza Telkomcel no nia tékniku sira iha edifisiu sentrál Telekomcel, Timor-Plaza, Dili.

Inisiativa husi empreza internasionál ne’ebé hala’o servisu nu’udar operadór telekomunikasaun iha Timor-Leste ne’e hato’o sira nia pedidu kona-ba sosializasaun lei nú 7/2020-MPCC mai CAC tanba presiza atu buka intende provizaun balun ne’ebé ko’alia mós kona-ba krime iha setór privadu iha lei refere atu nune’e sira mós bele prevene-an la monu ba krime korrupsaun.

Telkomcel foti Inisiativa husu ekipa CAC sosializa lei MPCC ne’e atu bele loke liu tan sira nia orizonte no mellora sira nia pensamentu no koñesimentu di’ak ba enkuadramentu jurídku foun ida ne’e atu sira mós bele kontribui ba luta koletiva hasoru inimigu komum krime korrupsaun iha Timor-Leste.

Komisariu Adjuntu Sampaio hato’o apresiasaun boot ba empreza Telkomcel ne’ebé hatudu sira nia vontade boot atu buka hatene krime sira korrupsaun nian iha enkuadramentu legál sira Timor-Leste nian hodi hasa’e sira nia koñesimentu prevene krime korrupsaun.

“Ida ne’e onra boot ba CAC hodi bele foti opportunidade partilla saida mak CAC halo durante ne’e ba prevene no kombate krime korrupsaun iha Timor-Leste. Ami apresia tebes! Inisiativa ida ne’e foin mak halo husi Telkomcel. Iha instituisaun barak, ami mak tenke konvida sira hodi halo sosializasaun ba lei ida ne’e nian”, katak Adjuntu Sampaio.

Komisariu Adjuntu iha nia introdusaun Lei MPCC ba responsavel operador Telkomcell iha Timor-Leste ho nia tékniku sira katak, Lei Nú. 7/2020 fó importánsia boot liu ba elementu boot rua hodi prevene no kombate krime korrupsaun. Elementu ida mak “Deklarasaun Rendimentu, Bens no Interese (DRBI)” ne’ebé aplika ba ajénte públiku sira Estadu nian nu’udar rejime estratéjiku hodi prevene krime korrupsaun iha setór públiku. Ida seluk mak “Estratejia Nasionál Anti-Korrupsaun (ENAK)”, iha ne’ebé elementu ida ne’e sei involve mós setór privadu sira iha loron ruma hodi fó sira nia hanoin no tau idea hodi formula dokumentu ofisiál Estadu nian ida integradu kona-ba estratéjia Estadu nian ba prevene no kombate krime korrupsaun jeralmente iha Timor-Leste.

Komisariu Adjuntu Sampaio esplika espesifikamente kona-ba elementu Estratéjia Nasionál Anti-Korrupsaun ne’e elabora rekere mós partisipasaun husi setór privadu sira. Maibé ida ne’e sei depende mós ba rekursu CAC ninian. Aban bainrua atu hetan dokumentus ofisiál Estadu nian ida, parte hotu-hotu sei involve iha laran hodi halo diskusaun.

“Ezemplu empreza Telkomsel nian haree karik iha rísku korrupsaun nian ne’e iha ne’ebé? Entaun ita hotu-hotu dezenvolve mekanizmu estratéziku Estadu nian ba kombate krime korrupsaun”, Adjuntu Sampaio Esplika.

Komisariu Adjuntu Sampaio iha oportunidade ida ne’e fokus esplika ba partisipante sira kona-ba Lei MPCC ne’ebé kriminaliza mós ajente sira servisu iha setór privadu hanesan iha seksaun II husi krime sira korrupsaun nian ne’ebé prátika tiha ona bainhira ezerse knar privada. Iha artigu 88 ko’alia kona-ba setór privadu, artigu 90-korrupsaun pásiva ba sé mak ezerse knaar sira iha setór privadu, artigu 90-korrupsaun ativa ba sé mak ezerse knaar sira iha setór privadu, artigu 91- pekulatu iha setór privadu, no iha artigu 96-krime fraude konstrusaun.

Oportunidade sensibilizasaun ohin, partisipante sira hamutuk na’in 37 mak partisipa direta iha atividade ida ne’e nian balun partisipa virtualmente. Partisipante sira mós entuziasmu hato’o sira nia pergunta sira inklui fó sira nia perspetiva tékniku ba prevene no kombate krime korrupsaun dizitalizadamente.

Responsavel Másimu Empreza Telekomcel nian iha nia lia ikus hato’o apresiasaun boot ba Comissão Anti-Corrupção nia disponibilidade, tanba bele responde pedidu empreza Telekomcel nian ba partilla ona lei MPCC. Ho koñesimentu ne’ebé hetan iha sesaun kompartilla ne’e, sei sai buake ida hodi partisipa hamutuk mós ho Estadu Timor-Leste ba prevene no kombate korrupsaun.

Permanent link to this article: https://cac.tl/2022/06/cac-hetan-konvite-sosializa-lei-mpcc-iha-empreza-telkomcel/